Դրոնները կարող են կարևոր դեր խաղալ բնական աղետների ժամանակ՝ օգնելով որոնողափրկարարական աշխատանքներին և բարձրացնելով դրանց արդյունավետությունն ու անվտանգությունը:
Փորձենք պարզել, թե կոնկրետ ինչ կարող են անել դրոնները կրիտիկական իրավիճակներում և ինչու է ցանկալի, որ փրկարարներն ունեն դրոնները իրենց գործիքակազմում։
1. Իրավիճակի արագ գնահատումԴրոնների օգնությամբ կարելի է իրական ժամանակում օդից ուսումնասիրել բնական աղետից տուժած շրջանները։ Նման դրոնների կիրառումը կօգնի գնահատել վնասի չափը, հայտնաբերել վտանգները և ավելի լավ կազմակերպել որոնողափրկարարական գործողությունները։
Լավ տեսախցիկ ունեցող դրոնը կարող է միանգամից շատ մեծ տարածքներ նկարել՝ խնայելով շատ ժամանակ։ Նույն տարածքը, օրինակ, ուղղաթիռներից ուսումնասիրելը շատ ավելի երկար կտևի։
2. Հասանելիություն դժվար հասանելի վայրերինԴրոնները կարող են օգտագործվել նաև դժվարամատչելի, վտանգավոր վայրերն ուսումնասիրելու համար, ինչպիսիք են ավերված շենքերը և ջրհեղեղը, հասկանալու համար, թե արդյոք այնտեղ տուժածներ կան և արդյոք իմաստ ունի փրկարարներ ուղարկել այնտեղ։ Եթե այո, ապա դրոնի տվյալները կարող են օգնել՝ պարզելու փրկարարների համար ավելի անվտանգ երթուղիները:
3. Տուժածների որոնում և նույնականացումՋերմային տեսախցիկներ ունեցող դրոնները կարող են օգնել՝ գտնելու տուժածներին, ներառյալ փլատակների տակ կամ խիտ բուսականության մեջ մնացած մարդկանց, հատկապես գիշերային գործողությունների ժամանակ:
Բազմասպեկտրալ և ինֆրակարմիր տվիչները կարող են «տեսնել» ծխի, մառախուղի և փոշու միջով, ուստի նման տվիչներով զինված դրոնը կօգնի մարդկանց գտնել դժվար տեսանելիության պայմաններում:
4. Անհրաժեշտ պարագաների առաքումԴրոնները կարող են կիրառվել բնական աղետի պատճառով արտաքին աշխարհից կտրված, դժվար հասանելի վայրերում հայտնված տուժածներին բժշկական պարագաներ (առաջին օգնության դեղատուփեր, դեղամիջոցներ և դեֆիբրիլյատորներ), սնունդ, ջուր, ծածկոցներ և կյանք փրկող տարբեր սարքավորումներ մատակարարելու համար: Այս պարագաները կարող են օգնել տուժածներին՝ ցուցաբերելու առաջին օգնություն իրենց և մյուսներին և գոյատևելու մինչև փրկարարների ժամանումը:
5. Մշտադիտարկում և կանխատեսումԴրոնների միջոցով հնարավոր է նաև հետևել շրջակա միջավայրի պայմաններին, ինչպիսիք են ջրհեղեղների ժամանակ ջրի մակարդակի բարձրացումը կամ անտառային հրդեհների տարածումը, ինչը կօգնի կանխատեսել հնարավոր ռիսկերը և համապատասխանաբար պլանավորել հետագա գործողությունները:
Հետևեք NEWS.am Tech-ին Facebook-ում և Twitter-ում