Նախընտրելի
Արհեստական բանականությամբ աշխատող ChatGPT նեյրոցանցն ստեղծած OpenAI ընկերության գործադիր տնօրեն Սեմ Ալթմանը 2023-ին վաստակել է ընդամենը 76,001 դոլար։ Այս մասին հայտնում է Business Insider-ը։
Նշվում է, որ այդ գումարը 3,4%-ով ավելի է, քան նրա եկամուտը 2022-ին, երբ նա ստացել է 73,500 դոլար։ Հատկանշական է, որ Սան Ֆրանցիսկոյում, որտեղ Ալթմանը 27 միլիոն դոլար արժողությամբ առանձնատուն ունի, տարեկան միջին աշխատավարձը կազմում է 126,000 դոլար։ ԱՄՆ սոցիալական ապահովության վարչության տվյալներով՝ 2023-ին երկրում միջին աշխատավարձը կազմել է 66,600 դոլար։
Ալթմանը նախկինում հայտարարել էր, որ OpenAI-ում իր աշխատանքի դիմաց իր փոխհատուցումը համեստ է։ 2023-ի մայիսին նա Սենատի դատական ենթահանձնաժողովին ասել է, որ բավականաչափ վաստակել է առողջության ապահովագրության համար վճարելու համար և ընկերությունում բաժնետոմս չի ստացել:
2024-ի մարտին Բլումբերգը Ալթմանի կարողությունը գնահատել է առնվազն 2 միլիարդ դոլար՝ չհաշված OpenAI-ում նրա մասնաբաժինը: Այս գնահատականը ներառում է $1,2 միլիարդ վենչուրային կապիտալ ներդրումներ:
OpenAI-ի հարկային հայտարարագրերի համաձայն՝ ամենաբարձր վարձատրվող աշխատակիցները եղել են համահիմնադիր Իլյա Սուցկվերը և Քրիս Քլարկը, որոնք ստացել են համապատասխանաբար 347,400 և 322,200 դոլար:
