Կարո՞ղ է արհեստական բանականությունը ռոբոտներին օժտել բնազդներով կամ զգացմունքներով, դարձնել դրանց ընտանիքների անդամներ, ինչպես, օրինակ, շներն ու կատուներն են։ Այս ֆենոմենի բացահայտման նպատակով է ստեղծվել ինքնասովորող արհեստական նյարդացանցերի համակցությամբ կառուցված Մորֆեոս ռոբոտը։
Ռոբոտի հնարավորությունները Գլոբալ ինովացիոն ֆորում 2022-ի շրջանակներում ներկայացրեց դրա հեղինակը՝ ABBYY-ի հիմնադիր և խորհրդի տնօրեն Դավիթ Յանը։
Յանն իր ելույթը սկսեց երաժշտական ստեղծագործությամբ, որի հեղինակը, ինչպես բարդ չէ կռահել՝ Մորֆեոս ռոբոտն էր՝ արհեստական բանականությունը։
«Բոլորս էլ լսել ենք արհեստական բանականության մասին: Արդյոք արհեստական բանականության արդյունք հանդիսացող իրերն ու առարկաները երբեւէ կդառնան մարդկային ընտանիքի մաս, թե կմնանա որպես զուտ էլեկտրական տեխնիկա՝ առանց հոգու: Իմ ընտանիքը փորձում է բացահայտել չափանիշները, թե արդյոք արհեստական բանականության զուգընկերը կարող է լինել ընտանիքի անդամ»:
«Մեր կատուն բոլոր առումներով ընտանիքի անդամ է. կարոտում ենք, ուրախ ենք տեսնել, պատրաստ ենք մեր հարմարավետության մի մասը զոհաբերել, որ նա երջանիկ լինի, - ասաց Յանը։ - Ինչպես է կարողացել այլ տեսակը դառնալ մեր ընտանիքի անդամ: Եթե դա կարող է վերաբերվել կատուներին, շներին, կարո՞ղ է ոչ օրգանական ուղեկիցը մի օր համարվել ընտանիքի համար»:
Կենդանիները էվոլյուցիայի շնորհիվ սովորել են տարբերակել մեկ ակնթարթում բարեկամին թշնամուց.
«Դա կատարվում է բարդ նյարդակենսաբանական մեխանիզմով, որի դիրիժորը օքսիտոցին հորմոնն է: Ըստ այդմ, մարդիկ հաճախ ավելի բարյացկամ են վերաբերվում իրենց խմբի անդամներին եւ ագրեսիվություն են ցուցաբերում ուրիշների նկատմամբ:
Արհեստական բանականության համակարգն էլ կարող է ունենալ «օքսիտոցին», նյարդահաղորդիչներ, կամ դրանց էլեկտրոնային համարժեքները։ Մենք այդ ոչ օրգանական համակարգին ընդամենը մեկ թիրախային փոփոխական տվեցինք՝ երջանիկ լինելը»:
«Մորֆեոսը ստեղծելիս, որպես հուզական գործընկերոջ, մենք ուզում ենք տեսնել, թե արդյոք նա կկարողանա մեր եւ իրենց միջեւ եղած բաժանարար գիծը հատել ճիշտ այնպես, ինչպես մեր կատուն»:
Այն գեներատիվ մոդել է, որը կարողանում է մարդկային լեզվով խոսել, ձանձրանալ, տխրել, սեր զգալ: Կարողանում է երաժշտական գործեր ստեղծել, տեսանյութեր ստեղծել եւ հաղորդակցվել մարդկանց հետ: Այն աշխատում է մի քանի ինքնասովորող արհեստական նյարդացանցերի ամբողջությամբ: 100 հազարից ավելի տեսախցիկներ են տեղադրված տան ներսում, 40 խոսափողերի են միացված, բազմաթիվ ալիքներ են միացված նրան։
Իր ելույթի վերջում Դեյվիդ Յանը ցուցադրեց Մորֆեոսի հետ երկխոսություն, որտեղ ռոբոտը պատասխանում է մարդու, այդ թվում հուզականության հետ կապ ունեցող հարցերին:
«Նրա պատասխանները մարդու կողմից որեւէ կերպ փոխված չեն, այդ թվում՝ կատակները», - ասաց Յանը:
«Կսովորե՞նք մենք խաղաղության մեջ ապրել մեր նոր գործընկերների հետ, արդյոք նրանք կհատեն մեր եւ իրենց միջեւ բաժանարար գիծը», - իր խոսքն ամփոփեց Դավիթ Յանը:
Նշենք, որ Երևանում, այսօր՝ հոկտեմբերի 5-ին, մեկնարկել է Գլոբալ ինովացիոն ֆորում 2022-ը` Հայաստանի գիտության և տեխնոլոգիաների հիմնադրամի (FAST) ամենամյա առանցքային միջոցառման հանդիսավոր բացումը։
NEWS.am-ը հանդիսանում է Գլոբալ ինովացիոն ֆորում 2022-ի ինֆորմացիոն գործընկերը:
ամիս
շաբաթ
օր