Ծրագրավորող դառնալու համար ի՞նչ լեզուներ պետք է սովորի դպրոցականը․ մասնագետի խորհուրդները

Այսօր ծրագրավորմամբ հետաքրքրված դպրոցականներին անհրաժեշտ է սովորել ունիվերսալ լեզուներ, որոնք օգտակար կլինեն ՏՏ ցանկացած մասնագիտության համար։ Նման լեզուների օրինակներ են՝ Python-ը, C++-ը, C#-ն և Java-ն: Այս մասին Газета.Ru-ին ասել է Yandex դպրոցական ծրագրերի ակադեմիական տնօրեն, Yandex լիցեյի ղեկավար Ալեքսանդր Պավոլոցկին։

Նրա խոսքով՝ ծրագրավորման լեզուների իմացությունն օգտակար կլինի ոչ միայն ապագա տեխնոլոգների, այլև այն դպրոցականների համար, որոնք նախատեսում են ընտրել սոցիալ-հումանիտար ոլորտներ: Առավել ակնհայտ ընտրությունը Python-ն է, քանի որ այն օգտագործվում է տարբեր ոլորտներում տվյալների մշակման համար։ Պավոլոցկին ընդգծել է, որ այս լեզվին տիրապետող մասնագետներն ավելի մրցունակ կլինեն աշխատաշուկայում։

«Python-ն օգտակար է ցանկացած ոլորտում, որտեղ պետք է ինչ-որ բան հաշվարկել կամ վերլուծություններ հավաքել, օրինակ՝ տնտեսագետներին, շուկայագետներին կամ սոցիոլոգներին: Իհարկե, Excel ծրագիրը ևս կարող է կատարել այս առաջադրանքներից մի քանիսը, սակայն ծրագրավորման լեզվի իմացությամբ պրոֆեսիոնալ ու պահանջված մասնագետը տարբերում է սովորական աշխատակցից»,- ասաց նա:

Փորձագետի խոսքով՝ ապագա ինժեներներին C, C++ և Python լեզուներն անհրաժեշտ կլինեն, օրինակ՝ բարձր մակարդակի մոդելավորման համար։ Python-ը նաև օգտակար է մեքենայական ուսուցման հետ աշխատելու համար։

Եթե ​​դպրոցականը ցանկանում է ծրագրային ապահովման ինժեներ դառնալ, սակայն դեռ հստակ չգիտի, թե ինչի հետ է աշխատելու, ապա կարող է սկսել ծրագրավորման գրեթե ցանկացած լեզվից՝ դա կարող է լինել Python, C++, C# կամ Java: Ավելի երիտասարդ լեզուների շարքում արժե ուշադրություն դարձնել նաև Go-ին:

«Այն ավելի հեշտ է սովորել, եթե ունես C-ի առնվազն տարրական գիտելիքներ, քանի որ Go-ն շատ բան է ժառանգել իր նախահորից: Միևնույն ժամանակ, այն ավելի կայուն է և հաճախ օգտագործվում է վեբ ծառայությունների, գովազդային գործիքների և ձայնային օգնականների մշակման մեջ»,- հավելել է Պավոլոցկին։

Օլիմպիադաների մասնակցող դպրոցականները, նրա խոսքով, պետք է լավ իմանան Python-ը, որպեսզի անցնեն մրցույթի առաջին փուլերը, իսկ C++՝ ավելի բարդ խնդիրներ լուծելու համար, օրինակ՝ ալգորիթմներ գրելու համար։