Չինացի գիտնականներն առաջարկել են սև խոռոչները որպես մարտկոց օգտագործել․ որքանո՞վ է դա հնարավոր

Պեկինի համալսարանի Աստղագիտության և աստղաֆիզիկայի ինստիտուտի չինացի գիտնականներն առաջարկել են մեթոդ, որը մի օր մարդկությանը թույլ կտա սև խոռոչները որպես էներգիայի աղբյուր օգտագործել: Այս դեպքում մարդիկ կկարողանան սև խոռոչները լիցքավորել ինչպես մարտկոցները։ Հետազոտությունը հրապարակվել է Physical Review D (PRD) գիտական ​​ամսագրում:

Մասնագետների հաշվարկների համաձայն՝ սև խոռոչի լիցքավորումը տեսականորեն կարելի է անել՝ դրա մեջ զանգվածային էլեկտրական լիցքավորված մասնիկներ ուղարկելով։ Այդ լիցքերը սև խոռոչի կողմից կներծծվեն այնքան ժամանակ, մինչև այնտեղ հայտնվի էլեկտրական դաշտ, որն արդեն կսկսի վանել ստացվող նոր լիցքերը։

Գիտնականների կարծիքով՝ սև խոռոչն իր մեջ ներմուծված էլեկտրաէներգիայի ծավալի մոտ 25%-ը կվերածի օգտագործելի էներգիայի։ Նման աղբյուրը մոտ 250 անգամ ավելի շատ էներգիա կարտադրի, քան ատոմային ռումբից արձակված էներգիան։

Հետազոտողներն առաջարկում են էներգիան սև խոռոչից դուրս բերել մի գործընթացի միջոցով՝ հայտնի որպես գերճառագայթում: Այն հիմնված է տեսության վրա, որ էլեկտրամագնիսական ալիքների մի մասը մինչև որոշակի կետ կարող է դուրս գալ սև խոռոչի ձգողականության դաշտից դրա պտույտի շնորհիվ:

Սև խոռոչների օգտագործման մեկ այլ մեթոդ ներառում է այս էներգիայի դուրսբերումը, այսպես կոչված, Շվինգերի էֆեկտի կամ զուգակցված մասնիկների տեսքով, որոնք ինքնաբերաբար ձևավորվում են էլեկտրական դաշտի առկայության դեպքում: Եթե ​​սև խոռոչը լիովին լիցքավորված է, ապա այն կսկսի պոզիտրոնների հոսքեր արտանետել, որոնք այնուհետև կարող են հավաքվել որպես էներգիա:

Թեև գիտնականների առաջարկները դեռ միայն տեսություն են, ապագայում մարդկությունը գուցե կարողանա գտնել միջոց տիեզերքի ամենավտանգավոր օբյեկտներն իր օգտին օգտագործելու համար։