Նոր և շատ օգտակար գործառույթ WhatsApp-ում. այժմ հնարավոր է չատում հաղորդագրություն ամրացնել

WhatsApp-ը ներկայացրել է հաղորդագրությունները չատի վերևում մինչև 30 օր ամրացնելու (pin) հնարավորությունը։ Այս գործառույթը, որը նման է Facebook Messenger բջջային հավելվածում ներդրվածին, ներկայումս աստիճանաբար է հասանելի դառնում օգտատերերին․ ոմանք այն ավելի շուտ են ստանում, քան մյուսները:

Հաղորդագրությունն ամրացնելու համար պարզապես պետք է սեղմել ընտրված հաղորդագրության վրա և սեղմած պահել, որից հետո կհայտնվի «Ամրացնել» հրահանգով մենյու: Կանխադրված կերպով, հաղորդագրությունը կարող է ամրացվել յոթ օրով, սակայն այն կարող է փոխվել մինչև 24 ժամ կամ առավելագույնը 30 օր: Գործառույթը կարող է կիրառվել ցանկացած հաղորդագրության վրա, ներառյալ հարցումների, պատկերների և տեսանյութերի: Խմբային չատի ադմինիստրատորները կարող են նաև սահմանել, որ ամրացված հաղորդագրությունները տեսանելի լինեն միայն այլ ադմինիստրատորների համար:

Այս նոր գործառույթն օգտատերերին կօգնի չատերում առանձնացնել կարևոր տեղեկությունները՝ ապահովելով շփման գործընթացի կառավարումը և նպաստելով, որպեսզի շփման մասնակիցները կենտրոնանան հիմնական թեմայի վրա՝ չնայած տարբեր մեկնաբանություններին և քննարկումներին:

Անցյալ տարի Meta-ն մարքեթինգային արշավ սկսեց, որպեսզի բարձրացնի WhatsApp-ի տարածվածությունն ԱՄՆ-ում. ընկերությունը ցանկանում է այն ԱՄՆ-ում դարձնել նույնքան հայտնի, որքան աշխարհի այլ երկրներում: Ֆունկցիոնալության մշտական ​​ընդլայնմամբ և ինքնաոչնչացող ձայնային հաղորդագրությունների և բազմաթիվ այլ հնարավորությունների և գործառույթների ներդրմամբ WhatsApp-ը նպատակ ունի համաշխարհային շուկայում մնալ որպես առաջատար մեսենջերներից մեկը: