Ինչպե՞ս է ձևավորվում «տիեզերական հրեշը»․ Hubble-ը ցույց է տվել գալակտիկաների 2 կլաստերների միաձուլումը

Hubble տիեզերական աստղադիտակը ֆիքսել է eMACS J1353.7+4329 զանգվածային գալակտիկաների կուտակումը: Այս կլաստերը գտնվում է Երկրից մոտ ութ միլիարդ լուսատարի հեռավորության վրա՝ Որսորդական շներ համաստեղությունում: Համեմատության համար նշենք, որ մարդկության կողմից երբևէ նկատված ամենահեռավոր օբյեկտը գտնվում է Երկրից 13,5 միլիարդ լուսատարի հեռավորության վրա:

Գալակտիկաների այս կուտակումը դեռ ձևավորման փուլում է և բաղկացած է առնվազն երկու էլիպսաձեւ գալակտիկաների կուտակումներից, որոնք գտնվում են միաձուլման գործընթացում, ասվում է Եվրոպական տիեզերական գործակալության հայտարարության մեջ:

Hubble-ի արած նոր լուսանկարում գալակտիկաների կլաստերը տեսանելի է որպես ձվաձև ձևերի խիտ կուտակում: Յուրաքանչյուր գալակտիկա իր վառ միջուկի շուրջ ունի շիկացած նարնջագույն աուրա: Բազմաթիվ այլ գալակտիկաներ ցրված են ամբողջ պատկերով, այդ թվում՝ դիֆրակցիոն ճառագայթներով չորս պայծառ աստղ։

Գալակտիկաների կլաստերից բաղկացած տիեզերական հրեշ eMACS J1353.7+4329-ը գործում է գրավիտացիոն ոսպնյակի պես՝ թույլ տալով հետազոտողներին ավելի մանրամասն ուսումնասիրել վաղ գալակտիկաները, քան կարող էին անել նախկինում: Գրավիտացիոն ոսպնյակավորումը տեղի է ունենում, երբ առաջին պլանի զանգվածային օբյեկտները, ինչպիսիք են գալակտիկաների միաձուլումը, աղավաղում են տարածության և ժամանակի հյուսվածքն այնպես, որ ավելի հեռավոր օբյեկտների լույսը մեծանա կամ խեղաթյուրվի:

«Երկնային մարմինը, ինչպիսին գալակտիկաների կլաստերն է, բավականաչափ զանգված է, որպեսզի աղավաղի տարածությունն ու ժամանակը, ինչի հետևանքով օբյեկտի շուրջը լույսի ուղին տեսանելի է, ասես այն կորացած է հսկայական ոսպնյակի միջոցով, - ասվում է Եվրոպական տիեզերական գործակալության հայտարարությունում,- Գրավիտացիոն ոսպնյակավորման առաջին ակնարկներն այս պատկերում արդեն տեսանելի են վառ կամարների տեսքով, որոնք միահյուսվում են eMACS J1353.7+4329 բազմաթիվ գալակտիկաների հետ»:

Նկարում կարելի է տեսնել գրավիտացիոն ոսպնյակի ազդեցությունը ամենամեծ կենտրոնական գալակտիկայի աջ կողմում, որը ձգում է ֆոնային գալակտիկան՝ առաջացնելով երկու միացված բարակ կամարներ։

eMACS J1353.7+4329-ի վերջին դիտարկումները կատարվել են մի քանի ալիքի երկարություններում՝ օգտագործելով Hubble-ի լայնանկյուն և և ACS տեսախցիկներ: Այս տվյալները հավաքվել են Monsters in the Making կոչվող նախաձեռնության շրջանակում, որն ընդգրկում է գալակտիկաների հինգ բացառիկ կլաստերներ: Այս հսկայական գրավիտացիոն ոսպնյակների վերաբերյալ Hubble-ի դիտարկումները հիմք են հանդիսացել նման օբյեկտների հետագա ուսումնասիրության համար NASA-ի James Webb տիեզերական աստղադիտակի միջոցով: