NASA-ի Ingenuity ուղղաթիռը ապրիլի 22-ին կատարել է իր 51-րդ թռիչքը Մարսի վրա և մոլորակի մակերևույթից 40 ֆուտ (12 մետր) բարձրությունից լուսանկարել է իր ուղեկից ռոբոտին՝ Perseverance մարսագնացին:
Լուսանկարում կարելի է տեսնել Մարսի հայտնի կարմրավուն հողը, իսկ ետին պլանում՝ Perseverance մարսագնացը, որը գրեթե չի տարբերվում Կարմիր մոլորակի մակերեսին սփռված մեծ քարերից։
Եթե լուսանկարում չեք գտնում ռովերը, ապա այս հոդվածի վերջում ներկայացված տեսանյութն ու լուսանկարը ձեզ կօգնեն այդ հարցում:
Ինչպես տեղեկացնում է Space.com-ը, Ingenuity-ի 51-րդ թռիչքը տևել է 137 վայրկյանից մի փոքր պակաս: Այս ընթացքում ուղղաթիռն ընդհանուր առմամբ թռել է 188 մետր տարածություն։
Հիշեցնենք, որ Ingenuity ուղղաթիռը (թարգմանաբար՝ «հնարամտություն») Մարս է ուղարկվել՝ Perseverance (թարգմանաբար՝ «Հաստատակամություն») մարսագնացի հատակին կցված, որը վայրէջք է կատարել Էզերո խառնարանում 2021-ի փետրվարի 18-ին:
Ingenuity-ն հետախուզական աշխատանք է կատարում Perseverance-ի համար՝ օգնելով բացահայտել այն վայրերը, որոնք հետաքրքրում են մարսագնացին Կարմիր մոլորակի վրա հնագույն կյանքի նշաններ փնտրելու իր առաքելությունում: Քանի որ Երկրի և Մարսի միջև հեռավորությունը չափազանց մեծ է, ուղղաթիռը հեռակա կարգով կառավարելն անհնար է, հետևաբար այն թռչում է նախապես ծրագրավորված երթուղով:
ամիս
շաբաթ
օր