Արհեստական բանականությունը (ԱԲ) այսօր հեղափոխություն է անում տարբեր ոլորտներում՝ սկսած մանրածախ առևտրից մինչև առողջապահություն, և շատ ընկերություններ ձգտում են ինտեգրել ԱԲ հիման վրա լուծումներն իրենց գործունեության մեջ: Ըստ SADA, an Insight company-ի գլխավոր տեխնիկական տնօրեն Մայլս Ուորդի՝ առանց ամպի հնարավորությունների՝ ԱԲ համակարգերի մշակումն ու ծավալումն անարդյունավետ և դանդաղ կլիներ:
Մայլս Ուորդը Հայաստան էր ժամանել մասնակցելու WCIT 2024/DigiTec-ին, որը տեղի է ունեցել Երևանում հոկտեմբերի 4-ից 7-ը։ WCIT-ի շրջանակում նա մասնակցել է «AI-ի վրա հիմնված բիզնես․ նորարարությունների առանցքը թվային դարաշրջանում» պանելային քննարկմանը, որը դիտարկել է, թե ինչպես է ԱԲ-ն, ընկերություններին թվային դարաշրջանում բարգավաճելու գործիքներ տալով, փոխում ամեն ինչ՝ հաճախորդների փոխգործակցությունից մինչև գործառնական արդյունավետություն:
Ամպային տեխնոլոգիաներն իսկապես անհրաժեշտ են արհեստական բանականության զարգացման համար: Բայց կա հակառակը. ԱԲ-ն, իր հերթին, նույնպես ձևավորում է ամպային հաշվարկներ:
Ծախսերի օպտիմալացում. Նախ, ինչպես նշեց Մայլս Ուորդը, ԱԲ-ն օգնում է օպտիմալացնել ամպային լուծումների ծախսերը:
«Պատկերացրեք մի ընկերություն, որի թիմն աշխատում է երկուշաբթիից ուրբաթ, բայց ճաշի կամ տոների համար ընդմիջումներով։ Ավանդական համակարգիչները պարզապես պարապ են մնում, երբ չեն օգտագործվում, սակայն ԱԲ-ն կարող է ավտոմատ կերպով ապահովել այդ ընկերության մասնագետներին աշխատանքային ժամերին անհրաժեշտ ամպային հաշվողական հզորությամբ և անջատել այդ ծառայությունները, երբ դրանք չեն օգտագործվում: Քանի որ ամպային ծառայություններն օգտագործում են ռեսուրսներ ամեն պահի ճիշտ այնքան, որքան անհրաժեշտ է, այս մոտեցումն օգնում է միջոցներ խնայել»,- պարզաբանեց Մայլսը։
Գործընկեր. Ամպային ենթակառուցվածքում ԱԲ դերի կարևորագույն դերերից մեկը Մայլս Ուորդը համարում է համագործակցելու կարողությունը: Ի տարբերություն մարդ-աշխատակիցների, ԱԲ-ն չի հոգնում, ընդմիջում չի անում և չի սխալվում հոգնածության պատճառով: Օրինակ, Google Cloud-ի Gemini համակարգը կարող է իրական ժամանակում առաջարկներ տրամադրել համակարգի դիզայնի բարելավման և ծախսերի օպտիմալացման համար, երբեմն նույնիսկ առաջարկելով լուծումներ, որոնք մարդ-ծրագրավորողները չէին էլ քննարկի: ԱԲ-ի և մարդկանց միջև այս համագործակցությունը արագացնում է զարգացումն ու նորարարությունը և թույլ է տալիս ընկերություններին ավելի արդյունավետ կերպով իրագործել ժամանակակից լուծումները:
«Մենք՝ մեր թիմով դա մեր մաշկի վրա զգացինք հենց անցյալ շաբաթ: Մենք արդեն գրել էինք ԱԲ հավելվածը տեղակայելու կոդը, և այն լավ էր աշխատում: Բայց երբ այն անցկացրինք Gemini համակարգի միջոցով, առաջարկ ստացանք, որը զգալիորեն նվազեցրեց մեր ծախսերը: Դա ոչ ավանդական նախագծում էր, բայց շատ արդյունավետ: Չհոգնող, միշտ հասանելի, ընդմիջման կարիք չունեցող գործընկեր ունենալն աներևակայելի հզոր բան է նորարար լուծումներ գտնելու համար», - ասաց Ուորդը:
Վաճառք. Մեկ այլ ոլորտ, որտեղ ԱԲ-ն ազդեցություն է թողնում, վաճառքն է և խորհրդատվությունը: SADA-ի թիմը մշակել է Sales Discovery կոչվող գործիքը, որն օգնում է վաճառքի թիմերին՝ ինչպես ընկերության ներսում, այնպես էլ այլ նախագծերում, որտեղ անհրաժեշտ է ապրանքներ կամ ծառայություններ վաճառել: Գործիքը, ինչպես նկարագրեց Մայլս Ուորդը, օգտագործում է ԱԲ՝ հաճախորդների հարցերին պատասխանելու, նրանց կարիքներն ու խնդիրները հասկանալու համար։ Այսպիսի համակարգն արագացնում է վաճառքի գործընթացը և երաշխավորում, որ հաճախորդները ստանան ճշգրիտ և ժամանակին տեղեկություն, իսկ վաճառքի մասնագետներն ազատվեն այս ամբողջ տեղեկությունը ձեռքով որոնելու պարտականությունից:
ԱԲ-ն նաև օգնում է տարբեր բաժինների մասնագետներին՝ ավտոմատացնելով բարդ փաստաթղթերի ստեղծումը, ինչպիսիք են աշխատանքի նկարագրությունները և առաջարկների հարցումների պատասխանները (RFP): Այս հնարավորությունները խնայում են ժամանակը և թիմերը դարձնում ավելի արդյունավետ՝ թույլ տալով նրանց կենտրոնանալ ռազմավարական խնդիրների վրա:
Մայլս Ուորդը Google Distributed Cloud-ը համարում է ամպային հաշվարկների ոլորտում ամենախոստումնալից նոր տեխնոլոգիաներից մեկը։ Տեղաբաշխված ամպը թույլ է տալիս ընկերություններին տեղադրել իրենց մասնավոր ամպային ենթակառուցվածքը, որը կպահպանի հանրային ամպի արագությունն ու ճկունությունը:
«Google-ի ամպային ենթակառուցվածքից օգտվելը նման է գեղեցիկ մեքենա վարձելուն՝ առանց այն գնելու հնարավորության: Google Distributed Cloud-ը փոխում է այդ ամենը և բացում «մեքենա գնելու» հնարավորությունը։ Այժմ հաճախորդները կարող են ստանալ իրենց սեփական ամպը, որտեղ ցանկանում են, նույնիսկ Հայաստանում: Դրա համար պահանջվում են ընդամենը չորս կանգնակ համակարգիչներ, և Google-ը տրամադրում է ամբողջ ծրագրակազմը: Ծրագրի տեղադրումից հետո օգտատերն ստանում է առանձնացված ամպային համակարգ, որը կարգավորումից հետո երբեք չի միանում Google-ի ցանցին, այլ աշխատում է այնպես, ինչպես մեծ հանրային ամպը»,- ասաց Մայլսը։
Մեկ այլ խոստումնալից ամպային տեխնոլոգիա Ուորդը Vertex AI-ն է համարում՝ Google-ի ԱԲ հավելվածներ ստեղծելու հարթակը: Եթե Google Cloud-ը ընդհանուր հավելվածներ ստեղծելու հարթակ է, ապա Vertex AI-ը նման է ամպի Google Cloud-ում: Այն ներառում է ԱԲ հետ կապված առաջադրանքների համար անհրաժեշտ բոլոր գործիքները, ներառյալ լրացված որոնման գեներացիան (RAG), որը միավորում է ԱԲ-ն և իրական ժամանակում բազաներից տվյալների ստացումը՝ ավելի ճշգրիտ պատասխանների համար:
Հետաքրքիր է, որ Մայլս Ուորդը Google-ում աշխատելու ընթացքում ներգրավված էր ինչպես Google Distributed Cloud-ի, այնպես էլ Vertex AI-ի նախագծման և զարգացման մեջ:
Մոլորությունների մասին. ի՞նչ դեռ չգիտեն ընկերությունները ամպ տեղափոխվելու մասինԹեև ամպային տեխնոլոգիաները վերջին տարիներին լայն տարածում են գտել, դրանց մասին թյուր պատկերացումները դեռևս բավականին տարածված են նույնիսկ ՏՏ ոլորտի ընկերությունների շրջանում:
Ամենատարածված սխալ պատկերացումներից մեկը Մայլս Ուորդը համարում է այն, որ ամպ տեղափոխվելն այսօր նույնքան դժվար է, որքան 3-5 տարի առաջ: SADA-ն արդեն երկար տարիներ օգնում է ընկերություններին տեղափոխվել ամպ և օպտիմալացնել իրենց ամպային լուծումները:
«Նախկինում դա իսկապես դժվար էր, հատկապես հին տեխնոլոգիաների դեպքում: Եթե դուք աշխատում եք 10, 15 կամ նույնիսկ 20 տարվա ծրագրային ապահովմամբ, ապա այդ հավելվածներն ամպ տեղափոխելու համար դեռևս որոշակի ջանքեր կպահանջեն: Բայց ընդհանուր առմամբ գործընթացն այսօր դարձել է շատ ավելի արագ, ավելի կանխատեսելի և պարզ: Այժմ մենք կարող ենք առաջարկել ֆիքսված դրույքով պայմանագրեր, այսինքն՝ ես կարող եմ ձեզ նախապես ասել, թե որքան ժամանակ կպահանջվի ձեր տվյալներն ամպ տեղափոխելու համար և որքան կարժենա: Սա մեծ տեղաշարժ է երեք-չորս տարի առաջվա համեմատ»,- պարզաբանեց SADA-ի գլխավոր տեխնիկական տնօրենը։ Նա նշեց, որ միայն վերջին երկու տարում SADA-ն ավելի քան 1200 ընկերությունների է օգնել տեղափոխվել ամպ։
SADA-ի թիմի մի մասն, ի դեպ, գտնվում է Հայաստանում. նրանք անցել են վերապատրաստում և աշխատում են հաճախորդների նախագծերի վրա՝ համագործակցելով արտերկրի գործընկերների հետ:
«Ես շատ վստահ եմ մեր տեղական թիմի վրա. նրանք իսկապես համաշխարհային մակարդակի աշխատանք են կատարում, ճիշտ ինչպես մենք անում ենք տեխնոլոգիական աշխարհի սրտում՝ Սան Ֆրանցիսկոյում: Մեր գործը կապված է 962 տարբեր տեխնիկական հմտությունների հետ: Յուրաքանչյուր միգրացիա պահանջում է հմտությունների յուրահատուկ համադրություն հաջողակ լինելու համար: Դա բարդ գործընթաց է․ ծրագրային ապահովման յուրաքանչյուր մաս, սարքավորում և ամպային համակարգ պահանջում է փորձագետներ, որոնք հասկանում են ոչ միայն, թե ուր եք տեղափոխվում (Google Cloud), այլև որտեղից եք տեղափոխվում: Մենք ապահովում ենք, որ մեր թիմերը վերապատրաստվեն բարձր մակարդակով հանդես գալու համար, և մեր Հայաստանի թիմն ամենաառաջադեմներից մեկն է: Նրանք ամեն օր աշխատում են նոր ընկերությունների հետ՝ Google Cloud-ից լիարժեք օգտվելու համար»,- ասաց Ուորդը:
Հետևեք NEWS.am Tech-ին Facebook-ում և Twitter-ում