Լոգիստիկայի խնդիրը Հայաստանի նման երկրի համար ամենաարդիականներից մեկն է. փակ սահմաններ, ծովային ելքի բացակայություն և բարդ տեղանքը յուրաքանչյուր առաքումը վերածում են ռազմավարական խնդրի: Հենց այդ պատճառով Հայաստանում ի հայտ են գալիս նախաձեռնություններ, որոնք կենտրոնացած են այնպիսի լուծումներ գտնելու վրա, որոնք ոչ միայն կհաղթահարեն այդ սահմանափակումները, այլև Հայաստանը կվերածեն Հարավային Կովկասի լիարժեք լոգիստիկ կենտրոնի:

Հայաստանը որպես տարածաշրջանի ապագա լոգիստիկ հանգույց. Ի՞նչ է սպասվում E-Logi Fest25-ից

Մայիսի 30-ից հունիսի 1-ը Հայաստանում տեղի կունենա E-Logi Fest25-ը՝ միջազգային բազմաշերտ միջոցառում, որը նպատակ է հետապնդում ցույց տալ, որ նույնիսկ փակ սահմանների, ծովային ելքի բացակայության և բարդ տեղանքի պայմաններում Հայաստանը կարող է և պետք է դառնա Հարավային Կովկասի լոգիստիկ կենտրոն: Ֆորումի նախաձեռնողները համոզված են, որ այս մարտահրավերը պահանջում է ոչ միայն նոր լուծումներ, այլև համագործակցության նոր մոդել՝ պետության, բիզնեսի և բարձր տեխնոլոգիական սեկտորի միջև:

Ինչպես նշում է միջոցառման համահիմնադիր և տնօրեն Քրիստինե Երեմյանը, E-Logi Fest25-ը նախագծված է որպես համապարփակ հարթակ, որը միավորում է մի քանի ձևաչափ՝ ցուցահանդես, մասնագիտական կոնֆերանս և հեքըթոն: Նման մոտեցումը կոչված է ոչ միայն քննարկելու լոգիստիկայի և էլեկտրոնային առևտրի արդի խնդիրները, այլև մշակելու կոնկրետ զարգացման ուղիներ, որոնք կարող են Հայաստանը հարմարեցնել համաշխարհային տնտեսության ժամանակակից իրողություններին:

Կոնֆերանս. Հիմնական մարտահրավերներ և ռազմավարություններ

Մայիսի 30-ին և 31-ին կանցկացվի երկօրյա կոնֆերանս, որտեղ կքննարկվեն լոգիստիկայի, էլեկտրոնային առևտրի և ոլորտի թվայնացման համակարգային հարցեր: Քննարկումներին կմասնակցեն միջազգային կազմակերպությունների ներկայացուցիչներ, ոլորտի առաջատար ընկերությունների ղեկավարներ, հայկական լոգիստիկ և առևտրային օպերատորներ, ինչպես նաև Էկոնոմիկայի և Բարձր տեխնոլոգիական արդյունաբերության նախարարությունների պաշտոնյաներ:

Օրակարգը ներառում է ինչպես ներքին մարտահրավերներ՝ ենթակառուցվածքներ, կարգավորում, տեխնոլոգիական խոչընդոտներ, այնպես էլ արտաքին տնտեսական ինտեգրման հարցեր:

Ցուցահանդես. Պրակտիկա և լուծումներ

Փառատոնի երկրորդ կարևոր բաղադրիչը ցուցահանդեսն է, որտեղ ընկերությունները կներկայացնեն տեխնոլոգիական և կազմակերպչական լուծումներ՝ մատակարարումների, պահեստավորման, թվային առևտրի և լոգիստիկ շղթաների ավտոմատացման ոլորտներում: Մասնակցությունը հաստատել են ինչպես տեղական խաղացողները, այնպես էլ միջազգային բրենդները: Նպատակն է ցույց տալ, թե ինչպես կարող են նորարարություններն արդեն այսօր փոխել շուկան և ստեղծել նոր հնարավորություններ՝ նույնիսկ համաշխարհային նավահանգիստներին և տրանսպորտային միջանցքներին սահմանափակ հասանելիության պայմաններում:

Հեքըթոն. Անօդաչու սարքեր գործողության մեջ

Հատուկ հետաքրքրություն է առաջացնում հեքըթոնը, որի ընթացքում հայկական տեխնոլոգիական ընկերությունների թիմերը 24 ժամվա ընթացքում կմշակեն ապրանքների առաքման հետ կապված լուծումների նախատիպեր՝ օգտագործելով անօդաչու սարքեր: Ծրագրի այս մասը ընդգծում է ֆորումի գործնական ուղղվածությունը՝ ոչ միայն քննարկում, այլև իրականացմանը պատրաստ գործիքների մշակում:

Համագործակցության ստորագրություն. Լոգիստիկա + տեխնոլոգիաներ

Լոգիստիկայի և բարձր տեխնոլոգիաների սիներգիայի կարևորությունը ընդգծվեց Հայաստանի առաջատար տեխնոլոգիաների ձեռնարկությունների միության (UATE) և E-Logi Fest25-ի կազմակերպիչների միջև փոխըմբռնման հուշագրի ստորագրությամբ: Փաստաթուղթը ստորագրել են DigiTec-ի տնօրեն և UATE-ի միջոցառումների ղեկավար Խաչատուր Հակոբյանը և փառատոնի կողմից՝ Քրիստինե Երեմյանը: Կողմերը պայմանավորվել են համատեղ աշխատել երկրում լոգիստիկ և տեխնոլոգիական էկոհամակարգերի փոխգործակցության խորացման ուղղությամբ:

Տարածաշրջանային նշանակություն և հավակնություններ

E-Logi Fest25-ի առանցքային առանձնահատկությունն իր միջազգային մասշտաբն է: Սպասվում է տարբեր երկրներից փորձագետների, ընկերությունների և հյուրերի մասնակցություն, ինչը ֆորումը դարձնում է ոչ միայն ազգային նախաձեռնություն, այլև ոլորտի համար կարևոր տարածաշրջանային գրավչության կետ:
Միջոցառման վերջնական նպատակն է նպաստել Հայաստանում ժամանակակից, կայուն և ինտեգրված լոգիստիկ միջավայրի ձևավորմանը, խթանել թվային լուծումների ներդրումը և ամրապնդել կապերը բիզնեսի, գիտության և պետության միջև: «Մենք հավատում ենք, որ Հայաստանն ունի ներուժ՝ վերածվելու Հարավային Կովկասի լիարժեք լոգիստիկ կենտրոնի», - վստահ է Երեմյանը:

UATE-ն և E-Logi Fest25-ը միավորում են ջանքերը

Նման վերափոխման հանդեպ հավատը միավորում է ոչ միայն տրանսպորտային ոլորտի ներկայացուցիչներին, այլև տեխնոլոգիական համայնքին: Ի հաստատումն դրա՝ միջոցառումից առաջ ստորագրվեց փոխըմբռնման հուշագիր UATE-ի և E-Logi Fest25-ի կազմակերպիչների միջև: Փաստաթուղթը ստորագրել է Քրիստինե Երեմյանը, իսկ UATE-ի կողմից՝ կազմակերպության միջոցառումների ղեկավար, DigiTec-ի գործադիր տնօրեն Խաչատուր Հակոբյանը:

«UATE-ն լիովին կիսում է E-Logi Fest25-ի կազմակերպիչների հայեցակարգը և միանում է միջոցառմանը՝ տրամադրելով բոլոր հասանելի ռեսուրսները: Ռեսուրսներ ասելով՝ ես նկատի ունեմ ինչպես մեր մասնագիտական համայնքը, որն այսօր միավորում է մոտ 250 ՏՏ ընկերություն, այնպես էլ Միության կազմակերպչական ներուժը: Իր մասշտաբով և բովանդակությամբ E-Logi Fest25-ը Հայաստանում նման մակարդակի առաջին միջոցառումն է, և հենց որ իմացանք դրա մասին, անմիջապես որոշեցինք դառնալ դրա մասնակից՝ առաջարկելով համակողմանի աջակցություն», - նշել է նա: