Նախընտրելի
Ժամանակակից աշխարհում սմարթֆոնի մարտկոցի աշխատանքի տևողությունը կարևոր է ինչպես երբեք. ոչ ոք չի ուզում, որ հեռախոսն անսպասելիորեն անջատվի երկարատև թռիչքի, կարևոր հանդիպման կամ բնության գրկում հանգստի ընթացքում։
NEWS.am Tech-ի խմբագրությունը կիսվում է խորհուրդներով, որոնք կօգնեն երկարացնել սմարթֆոնի մարտկոցի կյանքը։
1. Կարգավորեք էկրանը
Էկրանը ձեր սմարթֆոնի էներգիայի գլխավոր «սպառողներից» մեկն է։ Ահա թե ինչպես այն կարելի է դարձնել ավելի խնայող.
- Նվազեցրեք պայծառությունը. Կարգավորեք պայծառությունն այնպես, որ այն համապատասխանի լուսավորության պայմաններին։ Ավելի ցածր պայծառությունը նշանակում է մարտկոցի ավելի երկար աշխատանք։
- Կարգավորեք էկրանի անջատման ժամանակը. Ընտրեք ավելի կարճ ժամանակահատված, որպեսզի էկրանը չմնա միացված, երբ այն չեք օգտագործում։
- Անցեք մուգ ռեժիմի. Եթե ձեր սմարթֆոնը աջակցում է այս գործառույթը, OLED էկրաններով սարքերում մուգ ռեժիմը կարող է նվազեցնել էներգիայի սպառումը, քանի որ ավելի քիչ պիքսելներ են ակտիվանում։
2. Կառավարեք կապի գործառույթները
Անլար կապի տեխնոլոգիաները նույնպես կարող են արագ լիցքաթափել ձեր մարտկոցը.
- Wi-Fi կամ բջջային ինտերնետ. Wi-Fi-ն սովորաբար ավելի քիչ էներգիա է օգտագործում, քան բջջային ինտերնետը, բայց այն պետք է անջատել, երբ անհրաժեշտ չէ, որպեսզի հեռախոսը չփորձի անընդհատ որոնել ցանցեր։
- Bluetooth և տեղակայության ծառայություններ. Միացրեք միայն անհրաժեշտության դեպքում, քանի որ Bluetooth-ի մշտական օգտագործումը, հատկապես էներգատար սարքերի հետ, կարող է արագ լիցքաթափել մարտկոցը։
- Թռիչքի ռեժիմ. Եթե գտնվում եք տարածքում, որտեղ կապի ազդանշանը թույլ է, միացրեք թռիչքի ռեժիմը. այդպես հեռախոսը չի ծախսի էներգիա ցանց որոնելու վրա։
3. Կառավարեք հավելվածները
Որոշ հավելվածներ հաճախ աննկատ լիցքաթափում են հեռախոսը։
- Փակեք ավելորդ հավելվածները. Չնայած ժամանակակից օպերացիոն համակարգերը դա կարող են անել ինքնաբերաբար, դուք նույնպես կարող եք փակել այն ծրագրերը, որոնք չեք օգտագործում։
- Ստուգեք հավելվածների թույլտվությունները. Համոզվեք, որ հավելվածները չեն օգտագործում ձեր տեղադրության տվյալները կամ չեն աշխատում ֆոնային ռեժիմում՝ առանց անհրաժեշտության։
- Թարմացրեք հավելվածները. Թարմացումները հաճախ բերում են օպտիմալացման, ինչը կարող է նվազեցնել էներգիայի սպառումը։
4. Մի անտեսեք համակարգի թարմացումները
Թարմացրեք օպերացիոն համակարգը. Թարմացումներում հաճախ ներառվում են մարտկոցի աշխատանքն օպտիմալացնելու լուծումներ, սակայն թարմացումից հետո հետևեք, թե ինչպես է փոխվում լիցքավորման արագությունը, քանի որ երբեմն կարող են լինել նաև բացասական ազդեցություններ։
5. Պահպանեք մարտկոցը առողջ
- Մի թողեք, որ լիցքը հասնի 0% կամ 100%-ի. Ժամանակակից լիթիում-իոնային մարտկոցները չեն սիրում լիարժեք լիցքաթափում կամ լիցքավորում։ Լավագույնն է պահել լիցքը 20%-80% միջակայքում։
- Օգտագործեք ճիշտ լիցքավորիչ. Խորհուրդ է տրվում օգտագործել այն լիցքավորիչը, որը ներառված է հեռախոսի հետ, կամ տեխնիկական բնութագրերով համարժեք տարբերակ։ Արագ լիցքավորումը հարմար է, բայց դրա մշտական օգտագործումը կարող է վնասել մարտկոցը։
- Միացրեք էներգախնայողության ռեժիմները. Շատ սմարթֆոններ ունեն ներկառուցված գործառույթներ լիցքը խնայելու համար, օգտվեք դրանցից, երբ մարտկոցը մոտենում է նվազագույնին։
6. Կրճատեք ֆոնային ակտիվությունը
- Անջատեք ֆոնային թարմացումները. Կարգավորեք հավելվածները այնպես, որ դրանք չթարմացվեն ինքնուրույն։
- Կառավարեք ծանուցումները. Թույլատրեք ծանուցումներ միայն անհրաժեշտ հավելվածների համար, քանի որ յուրաքանչյուր ծանուցում էներգիա է պահանջում։
7. Պահպանեք հեռախոսի ֆիզիկական վիճակը
- Հետևեք ջերմաստիճանին. Չթողնեք հեռախոսը արևի տակ կամ ցուրտ միջավայրում, քանի որ ծայրահեղ ջերմաստիճանները վնասում են մարտկոցին։
- Ընտրեք ճիշտ պաշտպանիչ պատյան. Համոզվեք, որ պատյանը չի խանգարում հեռախոսին «շնչել», որպեսզի այն չգերտաքանա։
Այս խորհուրդները կօգնեն երկարացնել ձեր սմարթֆոնի մարտկոցի աշխատանքը և խուսափել անհարմարություններից, երբ ձեզ ամենաշատն է անհրաժեշտ կապի մեջ մնալ։
