Մինչև վերջերս 200 ՄՊ տեսախցիկները համարվում էին տեխնոլոգիական մեծ առաջընթաց։ Նման սենսորներով սմարթֆոնները հեղեղել էին շուկան՝ խոստանալով աներևակայելի մանրամասնությամբ լուսանկարներ։ Սակայն ընդամենը մի քանի տարի անց արտադրողները գրեթե ամբողջությամբ հրաժարվեցին այս տեխնոլոգիայից՝ վերադառնալով ավանդական 50 ՄՊ սենսորներին։ Ինչու՞։ Փորձենք հասկանալ:

200 ՄՊ տեսախցիկների թերությունները

Թղթի վրա 200 ՄՊ տեսախցիկները տպավորիչ են թվում, բայց գործնականում դրանք բախվեցին մի շարք խնդիրների.

  • Մանր պիքսելներ։ Սմարթֆոնների սենսորների չափը սահմանափակ է, իսկ որքան շատ են մեգապիքսելները, այնքան փոքր են առանձին պիքսելները։ Սա նվազեցնում է տեսախցիկի լույսի ընկալման կարողությունը և վատացնում նկարահանման որակը հատկապես թույլ լուսավորության պայմաններում։
  • Բարդ պատկերի մշակման գործընթաց։ Փոքր պիքսելների խնդիրը մեղմելու համար կիրառվում է պիքսելային խմբավորման (pixel binning) տեխնոլոգիան։ 50 ՄՊ տեսախցիկների դեպքում այս գործընթացը համեմատաբար հեշտ է, բայց 200 ՄՊ սենսորներում այն իրականացվում է մի քանի փուլով, ինչը դանդաղեցնում է նկարահանումը և երբեմն վատացնում լուսանկարների որակը։
  • Ֆոկուսի և դինամիկ տիրույթի խնդիրներ։ Ուլտրաբարձր լուծաչափով տեսախցիկները ոչ միշտ են լավ արձագանքում շարժումներին և հաճախ ունենում են սահմանափակ դինամիկ տիրույթ, ինչը հանգեցնում է վատ լուսավորված կամ գերհագեցած հատվածների։
  • Կախվածություն իդեալական լուսավորությունից։ Թույլ կամ անհավասար լուսավորության պայմաններում 200 ՄՊ տեսախցիկը հաճախ զիջում է 50 ՄՊ ավելի պարզ մոդուլներին։

Այս ամենի արդյունքում արտադրողները որոշեցին հրաժարվել մեգապիքսելային մրցավազքից՝ ընտրելով ավելի հավասարակշռված լուծումներ։ Սակայն կա մեկ խոշոր արտադրող, որը դեռ հավատարիմ է այս տեխնոլոգիային։

Ինչո՞ւ Samsung-ը շարունակում է 200 ՄՊ տեսախցիկների օգտագործումը

Կորեական Samsung ընկերությունը շարունակում է իր Galaxy Ultra ֆլագմանային մոդելներում օգտագործել 200 ՄՊ սենսորներ։ Դրա հիմնական պատճառները կապված են մարքեթինգի և Samsung-ի սեփական սենսորների հնարավորությունների հետ.

  • Բարձրորակ թվային խոշորացում։ 200 ՄՊ սենսորը, համակցված սենսորի ներսում կատարվող խոշորացման տեխնոլոգիայի հետ, թույլ է տալիս 2-3× մեծացում՝ առանց լուրջ որակի կորստի։
  • Հզոր հետմշակում։ Samsung-ի ֆլագմանային սմարթֆոնները լայնորեն օգտագործում են ծրագրային ալգորիթմներ, որոնք բարելավում են լուսանկարները՝ մեղմելով մեծ սենսորների թերությունները։

200 ՄՊ տեսախցիկների ապագան

Չնայած դրանց նվազող ժողովրդականությանը, 200 ՄՊ տեսախցիկները դեռ կարող են գտնել իրենց տեղը շուկայում։ Օրինակ, նման սենսորները կարող են ավելի օգտակար լինել ոչ թե հիմնական տեսախցիկում, այլ հեռաֆոտո (telephoto) ոսպնյակներում։ Այս դեպքում օպտիկական և թվային խոշորացումների համադրությունը կարող է ապահովել բարձրորակ պատկերներ մեծ հեռավորության վրա։

Սակայն առօրյա նկարահանման համար 50 ՄՊ սենսորները մնում են ավելի հավասարակշռված տարբերակ, ուստի այսօր շուկայի մեծ մասը հենց դրանց է նախընտրում։