Gallup. ԱԲ-ն անտեսող աշխատակիցները կրճատման տակ հայտնվելու ռիսկի են դիմում

Mercer խորհրդատվական ընկերության կողմից հարցված գրեթե բոլոր կորպորատիվ ղեկավարները ակնկալում են, որ արհեստական բանականությունը երկու տարվա ընթացքում կհանգեցնի իրենց ընկերություններում աշխատատեղերի կրճատման։ Այսպիսի եզրակացության են եկել Mercer-ի «Տաղանդների կառավարման գլոբալ միտումներ — 2026» զեկույցի հեղինակները, ինչն ակնառու կերպով արտացոլում է աճող մտահոգությունն այն մասին, թե ինչպես է ԱԲ-ն փոխում աշխատաշուկան այն պայմաններում, երբ արտադրողականության վրա դրա ունեցած ազդեցության իրական տվյալները դեռևս մնում են հակասական, գրում է Gizmodo-ն։

Հետազոտությունը, որը հիմնված է ամբողջ աշխարհից 825 թոփ-մենեջերների և 1650 HR-տնօրենների պատասխանների վրա, պարզել է, որ ղեկավարների 99%-ը ակնկալում է անձնակազմի թեկուզ մասնակի կրճատում մինչև 2028 թվականը։ 98%-ը հայտարարել է, որ դիտարկում է կազմակերպչական կառուցվածքների փոփոխություններ նույն ժամանակահատվածում, իսն 65%-ը կարծում է, որ աշխատակիցների 11%-ից մինչև 30%-ը ԱԲ-ի ներդրման պատճառով կտեղափոխվի այլ պաշտոնների կամ կանցնի վերապատրաստում։

Երիտասարդ մասնագետներն ամենից շատն են տուժում

22-ից 27 տարեկան երիտասարդ մասնագետները գտնվում են ամենամեծ ռիսկի գոտում. ընկերություններն ավտոմատացնում են վարչական, վերլուծական և օպերացիոն առաջադրանքները, որոնք ավանդաբար ծառայել են որպես մեկնարկային կետ բուհերի վերջին շրջանավարտների կարիերայի համար, գրում է Tomshardware-ը։

Oliver Wyman-ի առանձին հարցումը ցույց է տվել, որ կրտսեր պաշտոնները կրճատելու մտադրություն ունեցող գլխավոր տնօրենների (CEO) մասնաբաժինը մեկ տարում կտրուկ աճել է՝ 17%-ից հասնելով 43%-ի, ընդ որում ղեկավարների 33%-ը վերակողմնորոշում է կադրային կազմը դեպի միջին օղակի պաշտոններ։ Արդեն իսկ աշխատող անձնակազմի զանգվածային ազատումների փոխարեն, շատ ընկերություններ պարզապես փակում են նոր մասնագետների հոսքը կարիերայի մեկնարկային փուլում։

AI-ից հրաժարվելը դառնում է աշխատանքից ազատման ռիսկի գործոն

Gallup-ի հարցումը, որն ընդգրկել է ԱՄՆ-ում ավելի քան 23,000 աշխատողի և հրապարակվել է 2026 թվականի հունիսին, ցույց է տվել. տեխնոլոգիական ոլորտի այն աշխատակիցները, ովքեր ԱԲ-ից օգտվում են ամսական մեկ անգամից պակաս, ունեն աշխատանքից ազատվելու 18% կանխատեսվող հավանականություն, ինչը երեք անգամ գերազանցում է AI-ն պարբերաբար կիրառողների 6% ռիսկը, գրում է AI weekly-ն: 

Ինչպես հայտնում է The Straits Times-ը, այս տարբերությունը պահպանվում է նույնիսկ հաշվի առնելով տարիքը, կրթության մակարդակը և զբաղվածության սեկտորը։ Տեխնոլոգիական ոլորտից դուրս ԱԲ-ի հազվադեպ օգտագործումը նույնպես մեծացնում է աշխատանքից ազատվելու ռիսկը, սակայն այնտեղ տարբերությունն այդքան ընդգծված չէ։