Չինաստան — Հայաստան. Ուղիղ չվերթներ և տարեկան մինչև 90 հազար զբոսաշրջիկի աճի հավակնություններ

Ընդամենը մեկ տարում 33 հազարից հասնելով 45 հազար զբոսաշրջիկի՝ հենց այսպիսի աճ է գրանցել Չինաստանից Հայաստան եկող հոսքը նախորդ տարի։ Այժմ նպատակն էլ ավելի հավակնոտ է. ուղիղ ավիահաղորդակցության գործարկման դեպքում երկիրն ակնկալում է այդ ցուցանիշը հասցնել տարեկան 80–90 հազար մարդու՝ չինական ուղղությունը դարձնելով զբոսաշրջային աճի հիմնական շարժիչ ուժերից մեկը։

Այն մասին, թե ինչ քայլեր են արդեն ձեռնարկվում այդ նպատակին հասնելու համար, ինչպես կարող են ուղիղ չվերթները և չինական վճարային համակարգի ներդրումն ազդել շուկայի վրա, ինչպես նաև ինչ լրացուցիչ հնարավորություններ է տեսնում Հայաստանը տարածաշրջանային համագործակցության և ներքին ենթակառուցվածքների զարգացման մեջ, NEWS.am Tech-ի հետ զրույցում պատմել է Զբոսաշրջության կոմիտեի նախագահ Լուսինե Գևորգյանը։

Ուղիղ չվերթը՝ որպես աճի հիմնական գործոն

Ներկայումս հայկական ավիաընկերություններից մեկը բանակցություններ է վարում չինական պետական ավիափոխադրողների հետ նոր ուղղություն բացելու շուրջ։ Ընկերության անունն առայժմ չի հրապարակվում, քանի որ գործընթացը գտնվում է բանակցային փուլում։ Եթե դրանք հաջողությամբ պսակվեն, Չինաստանի մի քանի խոշոր զբոսաշրջային և տնտեսապես զարգացած քաղաքներից կարող են ուղիղ չվերթներ բացվել դեպի Հայաստան։

Ըստ Լուսինե Գևորգյանի՝ փորձը ցույց է տալիս, որ ուղիղ չվերթի առկայությունն անմիջականորեն ազդում է երկիր այցելելու զբոսաշրջիկի որոշման վրա։ Սա հաստատում են նաև այլ ուղղությունները։ Այսպես, 2025 թվականի նոյեմբերից բացվել է Երևան – Ռումինիա – Երևան նոր ավիահաղորդակցությունը։ 2024 թվականին Հայաստան են այցելել 2 500 զբոսաշրջիկ այդ ուղղությունից, իսկ 2025 թվականին՝ արդեն 5 000, այսինքն՝ ցուցանիշը կրկնապատկվել է։

Հունվար ամսվա դինամիկան էլ ավելի խոսուն է.

• 2024 թվականի հունվար — մոտ 120 զբոսաշրջիկ,
• 2025 թվականի հունվար — 200 զբոսաշրջիկ,
• 2026 թվականի հունվար — արդեն 800 զբոսաշրջիկ։ Սա յոթնապատիկ աճ է 2024 թվականի համեմատ։

Այս բոլոր տվյալները հիմք են տալիս ենթադրելու, որ Չինաստանից Հայաստան եկող զբոսաշրջիկների թիվը նույնպես կաճի։ 2024 թվականին Հայաստան է այցելել 33 հազար չինացի զբոսաշրջիկ, իսկ 2025 թվականին՝ արդեն 45 հազար։ Աճը կազմել է ավելի քան 12 հազար մարդ կամ մոտ 30 տոկոս։ Ուղիղ չվերթի առկայության դեպքում ակնկալվում է զբոսաշրջային հոսքի ավելացում մինչև տարեկան 80–90 հազար մարդ, նշել է Լուսինե Գևորգյանը։

WeChat-ը Հայաստանում. կարևոր ազդակ չինական շուկայի համար

2026 թվականին Հայաստանում ներդրվել է WeChat վճարային համակարգը։ Սա կարևոր քայլ է՝ հաշվի առնելով, որ եվրոպական և ամերիկյան բանկային քարտերը չինական շուկայում սահմանափակ են օգտագործվում։ Տարբեր ծառայությունների համար անմիջապես հեռախոսով վճարելու հնարավորությունը հարմարավետ պայմաններ է ստեղծում չինացի զբոսաշրջիկների համար և բարձրացնում է Հայաստանի գրավչությունը՝ որպես այցելության արժանի երկիր։

Այսպիսով, ձևավորվում է ոչ միայն տրանսպորտային, այլև ֆինանսական ենթակառուցվածք չինական ուղղությամբ աշխատելու համար, նշել է Լուսինե Գևորգյանը։

Հայաստանը՝ որպես «չբացահայտված» ուղղություն

Հայաստանում շատերին թվում է, թե երկիրը շատ հայտնի է աշխարհում։ Իրականում դա այնքան էլ այդպես չէ, և միջազգային տարբեր զբոսաշրջային ցուցահանդեսների մասնակցությունը հաստատում է դա։ «Հայաստանը շատ առումներով մնում է չբացահայտված ուղղություն։ Սա պահանջում է ակտիվ աշխատանք առաջխաղացման ուղղությամբ, բայց միաժամանակ կարող է լինել առավելություն»,- նշել է Գևորգյանը։

Նրա խոսքով՝ ըստ ՄԱԿ-ի զբոսաշրջության վերջին տվյալների, ճանապարհորդներն ավելի ու ավելի հաճախ են փնտրում նոր ուղղություններ, քանի որ հոգնում են խոշոր և վաղուց հայտնի քաղաքներից և ձգտում են նոր տպավորությունների։ Աճում է հետաքրքրությունը էկոլոգիապես մաքուր և կայուն զբոսաշրջության նկատմամբ։ Հայաստանը կարող է առաջարկել հենց հանգստի նման ձևաչափ։ Այսպես, երկրի մարզերում կայուն զբոսաշրջության՝ քայլարշավային, հեծանվային և արկածային ուղղությունների զարգացման զգալի ներուժ կա։ Որպես գինեգործական տարածաշրջաններ դիտարկվում են նախևառաջ Արագածոտնը և Վայոց Ձորը։ Ջերմուկն ու Դիլիջանը կարող են ներկայացվել որպես առողջարանային զբոսաշրջության կենտրոններ՝ շնորհիվ բնական ռեսուրսների և համապատասխան ենթակառուցվածքների։ Գաստրոնոմիական և էնոզբոսաշրջության զարգացումը նույնպես դիտարկվում է որպես հեռանկարային ուղղություն, որը կարող է ներգրավել զբոսաշրջիկների նաև Արևելյան Ասիայից։ Սակայն ողջ ներուժը բացահայտելու համար անհրաժեշտ է ավելի ակտիվ աշխատանք երկրի միջազգային առաջխաղացման ուղղությամբ, նշել է մասնագետը։

Երկար թռիչք — երկարատև կեցություն

Իսկ ինչու՞ է Հայաստանը շահագրգռված Չինաստանից, Ճապոնիայից և այլ երկրներից զբոսաշրջիկների ներգրավմամբ։ Ինչպես նշել է մասնագետը, 8–9 ժամ տևողությամբ թռիչքներ իրականացնող զբոսաշրջիկները, որպես կանոն, նախընտրում են երկրում կամ տարածաշրջանում մնալ ավելի երկար։ Նրանք հաճախ գալիս են կազմակերպված խմբերով, իսկ խմբային զբոսաշրջությունը հյուրընկալող երկրին ավելի շատ եկամուտ է բերում, քան անհատականը։

Բացի այդ, նման ճանապարհորդները հաճախ ընտրում են տարածաշրջանային երթուղիներ. այցելում են Հայաստան, այնուհետև, օրինակ, Վրաստան։ Սա Հայաստանի համար հնարավորություն է ստեղծում դառնալ լիարժեք տարածաշրջանային խաղացող հյուրընկալության և զբոսաշրջության ոլորտում։ Զբոսաշրջիկները, ժամանելով, օրինակ, Վրաստան, կարող են շարունակել ճանապարհորդությունը դեպի Հայաստան, ապա մեկնել ավելի հեռու։

Այս հարցը, ինչպես նշել է Լուսինե Գևորգյանը, վերջերս քննարկվել է Վրաստանի էկոնոմիկայի նախարարի հետ՝ նրա Հայաստան կատարած այցի ժամանակ։ Վրացական կողմը նույնպես աջակցում է երկարատև թռիչքներով արևելյան երկրներից զբոսաշրջիկների ներգրավման նախաձեռնություններին, չէ որ դրանց թվի ավելացումը կարող է շատ օգուտներ բերել տարածաշրջանի բոլոր երկրներին։