«Հեյ, Իլո՛ն, կարո՞ղ ես վերադարձնել իմ դիզայնը»․ Մասկին մեղադրել են գրագողության մեջ

Ավստրալացի կինոռեժիսոր Ալեքս Պրոյասը, որը հայտնի է իր գիտաֆանտաստիկ «Ագռավը» (1994 թ.), «Մութ քաղաքը» (1998 թ.), «Ես ռոբոտ եմ» (2004 թ.) և «Օմենը» (2009 թ.) ֆիլմերով, ամերիկացի ձեռնարկատեր Իլոն Մասկին մեղադրել է գրագրողության մեջ, տեղեկացնում է ixbt-ը։

«Հեյ, Իլո՛ն, կարո՞ղ ես վերադարձնել իմ դիզայնը»,- սոցցանցի իր էջում գրել է Պրոյասը՝ գրառմանը կից ներկայացնելով կոլաժ, որի ձախ մասում իր ֆիլմերից տեսարաններ են, իսկ աջում Իլոն Մասկի ընկերությունների արտադրանքները, որոնք արտաքինից շատ նման են իրար։

Ռեժիսոր Մեթ Գրեյնջերը, որը «Ես ռոբոտ եմ» ֆիլմի նկարահանման հրապարակում աշխատել է որպես Պրոյասի օգնական, հավելել է. «Ես ուզում եմ նաև Իլոնին ու նրա ստեղծագործականության իսպառ բացակայությանն ասել՝ «գնա՛ գրողի ծոցը»»։

Անցյալ շաբաթ Tesla-ի մեծ շնորհանդեսի ժամանակ ներկայացվեցին Cybercab ինքնագնաց տաքսին, Optimus ռոբոտի նոր տարբերակը և Robovan մինիվենը:

Համացանցում արագ հայտնվեցին համեմատություններ «Ես ռոբոտ եմ» ֆիլմի հետ, որտեղ գլխավոր դերակատարը Ուիլ Սմիթն էր։ Նախ՝ Իլոն Մասկն ինքը իրադարձությունը կոչեց «Մենք  ռոբոտ ենք», և երկրորդ՝ Tesla-ի ռոբոտների և նոր մեքենաների դիզայնն իսկապես նման է 20 տարի առաջվա ֆիլմի ռոբոտներին և մեքենաներին, որի իրադարձությունները ծավալվում են Չիկագոյում 2035-ին։