Խաբեության ի՞նչ սխեմաներ են կիրառվում առցանց շուկաներում և ինչպե՞ս խուսափել դրանցից

Առցանց շուկաների աճող ժողովրդականությունը գրավում է բազմաթիվ խաբեբաների: Garda ընկերությունների խմբի տեղեկատվական անվտանգության բաժնի ղեկավար Վիկտոր Իևլևը Gazeta.Ru-ին պատմել է, թե որոնք են չարագործների կողմից կիրառվող խաբեության ամենատարածված սխեմաները։

Ցուցակի առաջին տեղում է ֆիշինգը: Հարձակվողները ստեղծում են կեղծ կայքեր, որոնք նման են հայտնի առցանց շուկաների կայքերին և տարբեր մեթոդներով մոլորեցնում են օգտատերերին և համոզում, որպեսզի տվյալ կեղծ հարթակում մուտքագրեն իրենց անձնական և բանկային քարտի տվյալները:

Երկրորդ ամենահաճախ կիրառվող սխեման ենթադրում է հետևյալը․ չարագործները գնորդին ուղղորդում են որևէ մեսենջեր հետագա հաղորդակցության համար և վճարման համար կեղծ հղումներ են տրամադրում: Արդյունքում միջոցները գնում են ոչ թե վաճառողի, այլ խաբեբաների հաշվին:

«Որոշ դեպքերում խաբեբաները ներկայանում են որպես վաճառողներ և հայտնում, որ ապրանքն անհասանելի է և առաջարկում են գումարը վերադարձնել ֆիշինգային կայքի միջոցով: Սա վնասում է ոչ միայն օգտատերերին, այլև խանութների հեղինակությանը»,- ասել է փորձագետը։

Խաբեբաներից պաշտպանվելու համար Իևլևը խորհուրդ է տալիս հետևել կիբեռհիգիենայի տարրական կանոններին։ Մասնավորապես,

• օգտագործել ուժեղ գաղտնաբառ,
• չկցել աշխատավարձի քարտն առցանց շուկայի անձնական հաշվին,
• մնացորդը պարբերաբար լրացնել հատուկ առցանց գնումների համար նախատեսված քարտով,
• չանցնել վաճառողի տրամադրած հղումներով,
• ուշադիր ուսումնասիրել խանութների մասին ակնարկներն ու վարկանիշները:

«Եթե նկատում եք կասկածելի գործունեություն, դիմե՛ք տեխնիկական սպասարկման կենտրոն և չեղարկեք բոլոր չավարտված պատվերները»,- խորհուրդ է տվել նա։

Վերլուծաբանները կանխատեսում են, որ մինչև 2027-ը էլեկտրոնային առևտրի մասնաբաժինը համաշխարհային մանրածախ վաճառքում կկազմի 25%: