Որո՞նք են ԱԲ կրիպտոարժույթները, որ ամենաարագն են թանկանում

CryptoRank վերլուծական ծառայության վերջին տվյալների համաձայն՝ արհեստական ​​բանականության (ԱԲ) հետ կապված նախագծերի կրիպտոարժույթները վերջին 24 ժամվա ընթացքում գրանցել են առևտրի ծավալների 17% աճ՝ հասնելով 1,3 միլիարդ դոլարի։ Այս կատեգորիայի թոքենների շուկայական կապիտալիզացիան նույնպես աճել է 11%-ով՝ հասնելով $14,6 մլրդ-ի, հայտնում է ռուսական РБК-ն։

Արհեստական բանականությանն առնչվող կրիպտոակտիվների աճի առաջատարը եղել է մեքենայական ուսուցման ալգորիթմներով գործող Fetch.ai հարթակի կրիպտոարժույթը։ Վերջին 24 ժամվա ընթացքում դրա փոխարժեքն աճել է 29%-ով՝ հասնելով $1,68-ի։ Այս հարթակը նախատեսված է IoT սարքերը միացնելու համար, 2017-ին այն գործարկել են Քեմբրիջի համալսարանի շրջանավարտները։  

SingularityNET-ի թոքենը նույնպես գրանցել է 25% աճ: Այլ հաջողված նախագծերը ներառում են OCEAN կրիպտոարժույթը, որն օգտագործվում է Ocean Protocol նախագծում (+23%), RNDR թոքենը (+2%) և TAO կրիպտոարժույթը (+6%): Worldcoin նախագծի թոքենը, որը մշակվում է OpenAI-ի գործադիր տնօրեն Սեմ Ալթմանի կողմից, նույնպես աճել է 4%-ով։

Բազմիցս նկատվել է, որ այս խմբի ալտքոյնները հաճախ արձագանքում են գների կտրուկ տատանումներով, երբ ԶԼՄ-ներում հայտնվում են արհեստական բանականության ոլորտում առաջընթացի հետ կապված նորություններ: Օրինակ` այս տարվա փետրվարին մի քանի խոշոր կրիպտոակտիվներ միաժամանակ աճ գրանցեցին NVIDIA-ի ռեկորդային ֆինանսական ցուցանիշների հրապարակման ֆոնին: Արհեստական բանականության վրա կենտրոնացած կրիպտոակտիվները նմանատիպ դինամիկա են ցույց տվել ChatGPT չատբոտի մասին նորությունների և տեսանյութեր ստեղծող Sora մոդելի գործարկման ժամանակ: