Telegram-ում 1.5 անգամ աճել է խարդախությամբ զբաղվող ռեսուրսների թիվը

Telegram-ում ֆիշինգային ռեսուրսների թիվը 2024-ի առաջին եռամսյակում նախորդ տարվա նույն ժամանակահատվածի համեմատ Ռուսաստանի տարածքում աճել է 1,5 անգամ։ Այս մասին տեղեկացնում է ռուսական «Իզվեստիա» թերթը՝ վկայակոչելով «Կասպերսկու լաբորատորիա»-ի բովանդակության ավագ վերլուծաբան Օլգա Սվիստունովային։

Նրա խոսքով՝ ֆիշերները հաճախ են փոխում իրենց լեգենդները, բայց նրանք միշտ ունեն մեկ նպատակ՝ գայթակղել հնարավոր զոհերին և նրանց ուղղորդել Telegram-ի նույնականացման կեղծ էջ, որպեսզի նրանք մուտքագրեն իրենց հեռախոսահամարը և հաստատման կոդը, ինչից հետո այդ տվյալներն արդեն հայտնվում են խարդախների տրամադրության տակ։

Սվիստունովան պատմել է, որ տարբեր ժամանակներում հանդիպել են հարձակվողների կողմից հորինված տարբեր լեգենդների, օրինակ՝ հարցմանը մասնակցելու առաջարկ, հասանելիություն «մեծահասակների համար ալիքի», հասանելիություն այլ օգտատերերի նամակագրության, խաղային արժույթ վաստակելու հնարավորություն, Telegram Premium բաժանորդագրության փորձարկում և այլն:

Solar ընկերությունների խմբի մամուլի ծառայությունից թերթին հայտնել են, որ իրենց Solar AURA արտաքին թվային սպառնալիքների մոնիտորինգի կենտրոնի փորձագետները վերջերս հայտնաբերել են վնասակար կայքերի լայնածավալ ցանց՝ Telegram-ի օգտահաշիվները գողանալու նպատակով ստեղծված պատկերներով: Դրանց կարելի է հեշտությամբ հանդիպել որոնման արդյունքներում:

«Երբ փորձում են մուտք գործել կայք սկզբնական կոդով և ներբեռնել պատկերը, օգտատիրոջն ուղղորդում են դեպի Telegram-ի համայնքի էջը նմանակող ֆիշինգային ռեսուրսներից մեկը»,- ասվում է մամուլի ծառայությունում՝ հավելելով, որ եթե օգտատերն այնտեղ մուտքագրում է իր օգտահաշիվ մուտք գործելու տվյալները, հարձակվողներն անմիջապես ստանում են դրանք։

Positive Technologies հետազոտական ​​խմբի ղեկավար Իրինա Զինովկինան «Իզվեստիա»-ին պատմել է օգտահաշիվներ գողանալու նոր մեթոդների մասին։ Դրանց թվում են նեյրոնային ցանցի օգտագործմամբ կեղծ ձայնային հաղորդագրությունները և կեղծ օգտահաշիվները: Telegram-ը հայտնի է դարձել ոչ միայն անձնական շփման համար, այլև ունի սոցիալական ցանցային գործառույթներ, ինչը մեծացնում է նրա օգտատերերի վրա հարձակումների թիվը, պարզաբանել է փորձագետը և նշել, որ խարդախությունների աճը կապված է օգտատերերի թվի աճի հետ։