WhatsApp-ում նոր ու օգտակար գործառույթ կավելացվի

WhatsApp մեսենջերում կհայտնվի տեսանյութերն առաջ կամ հետ նվագարկելու հնարավորություն: Գործառույթն արդեն փորձարկվում է, այն կաշխատի այնպես, ինչպես YouTube-ի նման հարթակներում։

Տեսանյութը հետ տալու համար հարկավոր է երկու անգամ սեղմել էկրանի աջ կամ ձախ կողմում, դա թույլ կտա 10 վայրկյան առաջ կամ հետ գնալ: Կարելի է նաև ձեռքով հետ կամ առաջ տալ տեսանյութը՝ քաշելով նվագարկման ցուցիչը: Ինչպես նշում է Neowin-ը, այս գործառույթը կհայտնվի նաև WhatsApp-ի Android տարբերակում, թեև Google Play-ում այս մասին ոչ մի հիշատակում չկա:

Թարմացումը թույլ կտա նաև գործարկել և ուղարկել տեսահաղորդագրություններ՝ երկար սեղմելով տեսախցիկի կոճակի վրա: Տեսահաղորդագրությունների փոխանակման գործառույթը WhatsApp-ի Android և iOS տարբերակներում հայտնվել է անցյալ տարի և ներկայումս հասանելի է խոսափողի պատկերակի միջոցով (դրա վրա կարճ սեղմելուց հետո հայտնվում է տեսանյութի պատկերակը):

WhatsApp-ում փոփոխությունների մասին գրանցամատյանում պարզաբանվում է, որ նոր գործառույթները բոլոր օգտատերերի համար հասանելի կլինեն առաջիկա շաբաթների ընթացքում:

Ավելի վաղ հայտնի էր դարձել, որ WhatsApp-ի որոնման տողում կհայտնվի արհեստական ​​բանականության վրա հիմնված չատբոտ։ Այս մոտեցումն օգտատերերին կազատի ԱԲ գործիքի հետ երկխոսության պատուհանը ձեռքով բացելու անհրաժեշտությունից: WhatsApp-ը նաև մի քանի հուշումներ կառաջարկի, որոնք կօգնեն սկսել հարցումները։