Ինչպե՞ս պաշտպանել սմարթֆոնը վիրուսներից

Եթե չեք ցանկանում, որ ձեր սմարթֆոնը «վարակվի» վիրուսներով, որոնք կարող են վտանգել անձնական, այդ թվում՝ ֆինանսական տվյալները, փորձագետները խորհուրդ են տալիս ձեռնարկել մի շարք բավականին պարզ, բայց արդյունավետ միջոցներ:

Անվտանգության փորձագետ Ալեքսանդր Վլասովի կարծիքով, առաջին հերթին կարևոր է չսեղմել անհայտ ծագման հղումների վրա։ Նույնիսկ եթե ձեզ կասկածելի հղում է ուղարկել ձեր ընկերը, ծանոթը, դուք, այդուհանդերձ, պետք է զգույշ լինեք (քանզի, գուցե կոտրել են նրա օգտահաշիվը): Ամենաչնչին կասկածի դեպքում փորձագետը խորհուրդ է տալիս զանգահարել տվյալ ընկերոջը, ծանոթին և պարզել՝ արդյոք նա է ուղարկել հղումը և ուր է տանում այն։

Բացի դրանից՝ խորհուրդ է տրվում հանրային Wi-Fi ցանցերն օգտագործել մեծ զգուշությամբ, իսկ հնարավորության դեպքում՝ բացառել:

«Եթե հանրային տրանսպորտում միանում եք անլար ինտերնետի, ապա դժվար թե ձեր սարքը որևէ վիրուսով վարակվի: Սակայն եթե ինչ-որ անհասկանալի տեղում եք և ձեզ առաջարկում են անվճար Wi-Fi, պարզապես մտածեք, թե արդյոք դա իսկապես անհրաժեշտ է»,- նշել է Վլասովը։

Սմարթֆոնը վնասակար ծրագրերից պաշտպանելու համար խորհուրդ է տրվում նաև չներբեռնել կամ չտեղադրել ոչ լիցենզիոն հավելվածներ և պարբերաբար թարմացնել օպերացիոն համակարգը, ինչպես նաև հակավիրուսային հավելվածները, եթե այդպիսիք կան ձեր հեռախոսում։