Google-ը $700 մլն կվճարի հակամենաշնորհային վեճի կարգավորման շրջանակում

Google-ը համաձայնել է 700 միլիոն դոլար վճարել ԱՄՆ-ի հակամենաշնորհային հայցը լուծելու համար, որը կապված է Android հավելվածների տարածման սահմանափակումների հետ: ՏՏ հսկան խոստացել է ավելացնել մրցակցությունը իր Play Store հավելվածների խանութում։

Ըստ համաձայնագրի, որը դեռ պետք է ստանա դատավորի վերջնական հաստատումը, Google-ը 630 միլիոն դոլար կվճարի սպառողների հաշվարկային հիմնադրամին և 70 միլիոն դոլար՝ ֆոնդին, որը կօգտագործեն նահանգների ղեկավարությունը։

Սպառողները կստանան նվազագույնը $2 և իրավասու կլինեն լրացուցիչ գումար ակնկալել՝ հիմնված Play Store-ում 2016-ի օգոստոսի 16-ից մինչև 2023-ի սեպտեմբերի 30-ն արված վճարումների վրա։ Համաձայնագրին միացել են ԱՄՆ բոլոր 50 նահանգները, ինչպես նաև Կոլումբիայի օկրուգը, Պուերտո Ռիկոն և Վիրջինյան կղզիները։

Կորպորացիան մեղադրվում էր գների ուռճացման մեջ՝ Android սարքերում հավելվածների տարածման սահմանափակումների և ծառայություններում գործարքների համար չափազանց մեծ վճարներ գանձելու միջոցով։

Google-ը հայտարարել է, որ ընդլայնում է հավելվածների և խաղերի մշակողների հնարավորությունները, որպեսզի տրամադրի այլընտրանքային վճարային մեթոդներ գնումների համար: Ընկերությունը հայտնել է, որ ավելի քան մեկ տարի է, ինչ փորձարկում է Միացյալ Նահանգներում օգտատերերի համար այլընտրանքային վճարման ուղիներ մշակելու համար: Հայցի կարգավորման շրջանակում Google-ը խոստացել է հեշտացնել հավելվածների ներբեռնումն անմիջապես մշակող ընկերություններից։

Հիշեցնենք, որ այս տարվա դեկտեմբերի առաջին կեսին Epic Games-ը շահեց դատը Google-ի դեմ Android հավելվածի բաշխման մեթոդների մենաշնորհի գործով։ Դատարանը համարել էր, որ Google-ն անօրինական կապ ունի Play Store-ի և Google Play Billing վճարային ծառայությունների հետ։