Wildberries առցանց առևտրի հարթակը մշակել է տեսակոնֆերանսների և վեբինարների համար նախատեսված իր սեփական ծառայությունը՝ WB Stream-ը, այս մասին ռուսական Ведомости պարբերականին ասել է ընկերության ներկայացուցիչը: Նախագծում ներդրումների չափը չի բացահայտվում։ WB Stream-ի ամբողջական գործարկումը նախատեսված է 2024-ին, սակայն այժմ արդեն այն կարելի է փորձարկել վեբ տարբերակում կամ iOS-ի ու Android-ի համար առանձին հավելվածում։
Այժմ ծառայությանը կարող է միաժամանակ միանալ մինչև 5000 օգտատեր։ WB Stream-ը ստեղծվել է ընկերության կարիքների համար՝ որպես այլընտրանք արևմտյան հայտնի մշակումներին, սակայն ապագայում ծառայությանը հասանելիություն կտրամադրվի բոլոր օգտատերերին։ Ընկերության ներկայացուցչի խոսքով՝ Wildberries-ը չի նախատեսում գովազդ ցուցադրել այս ծառայությունում։ Բացի դրանից, այն կլինի անվճար։
Ծառայությունը թույլ է տալիս շփվել վիդեո և աուդիո ձևաչափով, չատում հաղորդագրություններ փոխանակել, հանդիպման մասնակիցներին ցուցադրել սարքի էկրանի բովանդակությունը, ձայնագրել առցանց հանդիպումը և այլն: Այն օգտագործելու համար դեռևս պարտադիր գրանցում Wildberries-ի կայքում չի պահանջվում: Ծառայությունը ենթադրում է և՛ կոնֆերանսի ռեժիմ՝ բոլոր մասնակիցների համար հավասար իրավունքներով, և՛ վեբինարի ռեժիմ, երբ ադմինիստրատորն ունի ընդլայնված իրավունքներ (նա կարող է մյուս մասնակիցներին տրամադրել մուտք դեպի վիդեո և աուդիո ձայնագրություններ և այլն):
Պարբերականի աղբյուրն ասել է, որ դատելով հրապարակված տարբերակից՝ Wildberries-ի մշակումը դիտարկչի ամենապարզ լուծում է, որը հիմնված է բաց կոդով WebRTC (դիտարկիչների միջև հոսքային տվյալների փոխանցումը կազմակերպելու տեխնոլոգիա) կամ Jitsi տեխնոլոգիաների վրա (թույլ է տալիս կատարել տեսազանգեր և ապահովում է ֆայլերի փոխանցումը): Ըստ նրա՝ 5000 օգտատիրոջ միաժամանակյա միացման հնարավորությունը չափազանց ցածր է տեսածառայությունների համար։
Wildberries-ի ներկայացուցիչը հրաժարվել է մեկնաբանել WB Stream-ում WebRTC և Jitsi տեխնոլոգիաների օգտագործման մասին տեղեկությունը։ Ծառայությունը նախատեսում է մեծացնել օգտատերերի միաժամանակ միանալու հնարավորությունները, նշել է նա։
ամիս
շաբաթ
օր