OpenAI-ի շուրջ կրքերը չեն հանդարտվում․ ներդրողները դատական ​​հայց են պատրաստում տնօրենների խորհրդի դեմ, իսկ աշխատողների 90%-ը սպառնում է հեռանալ

OpenAI-ի շուրջ կրքերը չեն հանդարտվում։ Այն բանից հետո, երբ ընկերության խորհուրդը պաշտոնանկ արեց ընկերության հիմնադիր Սեմ Ալթմանին, ինչից հետո ընկերությունը լքեց խորհրդի նախագահ Գրեգ Բրոքմանը, աշխատակիցների ավելի քան 90%-ը բաց նամակ է ստորագրել՝ պահանջելով տնօրենների խորհրդի հրաժարականը, հակառակ դեպքում նրանք սպառնում են հեռանալ և գնալ Microsoft: Ամենահետաքրքիրն այն է, որ նամակում կա նաև Իլյա Սուցկևերի ստորագրությունը, որը, փաստացի, համակարգել է ընկերությունում տեղի ունեցած «հեղաշրջումը»։

Ավելին, OpenAI-ի ներդրողները դիտարկում են տնօրենների խորհրդի դեմ հայց ներկայացնելու հնարավորությունը։

Ներդրողները դժգոհ են տնօրենների խորհրդի որոշումից

Reuters-ի տվյալներով՝ OpenAI-ի որոշ ներդրողներ մտադիր են դատի տալ ընկերության տնօրենների խորհրդին Սեմ Ալթմանին աշխատանքից հեռացնելու համար, ինչը հանգեցրել է որոշ այլ աշխատակիցների աշխատանքից ազատվելուն և կարող է հանգեցնել մեծամասնության հեռացմանը: Այս ամենը կարող է չափազանց բացասական ազդեցություն ունենալ ընկերության աշխատանքի վրա, իսկ ներդրողները կարող են հարյուր միլիոնավոր դոլարներ կորցնել։

Ըստ պարբերականի՝ պոտենցիալ տուժած ներդրողները ներկայումս խորհրդակցում են իրավաբանների հետ՝ գնահատելու այդ հայցի հեռանկարները:

Նշենք, որ OpenAI-ի սեփականության կառուցվածքը փոքր-ինչ ոչ ստանդարտ է. OpenAI ոչ առևտրային մայր ընկերությունը բավականին լուրջ լիազորություններ ունի բիզնեսի կառավարման առումով, իսկ դուստր առևտրային ընկերության կապիտալը 49%-ով պատկանում է Microsoft կորպորացիային, որն այստեղ $20 մլրդ է ներդրել։ Այս բիզնեսում այլ ներդրողները և OpenAI-ի աշխատակիցները վերահսկում են շահույթ հետապնդող ընկերության կապիտալի 49%-ը, իսկ մնացած 2%-ը պատկանում է ոչ առևտրային մայր կառույցին:

Այս կառույցի շնորհիվ ընկերության աշխատակիցները լուրջ հնարավորություններ ունեն ճնշում գործադրելու տնօրենների խորհրդի վրա՝ ի տարբերություն վենչուրային ներդրողների, որոնք ներդրումներ են կատարել ընկերությունում: Միևնույն ժամանակ, ընկերության տնօրենների խորհրդի անդամները սահմանափակ պատասխանատվություն են կրում կադրային որոշումների համար: Փորձագետների կարծիքով՝ պարզվում է, որ OpenAI ներդրողների համար դժվար կլինի հաղթել հնարավոր դատական ​​գործընթացում։

Պահանջներով և սպառնալիքներով բաց նամակ

Սկզբում ընկերության 770 աշխատակիցներից 505-ը բաց նամակ էին ստորագրել՝ սպառնալով հեռանալ OpenAI-ից, եթե տնօրենների խորհուրդը չհայտարարի իր հրաժարականի մասին և չվերականգնի Սեմ Ալթմանին և Գրեգ Բրոքմանին։ Ավելի ուշ նամակը ստորագրել է ավելի քան 700 աշխատակից, այսինքն՝ ավելի քան 90%-ը։

Ուշագրավ է, որ նրանց թվում էր ընկերությունում «հեղաշրջման» համակարգողը՝ ընկերության գլխավոր հետազոտող և տնօրենների խորհրդի անդամ Իլյա Սուցկևերը:

Բաց նամակի հրապարակումից քիչ առաջ Սուցկևերը X սոցիալական ցանցում գրել է.

«Խորապես ափսոսում եմ տնօրենների խորհրդի գործողություններին իմ մասնակցության համար։ Ես երբեք չեմ մտադրվել վնասել OpenAI-ին: Ես սիրում եմ այն ​​ամենը, ինչ մենք ստեղծել ենք միասին, և կանեմ ամեն ինչ, որպեսզի վերականգնենք ընկերությունը»:

OpenAI-ի շատ աշխատակիցներ հայտարարել են, որ եթե իրենց պահանջները չկատարվեն, ապա պատրաստ են հեռանալ OpenAI-ից և միանալ Սեմ Ալթմանին Microsoft-ում:

«OpenAI-ը ոչինչ է առանց իր մարդկանց: Microsoft-ը մեզ վստահեցրել է, որ իր նոր դուստր ձեռնարկությունը հաստիքներ ունի OpenAI-ի բոլոր աշխատակիցների համար, եթե մենք որոշենք միանալ»,- նշել են աշխատակիցները։

Նամակում աշխատակիցները պահանջում են ոչ միայն պաշտոնանկ անել ներկայիս տնօրենների խորհրդի անդամներին (Իլյա Սուցկևեր, Ադամ Դ'Անջելո, Հելեն Թոներ և Տաշա Մաքքոլի), այլ նաև նշանակել խորհրդի երկու նոր անկախ ղեկավար անդամների՝ Բրետ Թեյլոր (որը համարվում է տեխնոլոգիական ոլորտի վետերան) և Ուիլ Հերդ (քաղաքական գործիչ, որը նախկինում աշխատել է OpenAI-ի տնօրենների խորհրդում):