ԵՄ-ն իր տարածքում կարգելի թիրախային գովազդը Facebook-ում և Instagram-ում

Տվյալների պաշտպանության եվրոպական խորհուրդը (EDPB) որոշել է Եվրամիության և Եվրոպական տնտեսական տարածքի բոլոր 30 երկրներում արգելել Facebook և Instagram սոցիալական ցանցերում թիրախային գովազդը, որն ավելի վաղ արգելել էր ԵՄ անդամ չհանդիսացող Նորվեգիան, տեղեկացնում է Reuters-ը։

Այսպիսի գովազդի սահմանափակումը, որը թիրախավորում է յուրաքանչյուր օգտատիրոջ անհատապես՝ հավաքելով նրա տվյալները, մեծ հարված է ԱՄՆ տեխնոլոգիական հսկա Meta Platforms-ին, որին պատկանում են Facebook-ը և Instagram-ը:

Տվյալների պաշտպանության եվրոպական խորհրդի որոշումը, ըստ էության, գործողությունների ուղեցույց է Իռլանդիայի համապատասխան կարգավորող մարմնի համար, որտեղ գտնվում է Meta-ի եվրոպական կենտրոնակայանը: Կարգավորող մարմինը երկու շաբաթվա ընթացքում պետք է մշտական ​​արգելք սահմանի ընկերության կողմից թիրախային գովազդի օգտագործման համար, ասվում է EDPB-ի հայտարարությունում։

Meta-ն իր հերթին հայտարարել է, որ ԵՄ-ի և Եվրոպական տնտեսական տարածքի օգտատերերին հնարավորություն կտա համաձայնություն տալ նման գովազդին, և նոյեմբերին կառաջարկի բաժանորդագրության մոդել, որը կհամապատասխանի կարգավորող մարմնի պահանջներին: «EDPB անդամները մի քանի շաբաթ է, ինչ տեղյակ են այս ծրագրի մասին, և մենք արդեն երկխոսության մեջ ենք նրանց հետ բոլոր կողմերի համար գոհացուցիչ արդյունքի հասնելու համար»,- ասել է ընկերության ներկայացուցիչը:

Այս տարվա օգոստոսի 7-ից Meta-ն Նորվեգիայում օրական 1 միլիոն կրոն (90,000 դոլար) տուգանքի է ենթարկվում օգտատերերի տվյալներն օգտագործելու և նրանց գաղտնիությունը խախտելու համար։ Մասնավորապես ընկերությունը մեղադրվում է նրանում, որ օգտագործում է նրանց գտնվելու վայրի կամ առցանց վարքագծի մասին տվյալները, որպեսզի համապատասխան գովազդ առաջարկի նրանց։ Նորվեգիան նաև ընկերությանը սպառնացել է շրջանառության տուգանք կիրառել՝ տարեկան համաշխարհային հասույթի մինչև 4%-ի չափով:

Եթե ​​արգելքն ուժի մեջ մտնի, ապա ըստ Datatilsynet-ի տվյալների՝ որոշումը կազդի Եվրոպայում Facebook-ի և Instagram-ի մոտ 250 միլիոն օգտատերերի վրա։