24 միջուկանի Core i9-13980HX, հովացման ամենաբարակ համակարգ․ ներկայացվել է Lenovo Legion 9i խաղային նոութբուքը

Lenovo ընկերությունը ներկայացրել է Legion 9i խաղային նոութբուքը, որը, ի թիվս այլ առավելությունների, ունի շարժական համակարգիչների համար նախատեսված աշխարհի ամենաբարակ հեղուկ սառեցման համակարգը, տեղեկացնում է Mspoweruser.com-ը։

Նոութբուքը նաև բավական բարակ է իր պարամետրերի համեմատ՝ ընդամենը 18,9 մմ: Դրան հասնելու համար Lenovo-ն օգտագործել է հեղուկ հովացման շատ բարակ համակարգ:

Ըստ աղբյուրի՝ այս հովացման համակարգը անընդհատ չի աշխատում, այլ ակտիվանում է միայն այն ժամանակ, երբ բաղադրիչների ջերմաստիճանը հասնում է 84 աստիճանի: Այնուամենայնիվ, հաշվի առնելով համակարգչի բնութագրերը, դա, հավանաբար, տեղի կունենա գրեթե միշտ՝ ցանկացած լիարժեք ծանրաբեռնվածության ժամանակ։

Նոր համակարգչում օգտագործվում է բարձրակարգ Core i9-13980HX (24 միջուկ) պրոցեսոր և GeForce RTX 4090 գրաֆիկական քարտ, այսինքն՝ շուկայում առկա հնարավոր ամենաարդյունավետ լուծումներից մեկն է տրվել։

Նոութբուքն ունի մինչև 64 ԳԲ օպերատիվ հիշողություն, երկու 1 ՏԲ SSD, 16,3 դյույմանոց 2K IPS էկրան՝ 165 Հց հաճախականության աջակցությամբ և 99,9 Վտժ հզորությամբ մարտկոց։

Նոր համակարգչի գնի մասին տեղեկություններ դեռ չկան։