Շվեդ գիտնականներն ստեղծել են գել, որի շնորհիվ էլեկտրոդներն աճում են հենց կենդանի օրգանիզմում

Շվեդ գիտնականների հայտնագործությունը կարող է բեկում մտցնել կենդանի օրգանիզմներում անկենդան նյութ փոխպատվաստելու ոլորտում և հանգեցնել մեքենայի և մարդու իրապես ամբողջական ինտեգրմանը: Ինչպես տեղեկացնում է Newatlas.com-ը, գիտնականների մշակած նոր տեխնոլոգիան թույլ է տալիս Էլեկտրոդների ցանց ստեղծել անմիջապես բջիջներում և կենդանի հյուսվածքներում՝ օգտագործելով կենսաբանական շինանյութ:

Լինկյոփինգի, Լունդի և Գյոթեբորգի համալսարանների գիտնականներին երկարամյա հետազոտության ընթացքում հաջողվել է ստեղծել գել, որը պարունակում է հատուկ ֆերմենտներ «հավաքման մոլեկուլներով»։ Այդ գելի ներարկումը կենդանի հյուսվածքներ առաջացնում է կենդանի օրգանիզմներում հաղորդիչ էլեկտրոդներ ձևավորելու համար անհրաժեշտ ռեակցիաներ: Այս դեպքում ոչ մի արտաքին ազդեցություն կամ գեների փոփոխություն չի պահանջվում, և սա առաջին նման հաջող փորձն է հետազոտությունների ողջ պատմության ընթացքում։ Փորձերի ընթացքում գիտնականները հրաշագործ գելը ներարկել են զեբրաձկան և բժշկական տզրուկների մեջ։ Դրանից հետո էլեկտրոդներ են հայտնաբերվել ձկների ուղեղում, սրտի հատվածում և պոչի լողակներում և տզրուկների նյարդային հյուսվածքի շուրջ։ Ո՛չ ձկները, ո՛չ տզրուկները չեն տուժել գելի հետևանքով կամ էլեկտրոդների սինթեզից հետո։ «Ողջամիտ փոփոխություններ կատարելով քիմիական բաղադրությունում՝ մենք կարողացանք զարգացնել էլեկտրոդներ, որոնց ընդունում են ուղեղի հյուսվածքներն ու իմունային համակարգը: Զեբրաձուկը հիանալի մոդել է ուղեղում օրգանական էլեկտրոդների ուսումնասիրման համար»,- բացատրել է Լունդի համալսարանի բժշկության ֆակուլտետի պրոֆեսոր Ռոջեր Օլսոնը:

Էլեկտրոնային սխեման օրգանիզմում ստեղծվում է գրեթե բնական ճանապարհով և օրգանիզմի վրա վնասակար ազդեցություն չի ունենում։ «Մի քանի տասնամյակ մենք փորձում ենք ստեղծել էլեկտրոնիկա, որը նմանակում է կենսաբանությանը,- ասել է Լինկյոփինգի համալսարանի պրոֆեսոր Մագնուս Բերգգրենը,- Այժմ մենք թույլ ենք տալիս, որ կենսաբանությունը մեզ համար էլեկտրոնիկա ստեղծի»:

Լինկյոփինգի համալսարանի օրգանական էլեկտրոնիկայի լաբորատորիայի (LOE) գիտաշխատող Քսենոֆոն Ստրակոսասն ասել է, որ մարմնի նյութերի հետ շփումը փոխում է գելի կառուցվածքը և դարձնում այն էլեկտրական հաղորդունակ, ինչպիսին այն չէր ներարկումից առաջ: «Կախված հյուսվածքից՝ մենք կարող ենք նաև հարմարեցնել գելի բաղադրությունը՝ էլեկտրական պրոցեսը սկսելու համար»,- վստահեցրել է նա։

Պարբերականը նշում է, որ ներկայացված մշակումը հիմք կարող է դառնալ կենդանիների և մարդկանց օրգանիզմում էլեկտրոնային բաղադրիչների ինտեգրման մոտեցումներում ապագայում հիմնարար փոփոխությունների համար: Բժշկական տեսանկյունից հայտնագործությունը հուսադրող է նյարդաբանական ծանր հիվանդությունների բուժման համար։ Խոսքը ինչպես ախտահարված հյուսվածքների խթանման, այնպես էլ դրանք համակարգչային հարթակներով փոխարինելու մասին է։

Ուսումնասիրությունը հրապարակվել է Science գիտական ամսագրում։

Հետևեք NEWS.am Tech-ին Facebook-ում և Twitter-ում