YouGov ընկերության հարցումը ցույց է տվել, որ ԱՄՆ մեծահասակ բնակիչների մեծամասնությունը հետաքրքրված չէ ծալվող iPhone-ով: Ընդ որում, համացանցում արդեն սկսել են հայտնվել լուսանկարներ և տեսանյութեր, որոնք իբրև թե ցույց են տալիս ապագա սարքի մայրական պլատան: Հանրության սպասելիքների և նորույթի ենթադրյալ գնի միջև տարբերությունը շատ մեծ է ստացվել:
Ում հետաքրքիր չէ ծալվող iPhone-ը
Հետազոտությունն անցկացվել է օգոստոսի 13-ից 17-ը և ընդգրկել է 2605 ռեսպոնդենտ: Դրա արդյունքներով՝ ամերիկացի մեծահասակների 75%-ը հայտարարել է, որ չէր գնի Apple-ի ծալվող սմարթֆոնը: Ամենացածր հետաքրքրությունը ցուցաբերել են ավագ սերնդի ներկայացուցիչները. բեբի-բումերների շրջանում այդպիսիք եղել են 83%-ը, X սերնդի շրջանում՝ 77%-ը: Z սերնդի և միլենիալների մոտ ցուցանիշները մի փոքր ավելի ցածր են՝ համապատասխանաբար 69% և 68%:
Ընդ որում, միջինում ամերիկացիները պատրաստ են նման սարքի համար վճարել 781 դոլար: Ամենից շատ պատրաստ են վճարել Z սերնդի ներկայացուցիչները՝ միջինում 919 դոլար: Միլենիալների մոտ այդ գումարը կազմում է 859 դոլար, X սերնդի մոտ՝ 690, իսկ բեբի-բումերների մոտ՝ ընդամենը 572 դոլար: Ծալվող iPhone-ի սպասվող մանրածախ գինը, ընթացիկ կանխատեսումներով, գերազանցում է 2000 դոլարը: Սա զգալիորեն բարձր է այն գումարից, որը մարդիկ ընդունելի են համարում:
Ինչպես է գների աճն ազդում գնորդների պլանների վրա
Հարցումը նաև բացահայտել է, որ ամերիկացիների 41%-ը վերանայում է սմարթֆոնը թարմացնելու իր պլանները գների սպասվող բարձրացման պատճառով: Նրանց մի մասը դիտարկում է ավելի հին կամ բյուջետային մոդելներ, ոմանք պատրաստ են փոխել ապրանքանիշը կամ գնել վերականգնված (refurbished) սարք: Եվս 9%-ը կթարմացվի միայն ձեռնտու trade-in-ի կամ օպերատորի հատուկ առաջարկի առկայության դեպքում: Ռեսպոնդենտների 22%-ը հայտարարել է, որ մոտ ապագայում ընդհանրապես չի պլանավորում փոխել հեռախոսը՝ անկախ նրանից, թե ինչ կառաջարկի Apple-ը:
Ծալվող iPhone-ի դետալների արտահոսքը
Հարցման արդյունքներին զուգահեռ համացանցում հայտնվել են պատկերներ և կարճ տեսանյութ, որոնք իբրև թե ցույց են տալիս առաջին ծալվող iPhone-ի մայրական պլատան: Նյութերը տարածվում են X-ում և չինական հարթակներում: Նկարներում նշված են պրոցեսորը, ծխնու (hinge) միացման տեղը, ճկուն կաբելի կոնեկտորը և այլ տարրեր: Նմանատիպ սխեմա է հրապարակել նաև պահեստամասերի չինական վաճառողներից մեկը:
Արտահոսքի իսկությունը դեռևս հաստատված չէ: Այնուամենայնիվ, նման նյութերի հայտնվելը կարող է վկայել այն մասին, որ սարքն իսկապես մոտ է ազդարարմանը (անոնսին): Նախորդ արտահոսքերի տվյալներով՝ ծալվող iPhone-ը կստանա 5.5 դյույմ անկյունագծով արտաքին էկրան և 7.8 դյույմանոց ներքին էկրան, A20 Pro չիպ, 5000 մԱ/ժ հզորությամբ մարտկոց, 48 Մպ հիմնական կրկնակի կամերա և 18 մեգապիքսելանոց սելֆի-կամերաներ երկու դիսփլեյների վրա էլ: Սպասվում է, որ ապարատը կներկայացնեն iPhone 18 Pro մոդելների հետ միասին, իսկ դրա արժեքը կկազմի առնվազն 2000 դոլար:
Կարճ ասած
YouGov-ի հարցումը ցույց է տվել, որ ամերիկացի մեծահասակների 75%-ը չի ցանկանում գնել ծալվող iPhone: Միջին գումարը, որ նրանք պատրաստ են վճարել դրա համար, մոտ 781 դոլար է, այնինչ իրական գինը, կանխատեսումներով, կգերազանցի 2000 դոլարը: Միաժամանակ համացանցում հայտնվել են լուսանկարներ, որոնք իբրև թե ցուցադրում են Apple-ի ապագա ծալվող սմարթֆոնի մայրական պլատան: Նյութերի իսկությունը հաստատված չէ, սակայն դրանք կարող են վկայել անոնսի մոտենալու մասին:
Հետևեք NEWS.am Tech-ին Facebook-ում և Twitter-ում