OpenAI-ն լուրջ քայլ է կատարել դեպի անձնական ֆինանսների ոլորտ: Ընկերությունը գործարկել է ChatGPT Finance գործառույթը, որը թույլ է տալիս կապակցել իրական բանկային հաշիվները և արհեստական բանականության օգնությամբ վերլուծել անձնական ծախսերը:
Ինչպես է այն աշխատումPlaid հարթակի միջոցով (որն աջակցում է ԱՄՆ-ի ավելի քան 12 000 ֆինանսական հաստատությունների) օգտատերերը կարող են անվտանգ կերպով իրենց բանկային հաշիվները կապել ChatGPT-ի հետ: Կապակցումից հետո չատբոտի ինտերֆեյսում հայտնվում է հատուկ ֆինանսական վահանակ, որտեղ արտացոլվում են՝
Բոլոր ծախսերն ու եկամուտները, Ակտիվ բաժանորդագրությունները, Առաջիկա վճարումները, Ֆինանսական դրության ընդհանուր պատկերը:Ամենահետաքրքիրն այն է, որ ChatGPT-ն այժմ կարող է հարցերին պատասխանել ոչ թե «ընդհանուր ձևով», այլ հաշվի առնելով ձեր իրական տվյալները: Օրինակ՝ «Ո՞ւր է գնում ամենաշատ փողն այս ամիս», «Ո՞ր բաժանորդագրությունները կարելի է չեղարկել» կամ «Կկարողանա՞մ մինչև սեպտեմբեր գումար կուտակել արձակուրդի համար»:
Հասանելիություն և անվտանգությունՄեկնարկին գործառույթը հասանելի է միայն ԱՄՆ-ում «ChatGPT Pro» սակագնի բաժանորդներին՝ ինչպես վեբ տարբերակում, այնպես էլ iOS-ի հավելվածում: OpenAI-ում ընդգծում են, որ օգտատերը ցանկացած պահի կարող է անջատել հաշիվները և ամբողջությամբ ջնջել ֆինանսական տվյալները նեյրոցանցի «հիշողությունից»:
Ընկերության տվյալներով՝ ավելի քան 200 միլիոն օգտատեր արդեն ամեն ամիս ChatGPT-ից խորհուրդներ է հարցնում փողի և բյուջեի վերաբերյալ: Այժմ այդ խորհուրդները կարող են դառնալ շատ ավելի ճշգրիտ և անհատականացված:
Նոր հնարավորություններ և ռիսկերՄի կողմից՝ սա հարմար գործիք է նրանց համար, ովքեր ցանկանում են ավելի լավ հասկանալ իրենց ֆինանսները: Մյուս կողմից՝ բանկային տվյալների կապակցումը հզոր նեյրոցանցին լուրջ հարցեր է առաջացնում գաղտնիության և անվտանգության վերաբերյալ: OpenAI-ն խոստանում է պաշտպանվածության բարձր մակարդակ, սակայն բազմաթիվ օգտատերեր այս նորամուծությանը դեռևս վերաբերվում են զգուշությամբ:
Մոտակա ժամանակներս ընկերությունը նախատեսում է ընդլայնել գործառույթի աշխարհագրությունը նաև այլ երկրներում:
Կարճ ասածOpenAI-ն գործարկել է ChatGPT Finance գործառույթը, որը թույլ է տալիս բանկային հաշիվները կապակցել Plaid ծառայության միջոցով: Նեյրոցանցն այժմ կարող է վերլուծել օգտատիրոջ իրական ծախսերը, բաժանորդագրություններն ու վճարումները և տալ անհատականացված ֆինանսական առաջարկություններ: Առայժմ գործառույթը հասանելի է միայն ԱՄՆ-ում ChatGPT Pro-ի բաժանորդների համար: Չնայած OpenAI-ն խոստանում է ցանկացած պահի տվյալներն ամբողջությամբ անջատելու հնարավորություն, նորամուծությունը կրկին բարձրացնում է կարևոր հարցը. պատրա՞ստ ենք արդյոք մեր ֆինանսները վստահել արհեստական բանականությանը:
Հետևեք NEWS.am Tech-ին Facebook-ում և Twitter-ում