Երևանում տեղի ունեցավ երկրի տեխնոլոգիական ընկերությունների խոշորագույն միավորման՝ Առաջատար տեխնոլոգիաների ձեռնարկությունների միության (ԱՏՁՄ / UATE) 25-րդ հոբելյանական համաժողովը: Ֆորումի առանցքային իրադարձությունը դարձավ ասոցիացիայի նոր նախագահի ընտրությունը, որը խորհրդանշականորեն համընկավ կազմակերպության 25-ամյա հոբելյանի հետ և նշանավորեց դրա զարգացման նոր փուլի սկիզբը:
Այսօր ԱՏՁՄ անդամ ընկերություններն ապահովում են Հայաստանի 1000 խոշոր հարկատուների ցանկում ընդգրկված ՏՏ ոլորտի հարկային մուտքերի շուրջ 70%-ը: 25 տարվա ընթացքում ասոցիացիան 8 հիմնադիր ընկերություններից աճել է մինչև 270 անդամի՝ ընդգրկելով տեխնոլոգիական ոլորտի գրեթե բոլոր ուղղությունները:
ԱՏՁՄ գործադիր տնօրեն Սարգիս Կարապետյանը նշեց, որ հոբելյանական համաժողովը միավորել է շուրջ հարյուր բարձր տեխնոլոգիական ընկերությունների և դարձել ոչ միայն հիշարժան տարեթիվ, այլև ռազմավարական փոփոխությունների պահ: Նրա խոսքով՝ վերջին երեք տարիները եղել են հատկապես ինտենսիվ աճի և տրանսֆորմացիաների շրջան, իսկ 25-ամյակը միայն հզորացրել է այդ թափը: Այսօր ԱՏՁՄ-ն, ընդգծեց նա, հանդես է գալիս ոչ միայն որպես մասնագիտական միավորում, այլև որպես փորձագիտական կենտրոն և պետության ու միջազգային գործընկերների հետ համակարգված երկխոսության հարթակ:
Համաժողովի կենտրոնական իրադարձությունը ասոցիացիայի նոր նախագահի ընտրությունն էր: Նախորդ տարիներին ԱՏՁՄ-ն գլխավորող Ալեքսանդր Եսայանը չէր առաջադրել իր թեկնածությունը: Կազմակերպության գործադիր տնօրենը շեշտեց, որ Եսայանի ավանդը Հայաստանի տեխնոլոգիական էկոհամակարգի ձևավորման և զարգացման գործում դժվար է գերագնահատել՝ նրան անվանելով ոլորտի ամենաազդեցիկ ներկայացուցիչներից մեկը:
Քվեարկության արդյունքներով ԱՏՁՄ նոր նախագահ ընտրվեց Արմեն Քոչարյանը՝ VOLO և Spark Work ընկերությունների հիմնադիրը, ինչպես նաև մի շարք տեխնոլոգիական և ձեռնարկատիրական նախագծերի նախաձեռնողն ու ղեկավարը: Ավելի վաղ Ալեքսանդր Եսայանը հրապարակավ սատարել էր նրա թեկնածությունը՝ նշելով Քոչարյանի բազմամյա ներգրավվածությունը միության գործունեության մեջ և նրա ներդրումը տեխնոլոգիական համայնքի զարգացման գործում: «Արմենը կլինի գերազանց նախագահ»,- հայտարարել էր նա:
Համաժողովի շրջանակում ներկայացվեց նաև «Հանրային քաղաքականությունների օրակարգ» փաստաթուղթը, որն արտացոլում է ԱՏՁՄ անդամների համախմբված տեսլականը տեխնոլոգիական հատվածի զարգացման, կարգավորումների և ոլորտի առաջնահերթությունների վերաբերյալ: Փաստաթուղթը նախատեսվում է ներկայացնել գործող կառավարությանը և առաջիկա խորհրդարանական ընտրություններին մասնակցող քաղաքական ուժերին:
Խոսելով պետության հետ փոխգործակցության մասին՝ ԱՏՁՄ ներկայացուցիչները նշեցին, որ տեխնոլոգիական քաղաքականության ոլորտում արդեն իսկ ընթանում են ակտիվ գործընթացներ: Միությունը Բարձր տեխնոլոգիական արդյունաբերության նախարարությանն առաջարկել է ստարտափների աջակցության մի շարք ծրագրեր և մտադիր է հետևողականորեն հասնել տեխնոլոգիական բիզնեսի համար առավել նպաստավոր պայմանների ստեղծմանը և Հայաստանի միջազգային մրցունակության բարձրացմանը:
Հետևեք NEWS.am Tech-ին Facebook-ում և Twitter-ում