Ե՞րբ արհեստական բանականությունը կգերազանցի մարդկային բանականությանը. Իլոն Մասկը իր կարծիքն է հայտնել

Ամերիկացի հայտնի ձեռներեց և միլիարդատեր Իլոն Մասկը կարծում է, որ արհեստական բանականությունը մինչև 2030 թվականը կգերազանցի բոլոր մարդկանց բանականությունը։ Այս մասին նա հայտնել է X սոցիալական ցանցի իր էջում։

Մասկի խոսքով, այս իրադարձությանն ուղղված առաջին նշանակալից քայլերը կլինեն շատ ավելի վաղ։ Նա նշել է, որ արհեստական ինտելեկտը կկարողանա գերազանցել անհատի ինտելեկտը մինչև 2025 թվականը և մոտենալ ողջ մարդկության ընդհանուր ինտելեկտին մինչև 2027 կամ 2028 թվականները:

«Հավանականությունը, որ արհեստական բանականությունը մինչև 2030 թվականը կգերազանցի բոլոր մարդկանց բանականությանը՝ միասին վերցրած, մոտ 100 տոկոս է»,- ասել է Մասկը, ով նաև ղեկավարում է Tesla-ն, SpaceX-ը և X-ը (նախկինում՝ Twitter):

Այս կարծիքը, սակայն, ոչ բոլորն են կիսում։ Այսպես, գիտնական և ՏՏ լրագրող Գարի Մարկուսը կարծում է, որ արհեստական ինտելեկտը կարող է չարդարացնել սպասելիքները։ Wired-ի իր սյունակում նա կասկածներ է հայտնել արհեստական ինտելեկտի (AI) իրական օգտակարության վերաբերյալ՝ նշելով, որ այս տեխնոլոգիայի շուրջ աղմուկը աստիճանաբար մարում է։

Մարկուսի խոսքով՝ OpenAI-ի ChatGPT-ի գործարկումը 2022 թվականին իսկական սենսացիա է ստեղծել՝ ստիպելով հասարակությանը ակտիվորեն քննարկել AI-ի հնարավորությունները։ Այնուամենայնիվ, եթե 2023 թվականը բուռն հետաքրքրության ժամանակաշրջան էր, ապա 2024 թվականը հիասթափությունների տարի էր:

Մարկուսը ենթադրել է, որ գեներատիվ AI-ն կարող է ավելի քիչ նշանակալից լինել, քան նախկինում կարծում էին: Պատճառներից մեկը ըստ նրա՝ նման տեխնոլոգիաների շահութաբերության վերաբերյալ չարդարացված սպասումներն են։ Օրինակ՝ OpenAI-ի կորուստները 2024 թվականին կարող են հասնել 5 միլիարդ դոլարի, ինչը, ըստ Մարկուսի, պայմանավորված է ինչպես բիզնեսի, այնպես էլ օգտատերերի կողմից չափազանց մեծ ակնկալիքներով։

Բացի այդ, լրագրողն ընդգծել է, որ 2022 թվականից ի վեր ոչ մի խոշոր ՏՏ ընկերություն չի կարողացել ավելի նորարարական բան ստեղծել, քան ChatGPT-ն ու նրա անալոգները։ Նա նշել է, որ ժամանակակից արհեստական ինտելեկտի մոդելների մեծ մասը գործում է նմանատիպ ալգորիթմների հիման վրա և հիմնովին նոր լուծումներ չի առաջարկում։

Մարկուսը նաև նախազգուշացրել է, որ եթե OpenAI-ն 2025 թվականին զգալի առաջընթաց չանի արհեստական ինտելեկտի ոլորտում, տեխնոլոգիայի նկատմամբ հանրային հետաքրքրությունը կարող է մարել:

Հիշեցնենք, որ ավելի վաղ՝ մարտին, Մասկը տեխնոլոգիական այլ առաջատարների հետ, այդ թվում՝ Apple-ի համահիմնադիր Սթիվ Վոզնյակի և Pinterest-ի համահիմնադիր Էվան Շարփի հետ, ստորագրել էր բաց նամակ, որը հրապարակվել էր Future of Life կայքում։ Փաստաթղթում նրանք կոչ են արել կասեցնել արհեստական ինտելեկտի հզոր համակարգերի զարգացումը` հասարակության համար հնարավոր ռիսկերը նվազեցնելու համար:

Չնայած իր մտահոգություններին, 2023-ի հուլիսին Մասկը հայտարարեց իր սեփական ընկերության՝ xAI-ի ստեղծման մասին, որն աշխատում էր «AI-ի ուսուցման ամենահզոր կլաստերի վրա»: Ակնկալվում է, որ համակարգը կսկսի գործել 2025 թվականի աշնանը և կարևոր իրադարձություն կնշանակի արհեստական ինտելեկտի տեխնոլոգիաների զարգացման գործում:

Հետևեք NEWS.am Tech-ին Facebook-ում և Twitter-ում