Հայաստանում ներկայումս մշակվում են մի շարք օրենսդրական փաթեթներ, որոնք կօգնեն ստեղծել առավել բարենպաստ միջավայր բարձր տեխնոլոգիաների և ռազմական արդյունաբերության զարգացման համար։ Այս մասին Հայկական երկրորդ գլոբալ գագաթնաժողովի ժամանակ ասաց Հայաստանի բարձր տեխնոլոգիական արդյունաբերության նախարար Մխիթար Հայրապետյանը։
Նրա խոսքով՝ այսօրվա օրենսդրական նորմերից շատերը գործում են դեռ ԽՍՀՄ ժամանակներից, որոնք ինչ-որ առումով խոչընդոտում են վերը նշված ոլորտների զարգացմանը։ Ուստի, ըստ նախարարի, եթե Հայաստանն ուզում է, որ աշխարհին առաջարկելու բան ունենա, առաջին հերթին պետք է հասկանալ, թե այսօր ինչ խնդիրներ կան, որոնք խոչընդոտում են տեխնոլոգիական ոլորտի արագ զարգացմանը և լուծել դրանք։
«Ռազմարդյունաբերական համալիրի մասին» օրինագիծը, որն արդեն ստացել է կառավարության հավանությունը, Հայրապետյանը համարում է այն կարևոր օրենսդրական փաթեթներից մեկը, որը կարող է էապես փոխել իրավիճակը ռազմարդյունաբերության ոլորտում։ Այս օրինագիծը, ըստ նախարարի, ի թիվս այլ հարցերի, կարգավորում է հարաբերությունները երեք կողմերի՝ Բարձր տեխնոլոգիական արդյունաբերության նախարարության, Պաշտպանության նախարարության և արդյունաբերության ոլորտների միջև։ Օրինագիծը նաև նվազեցնում է բյուրոկրատական խոչընդոտները, որոնք այսօր լուրջ խնդիրներ են ստեղծում ռազմական արդյունաբերության ոլորտում գործող ընկերությունների համար։ Նախագիծը նախատեսում է նաև ֆինանսավորման նոր ընթացակարգերի ստեղծում գիտահետազոտական ուսումնասիրությունների և զարգացման ոլորտում:
«Այս նախագիծը զգալիորեն կհեշտացնի ռազմական արդյունաբերությամբ զբաղվողների կյանքը, և մեզ համար հնարավորություն կստեղծի ոչ միայն ֆինանսավորել հիմնարար հետազոտությունները, այլև պատշաճ կերպով ֆինանսավորել նախատիպերի մշակումը, որոնց պետության կողմից փորձարկումներ անցնելուց հետո արդեն կարող են ուղարկել զանգվածային արտադրության»,- նշեց նախարարը։
Հայրապետյանը նաև հավելեց, որ նոր օրինագիծը հնարավորություն է տալիս վերաբաշխել նաև նախատիպերի ստեղծման բյուջեն, ինչը խնդրահարույց է գործող օրենքներով։
Բարձրացվում է նաև ռազմարդյունաբերական ընկերությունների շահույթի շեմը, ինչը կօգնի նաև ներդրումներ ներգրավել դրանցում, ստեղծել նոր վենչուրային հիմնադրամներ և նպատակային ֆինանսավորում տեխնոլոգիական նորարարության ոլորտում աշխատող ընկերությունների համար։ Այս շեմը, ըստ նախարարի, երկար տարիներ խոչընդոտ է եղել այս ոլորտի զարգացման համար։
«Ռազմարդյունաբերությունը դառնալու է մեր տնտեսության կարևորագույն հատվածներից մեկը,- ասաց Մխիթար Հայրապետյանը,- Այս ամենը մեր ռազմական ուժերին ոչ միայն տեխնոլոգիական առավելություններ կտա, այլ նաև հնարավորություն կտա ունենալ տնտեսության մեկ այլ զարգացած ոլորտ՝ ռազմարդյունաբերությունը, որը կբարձրացնի Հայաստանի միջազգային հեղինակությունը։
Նրա խոսքով, եթե Հայաստանում հնարավոր լինի իրականացնել բարձր տեխնոլոգիաների, այդ թվում՝ ռազմարդյունաբերական արտադրանքի զարգացման և արտադրության ողջ ցիկլը, երկիրը տեխնոլոգիական աշխարհում և աշխարհաքաղաքական իրավահարաբերություններում կդառնա բոլորովին այլ խաղացող։
Հետևեք NEWS.am Tech-ին Facebook-ում և Twitter-ում