Google-ը մի քանի տարի շարունակ հավաքել է օգտատերերի անձնական տվյալները և նույնիսկ ձայնագրել երեխաների ձայնը։ Այս մասին հայտնում է 404 Media կայքը՝ հղում անելով Google-ի ներքին տվյալների բազային:
Այս տվյալների բազայում ներկայացված տվյալների համաձայն՝ 2013-2018 թվականներին Google-ի աշխատակիցները գրանցել են օգտատերերի անձնական տվյալների պահպանման և օգտագործման հազարավոր դեպքեր։ Օրինակ՝ միջադեպերից մեկը կապված է օգտատերերի էլեկտրոնային նամակների պահպանման հետ՝ առանց այդ օգտատերերի իմացության։
Բացի դրանից՝ փաստաթղթերում նշվում է Waze-ի օգտատերերի հասցեների բացահայտումը, YouTube-ում առաջարկությունների ցուցադրումը` հիմնված կայքերը դիտելու ջնջված պատմության վրա, և ավելի քան մեկ միլիոն օգտատերերի (ներառյալ երեխաների) էլփոստի հասցեների գաղտնազերծումը Socratic կրթական հավելվածում:
Google-ի ներկայացուցիչը Daily Mail-ին հաստատել է որոշ տեղեկություններ, սակայն պարզաբանել է, թե հաշվետվությունները հնացել են, քանի որ դրանք կազմվել են վեց տարի առաջ:
Հիշեցնենք, որ չորս տարի առաջ ԱՄՆ-ում հայց էր ներկայացվել Google-ի մայր ընկերության՝ Alphabet Inc.-ի դեմ: Կորպորացիան մեղադրվում էր տարբեր հավելվածների օգտատերերին լրտեսելու մեջ, նույնիսկ երբ թույլտվություններն անջատված են եղել։ Տվյալների հավաքումն իրականացվել էր նույնիսկ այն ժամանակ, երբ ինտերնետ դիտարկիչը կիրառվել էր ինկոգնիտո ռեժիմում։
Հետևեք NEWS.am Tech-ին Facebook-ում և Twitter-ում