ԱՄՆ մի քաղաքացի, օգտվելով Apple-ի երաշխիքային ծառայությունից, կեղծ iPhone-ներ և iPad-ներ է վերադարձրել ընկերությանը՝ պատճառելով 6 մլն դոլարի վնաս։ Հանցավոր սխեման բացահայտվել է, իսկ նա դատապարտվել ավելի քան չորս տարվա ազատազրկման:
Ժիվեյ «Ալլեն» Լիաոն և նրա հանցակիցները Չինաստանից ներմուծել են Apple-ի կեղծ ապրանքներ, ապա դրանց վրա տեղադրել Apple-ի իսկական սերիական համարներ, այնուհետև վերադարձրել են կեղծ ապրանքները Apple-ի խանութներ՝ պնդելով, թե դրանք թերություններ ունեն։
Apple-ի երաշխիքային ծառայությունը, հիմնվելով սերիական համարների վրա, հնարավորություն է տվել կեղծ ապրանքները փոխարինել իսկական iPhone-ներով և iPad-ներով: Այնուհետև Լիաոյի խումբը վաճառել է օրիգինալ սարքերը Չինաստանում՝ ստանալով բարձր շահույթ։ Հանցավոր այս սխեմայի իրագործման հետևանքով Apple-ի վնասը գերազանցել է 6 միլիոն դոլարը:
Զանգվածային խարդախության կազմակերպման համար ձերբակալված Լիաոն դատապարտվել է 51 ամսվա ազատազրկման: Իշխանությունները բռնագրավել են նրա ակտիվները, այդ թվում՝ տներ, կանխիկ գումար և Apple-ի ավելի քան 200 սարք:
Սա առաջին նման դեպքը չէ ԱՄՆ-ում։ Ավելի վաղ հաղորդվել էր, որ ԱՄՆ-ում խարդախները 3 մլն դոլարի 2700 կեղծ iPhone են փոխանակել իսկականով։
Հետևեք NEWS.am Tech-ին Facebook-ում և Twitter-ում