Նոր iOS 17.1-ում հայտնվել է App Store խանութը շրջանցելու միջոցով iPhone-ում հավելվածներ տեղադրելու՝ շատ օգտատերերի համար երկար սպասված հնարավորություն։ Եթե նախկինում iPhone-ում IPA փաթեթներ (հավելվածը տեղադրող ֆայլ) տեղադրելը պահանջում էր համակարգչի և հատուկ iMazing ծրագրի օգնությունը, ապա այժմ տեղադրման գործընթացը շատ ավելի պարզ է դարձել։
Այժմ, երրորդ կողմի հավելվածն iPhone-ում տեղադրելու համար անհրաժեշտ է ներբեռնել այն «.IPA» ձևաչափով և AirDrop-ի միջոցով այն Mac համակարգչից փոխանցել iPhone-ին: Սմարթֆոնի վրա ոչ մի ծանուցում չի հայտնվի, սակայն հավելվածն ավտոմատ կերպով հետին ֆոնի ռեժիմում կտեղադրվի սարքի վրա, իսկ դրա պատկերակը կհայտնվի աշխատասեղանին կամ հավելվածների պատկերասրահում:
Այս կերպ հնարավոր կլինի տեղադրել հավելվածներ, որոնք այս կամ այն պատճառով հեռացվել են App Store-ից կամ ընդհանրապես չեն հայտնվել այնտեղ։ Կարևորը սմարթֆոնի ծրագրակազմը մինչև iOS 17.1 թարմացնելն է: Այս կերպ տեղադրված հավելվածը պետք է աշխատի առանց խնդիրների։
iGuides Telegram ալիքը հայտնում է, որ դրա հեղինակներից մեկն այս եղանակով SBOL հավելվածը հաջողությամբ տեղադրել է iPhone 12 mini սմարթֆոնում։ Միևնույն ժամանակ, այս եղանակով տեղադրված հավելվածները հնարավոր չի եղել գործարկել iPhone 15 Pro Max-ի վրա։ Այս սահմանափակումների պատճառները դեռ հայտնի չեն։
Հետաքրքիր է, որ Apple-ն ինքը դեռ չի մեկնաբանել կամ լուսաբանել iOS 17.1-ում առկա այս նորամուծությունը, և դրա մասին փաստորեն հայտնի է դարձել Telegram-ի ալիքներից։
Հետևեք NEWS.am Tech-ին Facebook-ում և Twitter-ում