Որոշ նշաններ կարող են վկայել այն մասին, որ սմարթֆոնն արդեն ծառայել է իր նպատակին և շուտով կդադարի աշխատել։
Հիմնական «ախտանիշներից» մեկը, որին պետք է ուշադրություն դարձնել, սարքի պատահական անջատվելն է նույնիսկ այն դեպքում, երբ բավարար լիցք կա: Եթե ձեր սմարթֆոնն ինքնուրույն անջատվում է առանց որևէ ակնհայտ պատճառի, դա կարող է վկայել մայր պլատայի, հիշողության, պրոցեսորի կամ այլ կարևոր բաղադրիչների անսարքության մասին, կարծում է ՏՏ տեխնոլոգիաների փորձագետ և տեխնոլոգիական բլոգեր Վիկտոր Սմիրնովը։
Պետք է նաև ուշադրություն դարձնել ցիկլային վերագործարկմանը, երբ սարքն ինքնուրույն վերագործարկվում է առանց օգտագործողի կողմից նման հրահանգ ստանալու: Եթե դա տեղի է ունենում պարբերաբար, ապա դա կարող է վկայել ապարատային բաղադրիչների հետ կապված խնդիրների մասին:
Հեռախոսի հնարավոր խափանման մեկ այլ «ախտանիշ» է այն, երբ հեռախոսը նորմալ չի միանում։ Եթե սմարթֆոնը չի կարողանում հաջողությամբ միանալ և էկրանը սառում է այն պահին, երբ երևում է ընկերության պատկերանշանը, ապա դա կարող է վկայել ծրագրային ապահովման կամ ապարատային բաղադրիչների հետ կապված խնդիրների մասին։
Բացի այս նշաններից, պետք է նաև ուշադրություն դարձնել մարտկոցի աշխատանքի հնարավոր անոմալիաներին, կատարողականի անսպասելի անկմանը և տեսախցիկի կամ սենսորային էկրանի ֆունկցիոնալության հետ կապված խնդիրներին:
Ի՞նչ անել, եթե ձեր սմարթֆոնում նկատում եք թվարկված խնդիրները:
Սմարթֆոնի վերանորոգումը սպասարկման կենտրոնում, ըստ Սմիրնովի, նպատակահարմար է հիմնականում թանկարժեք և նոր մոդելների դեպքում։ Այնուամենայնիվ, բյուջետային սարքերի համար այս մոտեցումը կարող է արդյունավետ չլինել, քանի որ մասերի և աշխատանքի արժեքը կարող է ավելի բարձր լինել, քան այսպիսի օգտագործված սարքի արժեքը:
Բյուջետային սմարթֆոնների սեփականատերերին խորհուրդ է տրվում կապ հաստատել սպասարկման կենտրոնի հետ միայն այն դեպքում, եթե վարպետն ունի դոնոր հեռախոս, որից կարող է վերցնել վերանորոգման համար անհրաժեշտ բաղադրիչները: Հակառակ դեպքում, ավելի խելամիտ կարող է լինել գնել նոր սարք, քան այն վերանորոգել։
Հետևեք NEWS.am Tech-ին Facebook-ում և Twitter-ում