Վերջին տարիներին բջջային հավելվածները մեր առօրյայի անբաժանելի մասն են դարձել՝ սոցիալական ցանցերի հարթակներից մինչև բանկային և առողջապահական հավելվածներ։ Մենք դժվար թե կարողանանք պատկերացնել մեր կյանքը առանց դրանց: Այնուամենայնիվ, հավելվածների նկատմամբ կախվածության աճին զուգահեռ առաջանում են նաև գաղտնիության և տվյալների անվտանգության խնդիրներ: Օգտատերերն ավելի ու ավելի շատ անձնական տեղեկություններ են կիսում հավելվածների հետ, և այդ նույն հավելվածների մութ կողմն ավելի մեծ խնդիր է դառնում:
Գաղտնիության խնդիրներ. ի՞նչ տեղեկություններ ենք մենք կիսումԵրբ օգտատերերը ներբեռնում և տեղադրում են հավելվածներ, նրանք հաճախ հասանելիության տարբեր թույլտվություններ են տալիս դրանց՝ առանց դրա հետևանքները լիովին հասկանալու: Այդ թույլտվությունները կարող են ներառել հասանելիություն սարքի տեսախցիկին, խոսափողին, կոնտակտներին, գտնվելու վայրի մասին ինֆորմացիային և այլն: Թեև որոշ թույլտվություններ անհրաժեշտ են հավելվածի աշխատանքի համար, մյուսները կարող են անպատշաճ լինել և գաղտնիության հետ կապված խնդիրներ առաջացնել:
Իրական վտանգը հավելվածների մշակողների և երրորդ անձանց կողմից օգտատերերի տվյալների սխալ մշակման կամ չարտոնված փոխանակման հետ է կապված: Օրինակ՝ անձնական տեղեկությունները, ինչպիսիք են օգտատիրոջ սովորությունները համացանցում, թե ինչ կայքեր է նա այցելում, ինչ գնումների է նախապատվություն տալիս և նույնիսկ առողջության վերաբերյալ տվյալները, հաճախ հավաքվում և օգտագործվում են նպատակային գովազդի համար կամ վաճառվում տվյալների բրոքերներին: Սա կարող է հանգեցնել նրան, որ օգտատիրոջը նպատակային ձանձրացնող գովազդ ցուցադրվի, կամ հնարավոր է, որ արտահոսեն նրա տվյալները, ինչի հետևանքով օգտատերերը ենթարկվում են իրենց անձնական տվյալների գողության և այլ կիբեռհանցագործությունների ռիսկին:
Տվյալների անվտանգության ռիսկեր. խոցելիություններ և շահագործումԲջջային հավելվածներում պահվող տվյալների անվտանգության խնդիրն ավելի լուրջ է, քան կարող է թվալ առաջին հայացքից։ Կիբեռհանցագործները մշտապես փնտրում են խոցելի տեղեր, որոնք թույլ են տալիս նրանց հասանելիություն ստանալ օգտատերերի գաղտնի տեղեկություններին: Թույլ կոդավորումը, անապահով API-ները և տվյալների պաշտպանության անբավարար միջոցները կարող են հավելվածները հեշտ թիրախ դարձնել հաքերների համար:
Ավելին, կեղծ կամ վնասակար հավելվածները, որոնք քողարկված են իրականի ներքո, աճող մտահոգություն են առաջացնում: Օգտատերերը կարող են անգիտակցաբար ներբեռնել այս հավելվածները՝ վտանգի տակ դնելով իրենց սարքերն ու տվյալները: Տեղադրվելուց հետո վնասակար հավելվածները կարող են գողանալ գաղտնի տվյալները, հետևել օգտատիրոջ գործունեությանը և նույնիսկ սարքի վերահսկողությունն իրենց ձեռքը վերցնել:
Ի՞նչ անելԱյս բոլոր խնդիրներից խուսափելու համար օգտատերերին խորհուրդ է տրվում զգույշ լինել հավելվածներին թույլտվություններ տրամադրելիս և պարբերաբար ստուգել արդեն իսկ տրամադրվածները: Հավելվածների տեղադրումը միայն վստահելի աղբյուրներից և ակնարկներ կարդալը նույնպես կարող է օգնել ձեզ, որպեսզի խուսափեք վնասակար հավելվածներից:
Հավելվածների մշակողների համար տվյալների գաղտնիության և անվտանգության առաջնահերթությունը պետք է լինի հավելվածի մշակման հիմնարար ասպեկտը: Ուժեղ գաղտնագրման, անվտանգության կանոնավոր ստուգումների և գաղտնիության կանոնակարգերի պահպանումը կարող է զգալիորեն նվազեցնել տվյալների արտահոսքի հետ կապված ռիսկերը:
Հետևեք NEWS.am Tech-ին Facebook-ում և Twitter-ում