Իլոն Մասկը ցանկանում է տիեզերք արձակել մեկ միլիոն ԱԲ-արբանյակ. Ահա թե ինչպես SpaceX-ը կարող է իրականացնել դա

SpaceX-ը և դրա հիմնադիր Իլոն Մասկը ակտիվորեն առաջ են մղում արհեստական բանականության համար ուղեծրային տվյալների մշակման կենտրոնների (դատա-կենտրոնների) ամբողջական ցանց ստեղծելու հավակնոտ գաղափարը։ X հարթակում հրապարակված նոր՝ կեսժամանոց տեսանյութում Մասկը մանրամասն պատմել է մասնագիտացված ԱԲ-արբանյակների հսկայական խմբավորում արձակելու ընկերության պլանների մասին։

Մտահղացման մասշտաբը

Մասկի խոսքով՝ SpaceX-ը մտադիր է ուղեծիր դուրս բերել մինչև մեկ միլիոն արբանյակ՝ հագեցած ԱԲ խնդիրների համար նախատեսված հզոր հաշվողական մոդուլներով։ Յուրաքանչյուր սարք կունենա արևային վահանակների մեծ մակերես, ջերմության հեռացման համար ռադիատորների արդյունավետ համակարգ և բարձր արագության լազերային կապի կապուղիներ։ Այս արբանյակները կկարողանան աշխատել Starlink-ի գոյություն ունեցող ցանցի հետ սերտ ինտեգրմամբ։

Ընկերությունն արդեն մշակում է Gigasat մասնագիտացված գործարանը, որը պետք է սկսի աշխատանքը մինչև 2027 թվականի վերջը և դուրս գա արտադրության զգալի ծավալների։ Մասկն այս ուղղությունն անվանել է առանցքայիններից մեկը SpaceX-ի ապագայի համար։

Տեխնիկական հնարավորությունները

Յուրաքանչյուր ԱԲ-արբանյակ գեներացնելու է մինչև 150 կՎտ էներգիա պիկային ռեժիմում և 120 կՎտ՝ մշտական։

Արձակումները պլանավորվում է իրականացնել Starship ծանր հրթիռի օգնությամբ։

Բորտում տեղադրվելու են հաշվողական մոդուլներով կանգնակներ (ստոյկաներ), որոնք միմյանց և այլ արբանյակների հետ միացված կլինեն լազերային կապուղիներով։

Տվյալները կկարողանան Երկիր փոխանցվել ինչպես ավանդական անտենաների, այնպես էլ հարաբերականորեն ցածր ուշացմամբ լազերային կապուղիների միջոցով։

Մասկն ընդգծել է, որ անհրաժեշտ տեխնոլոգիաների մեծ մասն արդեն իսկ մշակվել է Starlink V3 արբանյակների ստեղծման ժամանակ.

«Մենք չենք կարծում, որ դա գերբարդ խնդիր է՝ համեմատած այն ամենի հետ, ինչ մենք արդեն անում ենք»։

Ինչու հենց տիեզերքը

Հիմնական գաղափարն այն է, որ երկրային տվյալների մշակման կենտրոնները բախվում են լուրջ սահմանափակումների՝ ֆիզիկական տարածության պակաս, էլեկտրաէներգիայի և ջրի հսկայական ծախս, ինչպես նաև տեղական համայնքների դիմադրություն։ Տիեզերքում այս խնդիրները զգալիորեն քիչ են. Արեգակից ստացվող էներգիան բավարար է, իսկ հովացումը կարելի է արդյունավետորեն կազմակերպել վակուումում։

SpaceX-ի առավելությունները

Մասկը վստահ է, որ SpaceX-ն ունի արբանյակային հսկայական համաստեղությունների կառավարման եզակի փորձ։ Այսօրվա դրությամբ ուղեծրում աշխատում է Starlink-ի ավելի քան 10 հազար սարք։ Սա ընկերությանը լուրջ առավելություն է տալիս մրցակիցների նկատմամբ։

«Մենք լավ պատկերացում ունենք այն մասին, թե ինչպես կառավարել իսկապես խոշոր համաստեղությունները և անել դա անվտանգ։ Մենք միակ օպերատորն ենք, որն ունի նման մասշտաբի փորձ»։

Արձագանքը և համատեքստը

SpaceX-ի պլանները տեղավորվում են ուղեծրային տվյալների մշակման կենտրոնների համար մղվող գլոբալ մրցավազքի մեջ։ Նմանատիպ նախագծեր մշակում են Google-ը, Blue Origin-ը, Microsoft-ը և մի շարք ստարտափներ։ Սակայն հենց SpaceX-ն է ընդգծում մոտակա տարիներին նախագծի իրականացմանը իր պատրաստ լինելը։

Պլանների մասին հայտարարությունը հնչել է SpaceX-ի՝ IPO-ի պատրաստվելու ֆոնին։ Ընկերությունը պլանավորում է տեղաբաշխել բաժնետոմսերը մեկ միավորի դիմաց 135 դոլար գնով, ինչը նրան կտա ավելի քան 1,75 տրիլիոն դոլարի գնահատական։ Ուղեծրային տվյալների մշակման կենտրոնները և xAI-ի հետ համագործակցությունը Մասկը դիտարկում է որպես աճի առանցքային շարժիչներ։

Կարճ ասած

Իլոն Մասկը և SpaceX-ը պլանավորում են արձակել մինչև մեկ միլիոն մասնագիտացված ԱԲ-արբանյակ՝ ուղեծրային տվյալների մշակման կենտրոններ ստեղծելու համար։ Յուրաքանչյուր սարք կստանա հզոր արևային վահանակներ, հովացման համակարգ և լազերային կապի կապուղիներ։ Արտադրությունը կենտրոնացված կլինի նոր Gigasat գործարանում, իսկ արձակումները՝ Starship հրթիռով։ Գաղափարը լուծում է էներգատար երկրային դատա-կենտրոնների խնդիրները և պետք է դառնա կարևոր քայլ ԱԲ-ենթակառուցվածքի զարգացման գործում։ SpaceX-ն ակնկալում է հաջողություն մասշտաբային IPO-ի նախաշեմին։