RISE՝ հարթակ, որը միավորում է ճարտագիտությունը, ռազմարդյունաբերությունը, գիտությունը և նորարարությունը

Հունիսի 3-4-ը Երևանում անցկացված RISE ֆորումը պետք է դառնա ոչ միայն հայկական ընկերությունների ձեռքբերումների ցուցահանդես, այլ հարթակ, որտեղ կհայտնվեն նոր գործընկերություններ, գաղափարներ և իրական պայմանագրեր։ Միջոցառման կազմակերպիչները հենց նման խնդիր են դրել իրենց առջև։ Այս մասին NEWS.am Tech-ի հետ զրույցում պատմել է Հայաստանի Տեղեկատվական և հաղորդակցության տեխնոլոգիաների (ՏՀՏ) գործատուների միության գործադիր տնօրեն Էդուարդ Մուսայելյանը։

Նրա խոսքով՝ ֆորումի գլխավոր արժեքը ոչ միայն արդեն ստեղծված արտադրանքի ցուցադրությունն է, այլև երկրի տեխնոլոգիական էկոհամակարգի մասնակիցներին միավորելն ու միմյանց գտնելու հարցում նրանց օգնելը։

«Մեր գլոբալ նպատակն ու ակնկալիքը RISE-ից այն է, որ այն դառնա հաբ, որտեղ տեղի են ունենում իրական գործարքներ, որտեղ ձևավորվում են իսկական գործընկերություններ։ Դեռ վաղ է խոսել այն մասին, թե հատկապես ինչպիսի համագործակցություններ կհայտնվեն, բայց եթե մենք ճիշտ հիմք դնենք հիմա, ապա արդեն այս տարվանից, և առավել ևս հաջորդ տարիներին, կկարողանանք տեսնել արդյունքները»,- նշել է նա։

Ավելի քան 40 ընկերություն մեկ հարթակում

Ֆորումում, որի տեղեկատվական գործընկերն է NEWS.am Tech-ը, ներկայացված էին ավելի քան 40 առաջատար ընկերություններ և կազմակերպություններ, որոնք աշխատում են ռազմական արդյունաբերության, ինժեներիայի, կրթության և գիտական հետազոտությունների ոլորտներում։

Մուսայելյանի խոսքով՝ ցուցադրության առանձնահատկությունն այն է, որ այստեղ կարելի է տեսնել ինչպես արդեն պատրաստի արտադրանքներ, այնպես էլ մշակումներ, որոնք դեռևս գտնվում են ստեղծման տարբեր փուլերում։

Սակայն կազմակերպիչների համար ոչ պակաս կարևոր է մեկ այլ բան՝ ապահովել փոխգործակցությունը հենց մասնակիցների միջև։

«Մեր նպատակն է ստեղծել փոխգործակցության ամբողջական շղթա, որպեսզի ընկերությունները շփվեն միմյանց հետ, իմանան, թե ով ինչ տեխնոլոգիաներով է զբաղվում, հասկանան միմյանց հնարավորությունները։ Ինչո՞ւ հենց այստեղ չհայտնվեն նոր գաղափարներ և համագործակցության նոր ձևաչափեր»,- ասում է նա։

Ցուցահանդեսում կենտրոնական տեղ են զբաղեցնում ռազմաարդյունաբերական համալիրի ընկերությունները։ Նրանց արտադրանքի մի մասն արդեն ցուցադրվել էր նախկինում, սակայն շատ մշակումներ լայն լսարանին ներկայացվում են առաջին անգամ։ Որոշ նախագծեր դեռևս գտնվում են մշակման փուլում և օգտագործում են ֆորումը որպես հնարավորություն՝ իրենց մասին պատմելու և պոտենցիալ գործընկերներ գտնելու համար։

Ինչո՞ւ են ռազմական արդյունաբերությունը, կիբերանվտանգությունը և ինժեներիան հայտնվել կողք կողքի

RISE-ի առանձնահատկություններից մեկը դարձավ մեկ հարթակի տակ միանգամից մի քանի ուղղությունների՝ ռազմական արդյունաբերության, ինժեներիայի, գիտության, նորարարությունների և կիբերանվտանգության միավորումը։

Մուսայելյանի խոսքով՝ սա պատահական ընտրություն չէ։ Նա համոզված է, որ ժամանակակից ռազմական տեխնոլոգիաներն անհնար է դիտարկել առանձին՝ մյուս բարձր տեխնոլոգիական ճյուղերից։ Ավելին, առաջին անգամ այս բոլոր ուղղությունները հավաքվել են միասին մեկ հարթակի շրջանակներում։

«Կիբերանվտանգությունն այսօր ժամանակակից պաշտպանական համակարգի բաղադրիչներից մեկն է և ազգային անվտանգության հարց։ Ժամանակակից ռազմական արդյունաբերությունը տեխնոլոգիական ոլորտ է։ Մենք չենք ուզում բաժանել այս ուղղությունները։ Ընդհակառակը, մենք ուզում ենք կամուրջ դառնալ դրանց միջև»,- պարզաբանել է նա։

Հենց այդ պատճառով էլ ֆորումը մտահղացվել է որպես մի տարածություն, որտեղ տարբեր ոլորտների ներկայացուցիչներ կարող են փոխգործակցել և գտնել շփման եզրեր։

Այցելուները չէին շտապում հեռանալ

Հետաքրքրությունը միջոցառման նկատմամբ բարձր էր։ Մուսայելյանը պատմել է, որ կազմակերպիչները դա տեսնում են ոչ միայն գրանցված մասնակիցների և այցելուների քանակով, այլև հենց հարթակում մարդկանց արձագանքով։

«Մի փոքր գաղտնիք բացեմ. ֆորումի ժամանակ շատերը բառացիորեն սպասում էին ելույթների ավարտին, որպեսզի նորից իջնեն ցուցահանդեսային գոտի և շարունակեն դիտումը։ Դա նշանակում է, որ նրանց ժամանակը չի հերիքել ամեն ինչ տեսնելու, շոշափելու, հասկանալու և ուսումնասիրելու համար»,- նշել է նա։

Միջոցառման հաջողությունը կազմակերպիչները նախատեսում են գնահատել մի քանի չափանիշներով։ Դրանց թվում են՝ այցելուների թիվը, նոր կոնտակտների ու գործընկերությունների քանակը մասնակիցների միջև, ինչպես նաև հյուրերի արձագանքները ներկայացված արտադրանքների և հենց ֆորումի մասին։

Ֆորում, որը պետք է դառնա մշտական

Չնայած ներկայիս RISE-ը դարձավ նման ձևաչափի առաջին միջոցառումը Հայաստանում, կազմակերպիչները հույս ունեն այն դարձնել պարբերական։

«Մենք հուսով ենք, որ ֆորումը շարունակություն կունենա, որովհետև իսկապես կարծում ենք, որ կարող ենք դառնալ տեխնոլոգիական հաբ տարածաշրջանի քարտեզի վրա՝ մի վայր, որտեղ ծնվում են նոր գաղափարներ, կնքվում են գործարքներ և ստեղծվում են մրցունակ արտադրանքներ»,- ասել է նա։

Միևնույն ժամանակ կազմակերպիչներն ընդգծում են, որ իրենց նպատակը պարզապես հերթական միջոցառման անցկացումը չէ։ Գլխավորն այն է, որ այն իրական օգուտ բերի ընկերություններին և այցելուներին։

Մուսայելյանը վստահ է, որ եթե տեխնոլոգիական հատվածը շարունակի զարգանալ ներկայիս տեմպերով, արդեն առաջիկա տարիներին կազմակերպիչները ստիպված կլինեն ավելի ընդարձակ հարթակ փնտրել նման միջոցառումների անցկացման համար. այսօր Մարզահամերգային համալիրը թույլ է տալիս ներկայացնել ոլորտի առաջատար ընկերություններին, սակայն ապագայում այս տարածությունը կարող է անբավարար լինել։

«Ես միայն ուրախ կլինեմ, եթե այս վայրը մեզ այլևս չհերիքի։ Դա կնշանակի, որ ընկերություններն ավելացել են, որ ոլորտը աճում է, և որ մեզ պետք է ստեղծել էլ ավելի հետաքրքիր ու մասշտաբային միջավայր զարգացման համար»,- եզրափակել է նա։