Apple-ը ներկայացրել է նոր iPad Air՝ M4 չիպով և 12 ԳԲ օպերատիվ հիշողությամբ

Բյուջետային iPhone 17e-ի հետ մեկտեղ Apple ընկերությունը հայտարարեց թարմացված iPad Air-ի մասին. այժմ սա արդեն պարզապես «միջին» պլանշետ չէ, այլ լիարժեք սարք՝ ֆլագմանային «երկաթով»: Գլխավոր նորույթը M4 պրոցեսորն է, որը նախկինում տեղադրվում էր միայն Pro մոդելներում և MacBook-ներում: Այս մասին Apple-ը հայտնել է պաշտոնական մամուլի հաղորդագրության մեջ:

Ի՞նչ կա ներսում. M4 և ավելի շատ հիշողություն

iPad Air-ի M4 չիպը ներառում է 8 CPU միջուկ, 9 GPU միջուկ և 16-միջուկանի նեյրոպրոցեսոր (NPU): Ըստ Apple-ի տվյալների՝ M3-ով նախորդ սերնդի համեմատ արտադրողականությունն աճել է 30 %-ով, իսկ M1 չիպով iPad Air-ի համեմատ՝ 2,3 անգամ: Օպերատիվ հիշողության ծավալը 8-ից դարձել է 12 ԳԲ. սա զգալիորեն կարագացնի աշխատանքը ծանր հավելվածների հետ, բազմախնդրությունը (multitasking) և ԱԲ բոլոր գործառույթները:

Հայտնվել են նաև Apple N1 (Wi-Fi) և C1X (բջջային կապ) մոդեմները, որոնք արդեն տեղադրված են iPhone Air-ում: Wi-Fi 7-ը ապագայի ստանդարտ է. այն տալիս է ավելի բարձր արագություն և կայունություն ծանրաբեռնված ցանցերում: Գլոբալ մարքեթինգի գծով փոխնախագահ Բոբ Բորչերսը նշել է. «M4 չիպի արտադրողականության, ԱԲ հնարավորությունների և iPadOS 26-ի գործառույթների համադրությունը Air-ի ընթացիկ սերունդը դարձնում է օպտիմալ լուծում ստեղծագործելու և արդյունավետ աշխատանքի համար»:

Էկրան, դիզայն և գույներ

Էկրանը մնացել է նույնը՝ 11 կամ 13 դյույմ, Liquid Retina (IPS LCD), 60 Հց, True Tone, P3: Շրջանակները բարակ են, կառուցվածքը՝ ալյումինե. դիզայնում հեղափոխություններ չկան: Փոխարենը ավելացվել են չորս ոճային գույներ՝ Space Grey, Blue, Purple և Starlight: Հիշողությունը՝ 128 ԳԲ-ից մինչև 1 ՏԲ: Apple Pencil Pro-ի և Magic Keyboard-ի աջակցությունը պահպանվել է:

Գին և վաճառքի մեկնարկ

• 11-դյույմանոց iPad Air (Wi-Fi, 128 ԳԲ) — սկսած $599-ից
• 13-դյույմանոց iPad Air (Wi-Fi, 128 ԳԲ) — սկսած $799-ից
• Առավելագույն տարբերակը բջջային կապով և 1 ՏԲ հիշողությամբ — մինչև $1449 Վաճառքի մեկնարկը՝ 2026 թվականի մարտի 11: Նախապատվերները կբացվեն առաջիկա օրերին:

Ու՞մ կհամապատասխանի այս iPad Air-ը

Սա արդեն պարզապես «սերիալներ նայելու և նշումներ անելու պլանշետ» չէ: M4-ով, 12 ԳԲ RAM-ով և հզոր NPU-ով այն հիանալի կկատարի տեսանյութերի մոնտաժը, գրաֆիկական աշխատանքները, 3D մոդելավորումը, խաղերն ու iPadOS 26-ի ԱԲ բոլոր գործիքները: Ընդ որում, այն զգալիորեն էժան է iPad Pro-ից: Եթե Ձեզ անհրաժեշտ է հզոր պլանշետ՝ առանց OLED-ի, 120 Հց-ի և հավելյալ միջուկների համար հավելավճարի, սա 2026 թվականի գարնան ամենաշահավետ տարբերակներից մեկն է:

Կարճ ասած

Apple-ը թարմացրել է iPad Air-ը. այժմ M4 (8 CPU + 9 GPU + 16 NPU), 12 ԳԲ RAM, N1 և C1X մոդեմներ, Wi-Fi 7: Էկրանը՝ 11 կամ 13 դյույմ, գույները՝ Space Grey, Blue, Purple, Starlight: Գինը՝ սկսած $599-ից (11") և $799-ից (13") բազային տարբերակի համար: Վաճառքը մեկնարկում է 2026 թվականի մարտի 11-ին: Սա պատմության մեջ ամենահզոր Air-ն է՝ գնի և արտադրողականության հիանալի հավասարակշռություն ստեղծագործելու և աշխատանքի համար: