Արեգակի վրա հիպերակտիվ բծերից հզոր բռնկումներ են տեղի ունեցել (տեսանյութ)

AR3663 կոչվող արեգակնային բիծը և նրա ավելի մեծ «եղբայրը»՝ AR3664-ը վերջերս առավել ակտիվ են և առաջացնում են ավելի ու ավելի շատ բռնկումներ, որոնց ժամանակ տեղի են ունենում կորոնային զանգվածի արտանետումներ:

AR3663-ը համարվում է արեգակնային 25-րդ ցիկլի ամենաակտիվ արեգակնային բիծը։ Վերջին մի քանի օրվա ընթացքում դրանից արդեն առաջացել է X դասի հզոր բռնկում, որն իր հերթին առաջացրել է X-բռնկում։ AR3664-ն իր հերթին առաջացրել է X-բռնկում և մի քանի M դասի արևային բռնկում: Գիտնականների կարծիքով՝ երկու բծերն էլ մոտ ապագայում չեն «հանգստանալու»՝ քանի որ մոտենում ենք արեգակնային առավելագույնին՝ մոտ 11-ամյա արեգակնային ցիկլի ամենաակտիվ շրջանին, և դրանով պայմանավորված՝ ավելի ու ավելի շատ բռնկումներ կլինեն։

Ըստ spaceweather.com-ի՝ մայիսի 3-ից ի վեր AR3663-ն առաջացրել է հինգ X դասի և ավելի քան 20 M դասի արևային բռնկում, ինչը շատ ավելին է, քան ցանկացած այլ արևային բծի դեպքում վերջին յոթ տարվա ընթացքում: Մայիսի 7-ին և 8-ին արեգակնային այս բիծը նույնպես շատ ակտիվ է եղել։

Միևնույն ժամանակ, AR3664-ն ընդամենը 48 ժամում ավելի քան կրկնապատկվել է իր չափերով՝ դառնալով արևային այս ցիկլում նկատված ամենամեծ արևային բծերից մեկը: Ըստ ԱՄՆ Օվկիանոսների և մթնոլորտի ազգային վարչության Տիեզերական եղանակի կանխատեսման կենտրոնի աճը վկայում է այն մասին, որ առաջիկա օրերին հնարավոր են արևային ավելի հզոր բռնկումներ։

Հիշեցնենք, որ արևային բռնկումները Արեգակի մակերևույթի վրա տեղի ունեցող ժայթքումներն են, որոնք արձակում են էլեկտրամագնիսական ճառագայթման ինտենսիվ պայթյուններ: Դրանք առաջանում են, երբ արեգակնային մթնոլորտում կուտակված մագնիսական էներգիան արձակվում է։ Արեգակնային բռնկումներն ըստ չափերի բաժանվում են տառային խմբերի, որոնցից ամենահզորը X դասն է: Այնուհետև M դասի բռնկումներն են, որոնք 10 անգամ ավելի քիչ հզոր են, քան X դասի բռնկումները, դրանց հաջորդում են C դասի բռնկումները, որոնք 10 անգամ ավելի թույլ են, քան M դասի բռնկումները։ B դասի բռնկումները 10 անգամ ավելի թույլ են, քան C դասի բռնկումները, իսկ A դասի բռնկումները 10 անգամ ավելի թույլ են, քան B դասի բռնկումները և Երկրի վրա նկատելի ազդեցություն չունեն: Յուրաքանչյուր դասի ներսում 1-ից 10 թվերը (և ավելի բարձր՝ X դասի բռնկումների դեպքում) նկարագրում են բռնկման հարաբերական ուժը: