Apple M4 չիպի վրա հիմնված նոր Mac-երը կստանան մինչև 512 ԳԲ միասնական հիշողություն․ M4-ի թողարկումն սպասվում է 2024-ի վերջին

Apple-ն իր Mac համակարգիչների շարքը M4 պրոցեսորներով կսկսի թարմացնել 2024-ի վերջին, իսկ M4 չիպը կկենտրոնանա արհեստական բանականության (ԱԲ) հնարավորությունների կատարողականը բարելավելու վրա։ Նաև էապես կավելացվի M4 Mac-ի համակարգչի ընդհանուր հիշողության ծավալը, այս մասին ասել է Bloomberg-ի լրագրող Մարկ Գուրմանը:

Apple-ն անցյալ տարի M3, M3 Pro և M3 Max չիպերը ներկայացրեց հոկտեմբերին, ուստի միանգամայն հնարավոր է, որ M4 շարքը թողարկվի նույն ժամանակահատվածում: Գուրմանն ասել է, որ Mac-ի ողջ շարքը M4 չիպ պետք է ստանա 2024-ի վերջին կամ 2025-ի սկզբին:

M4 չիպերով սկզբում կթարմացվեն iMac-ը, ցածր դասի 14 դյույմանոց MacBook Pro-ն, բարձրակարգ 14-դյույմանոց MacBook Pro-ն, 16-դյույմանոց MacBook Pro-ն և Mac mini-ն, որին կհաջորդեն 13-դյույմանոց և 15-դյույմանոց MacBook-երը: Air մոդելները կհայտնվեն 2025-ի գարնանը, Mac Studio-ն՝ 2025-ի կեսերին, իսկ Mac Pro-ն՝ ավելի ուշ՝ 2025-ին:

Ակնկալվում է, որ M4 չիպը կունենա առնվազն երեք հիմնական տարբերակ, որոնք ունեն կոդային անուններ։ Օրինակ՝ Donan-ը կիրառվում է բազային տարբերակի համար, իսկ Brava-ն և Hidra-ն՝ մյուս երկուսի: Donan չիպը կօգտագործվի MacBook Pro-ում, MacBook Air-ում և Mac mini-ի բազային տարբերակներում, իսկ Brava չիպերը՝ բարձրակարգ MacBook Pro-ում և Mac mini-ում:

Hidra չիպը նախատեսված է Mac Pro-ի համար, ինչը ենթադրում է, որ այն Ultra կամ Extreme մակարդակի չիպ է: Ինչ վերաբերում է Mac Studio-ին, Apple-ը փորձարկում է M3 դարաշրջանի չթողարկված չիպի և M4 Brava պրոցեսորի տարբերակ, որն ակնկալվում է, որ ավելի բարձր մակարդակի կլինի, քան M4 Pro և M4 Max Brava չիպերը:

M4 Mac-ի աշխատասեղանի համակարգչի տարբերակները կարող են ստանալ մինչև 512 ԳԲ միասնական հիշողություն, ինչը նկատելի թռիչք կլինի ներկայիս 192 ԳԲ սահմանաչափից:

M4 չիպերը կկառուցվեն նույն 3 նմ պրոցեսի վրա, ինչ M3 չիպերը, սակայն Apple-ի մատակարար թայվանական TSMC ընկերությունը, հավանաբար, կօգտագործի 3 նմ պրոցեսի բարելավված տարբերակը՝ կատարողականությունը և էներգիայի ծախսի արդյունավետությունը բարելավելու համար: Apple-ը նախատեսում է նաև ավելացնել զգալիորեն բարելավված Neural Engine՝ արհեստական բանականության առաջադրանքների համար միջուկների ավելացված քանակով: