Զգուշացե՛ք անծանոթ հղումներից․ դրանք կարող են գողանալ ձեր գտնվելու մասին տվյալները, ձեր իսկ հեռախոսով գաղտնի լուսանկարել ու ձայնագրել

Որոշ չարագործներ օգտագործում են հատուկ հղումներ, որոնք ակտիվանալու դեպքում գողանում են սմարթֆոնի աշխարհագրական դիրքի տվյալները: Ավելին, դրանք կարող են այնպես անել, որ սմարթֆոնը գաղտնի լուսանկարի և ձայնագրություններ անի։ Այս մասին զգուշացնում է T.Hunter ընկերության տեղեկատվական-վերլուծական հետազոտությունների բաժնի ղեկավար Իգոր Բեդերովը։

Gazeta.Ru-ի հետ զրույցում մասնագետը նշել է, որ երբ հղումն ակտիվանում է, այն տուժողին ուղղորդում է կայք, որտեղ արդեն աշխատում է կոդը, որը սմարթֆոնից վերցնում է տեղեկություններ, որոնց միջոցով կարելի է որոշել դրա գտնվելու վայրը։ Այդ տեղեկությունները կարող են լինել ինչպես հենց GPS կոորդինատները, այնպես էլ մոտակա միացման կետերի տվյալները, IP հասցեն և այլն:

Մարդկանց «հետևող» հղումները, ըստ փորձագետի, ստեղծվում են հատուկ գեոլոգեր ծառայությունների միջոցով, ինչպիսիք են Seeker-ը, Trape-ը, TrackUrl-ը և այլն։

«Որոշ գեոլոգեր ծառայությունների ֆունկցիոնալությունը ներառում է հղումների ստեղծում, որոնք գաղտնի կերպով ակտիվացնում են սարքի տեսախցիկը կամ խոսափողը: Այս կերպ ձեռք բերված ֆայլերն ուղարկվում են այն սերվերներին, որոնց հասանելիություն ունեն հարձակվողները»,- նշել է մասնագետը։

Նման գեոլոգերների ստեղծած հղումները սովորաբար տարածվում են որպես ֆիշինգային կայքեր, որոնք ստեղծվում են այնպես, որպեսզի հետաքրքրեն պոտենցիալ զոհին։

«Օրինակ, եթե հարձակվողը գիտի, որ զոհը պատրաստվում է ճամփորդության կամ ցանկանում է նոր ավտոմեքենա գնել, նա կստեղծի կեղծ կայք, որտեղ վաճառվում են տուրեր կամ ավտոմեքենաներ: Հետո նա շահավետ առաջարկի պատրվակով հղումը կուղարկի այդ կայքին»,- բացատրել է փորձագետը։

Նրա խոսքով՝ այդ ծառայություններից օգտվում են ոչ միայն հարձակվողները, այլև իրավապահ մարմինների ներկայացուցիչներ, մասնավոր դետեկտիվներ, խանդոտ ամուսիններ և շատ ուրիշներ։ Իսկ գեոլոգերների կողմից վերահսկվելուց պաշտպանվելու համար խորհուրդ է տրվում հետևել նույն կանոններին, որոնք օգնում են պաշտպանվել համացանցային խաբեբաներից: Առաջին հերթին խորհուրդ է տրվում չհետևել կասկածելի, անհայտ ծագման հղումներին։