Աշխարհի ամենաթանկ հաշվիչը. Casio-ն սովորական հաշվիչը վերածել է արվեստի նմուշի

Casio-ն ներկայացրել է S100X-ը՝ մի հաշվիչ, որն արժե ավելի թանկ, քան շատ պրեմիում դասի գաջեթներ, և տեսքով հիշեցնում է ճապոնական մանրակերտ զարդատուփ: Նորույթը թողարկվել է ընդամենը 650 օրինակով սահմանափակ քանակությամբ, և դրանցից յուրաքանչյուրը գրեթե մեկ ամիս շարունակ պատրաստվել է ձեռքով: Ճապոնիայում դրա գինը 99,000 իեն է (մոտ 624 դոլար), ինչն արդեն իսկ այն դարձնում է պատմության մեջ ամենաթանկ սերիական հաշվիչը:

Ինչո՞ւ է այն այդքան թանկ

Արտաքուստ S100X-ը պարզապես հաշվիչ չէ, այլ իսկական արվեստի օբյեկտ: Իրանը ամբողջությամբ ֆրեզերացված է ալյումինից և պատված է ճապոնական ավանդական ուրուշի (urushi) լաքով. հենց նույն լաքով, որն օգտագործվում է թանկարժեք զարդատուփերի, սպասքի և հուշանվերների համար: Խորը սև փայլը՝ տաք կարմիր շեշտադրումներով, ձեռքով քսում է վարպետ Ռյուձի Ումեդան «Yamakyu Shitsuki» ընկերությունից, որն այս արհեստով զբաղվում է 1930 թվականից: Մեկ օրինակի վրա ծախսվում է մոտ մեկ ամիս աշխատանք. լաքը շերտ առ շերտ քսվում է, հղկվում և փայլեցվում:

Ներսում դասական 12-նիշանոց կապույտ գույնի LCD էկրան է, որը դիզայներները հատուկ նմանեցրել են ինքնահոս գրիչի թանաքին: Ֆունկցիոնալը պարզ է, բայց օգտակար. սովորական հաշվարկներ, արժույթի փոխարկիչ, հարկերի հաշվիչ: Սնուցումը կատարվում է ներկառուցված արևային վահանակից և մեկ մետաղադրամաձև մարտկոցից, որը բավականացնում է մինչև յոթ տարի՝ օրական մեկ ժամ օգտագործման դեպքում:

Ո՞ւմ համար է այս սարքը

S100X-ը հաշվարկների համար չէ: Սա հավաքածուի առարկա է նրանց համար, ովքեր գնահատում են ճապոնական արհեստը, մինիմալիզմը և ուշադրությունը դետալների նկատմամբ: Casio-ն գիտակցաբար այն դարձրել է լիմիտավորված՝ 650 հատ ամբողջ աշխարհի համար, յուրաքանչյուրը՝ ձեռքի լաքապատման եզակի նրբերանգներով: Այն կարելի է գնել միայն Ճապոնիայում, և, ամենայն հավանականությամբ, այն արագ կսպառվի կոլեկցիոներների և հազվագյուտ էլեկտրոնիկայի սիրահարների կողմից:

Համեմատության համար. մինչ այս պահը ամենաթանկ հաշվիչն արժեր մոտ 300–400 դոլար և պարզապես ոսկեջրած կամ զարդարված էր: S100X-ը արդեն այլ մակարդակ է. այն ոչ թե գաջեթ է, այլ արվեստի գործ, որը պատահաբար նաև հաշվել գիտի:

Կարճ ասած

Casio S100X-ը աշխարհի ամենաթանկ սերիական հաշվիչն է (99,000 իեն ≈ 624 դոլար): Ալյումինե իրանը պատված է ձեռքով արված ճապոնական ուրուշի լաքով. մեկ օրինակի վրա վարպետը ծախսում է մեկ ամիս: Թողարկվել է ընդամենը 650 հատ: Ներսում սովորական 12-նիշանոց էկրան է՝ արժույթի և հարկերի փոխարկիչով, արևային վահանակով և 7 տարի աշխատող մարտկոցով: Սա ֆունկցիոնալության մասին չէ, այլ հավաքածուի արժեքի և ճապոնական վարպետության: