Հայաստանում նախատեսվում է գիտական հարցերով զբաղվող խորհրդատվական մարմին ստեղծել։ Գիտության զարգացմանն աջակցող «Գիտուժ» նախաձեռնության կազմակերպած «Հայաստանի գիտատեխնոլոգիական և նորարարական ազգային համակարգ. խնդիրներից դեպի վերածնունդ» խորագրով առաջին համաժողովի ժամանակ ասել է Ազգային ժողովի փոխնախագահ Հակոբ Արշակյանը։
Նրա խոսքով՝ այս մարմինն աշխատելու է ԱՄՆ նախագահին կից գիտական խորհրդի նման, որն իրականում որոշում է գիտության զարգացման հետ կապված քաղաքական հարցերը։ Այս խորհրդում ընդգրկված կլինեն ապագայի որոշակի տեսլական ունեցող մարդիկ՝ գործարարներ, գիտնականներ, քաղաքական որոշումներ կայացնողներ։
Հայաստանում գիտական խորհրդատվական մարմինը կունենա 28 անդամ, և հենց այս մարմինը կկարողանա գիտության ոլորտի համար գլոբալ խնդիրներ ձևակերպել, պետական ծրագրեր առաջարկել, որոնք հետո կքննարկվեն կառավարությունում և այլն։ Ակնկալվում է, որ այս կառույցը յուրատեսակ հարթակ կդառնա իշխանության և գիտության ոլորտի միջև։
Ինչպես նշեց Արշակյանը, քանի որ խորհրդարանը ներկայումս զբաղված է բյուջեի քննարկմամբ, գիտական խորհրդատվական մարմնի հետ կապված հարցերը ժամանակավորապես հետին պլան են մղվել։ Սակայն բառացիորեն առաջիկա մի քանի օրվա ընթացքում այս նախագիծը, ըստ նրա, կհաստատվի, և համապատասխան հրամանագիրը կստորագրվի։
Հակոբ Արշակյանը նաև նշեց, որ զարգացած գիտությունը ուժեղ պետության և՛ հիմքն է, և՛ իրավունքը. մի կողմից՝ պետությունն առանց ուժեղ գիտության չի կարող ուժեղ լինել, մյուս կողմից՝ եթե ուժեղ գիտություն է պետք, ապա պետությունը պետք է դիրքավորվի որպես ուժեղ։
Ըստ Արշակյանի՝ Հայաստանը գիտության առաջ երբեք, որպես այդպիսին, խնդիրներ չի դրել, երկիրը ևս նման փորձ չունի՝ նախկինում գիտնականների առաջ գլոբալ խնդիրներ էր դնում ԽՍՀՄ Գիտությունների ակադեմիան։ Այսօր քայլեր են ձեռնարկվում, որոնք կօգնեն զարգացնել այդ հմտությունը երկրում, և նոր խորհրդատվական մարմինը կարող է դրա գործիքներից մեկը լինել:
Հետևեք NEWS.am Tech-ին Facebook-ում և Twitter-ում