Էդուարդ Մուսայելյան. Ռազմարդյունաբերությունը դարձել է քաղաքացիական տեխնոլոգիաների գլխավոր շարժիչ ուժը

Ռազմական արդյունաբերությունն այսօր ոչ միայն պետության անվտանգության ապահովման գործիք է, այլև տեխնոլոգիական զարգացման առանցքային շարժիչներից մեկը։ Այս մասին հայտարարել է Տեղեկատվական և հաղորդակցության տեխնոլոգիաների (ՏՀՏ) գործատուների միության գործադիր տնօրեն Էդուարդ Մուսայելյանը՝ բացելով RISE 2026 ռազմարդյունաբերական, նորարարական և ինժեներական առաջին ցուցահանդեսի շրջանակում անցկացվող համաժողովը (ֆոտոռեպորտաժ)։

Բազմաթիվ տեխնոլոգիաներ սկիզբ են առել ռազմարդյունաբերական համալիրից

Նրա խոսքով՝ ժամանակակից պատմությունը բազմիցս ապացուցել է, որ այսօր քաղաքացիական կյանքում լայնորեն կիրառվող շատ տեխնոլոգիաներ ի սկզբանե ստեղծվել են ռազմարդյունաբերական համալիրի կարիքների համար։

«Ինտերնետը, որն այսօր գլոբալ հաղորդակցության հիմքն է, և GPS-ը, որն օգտագործվում է սմարթֆոններում, ավտոմեքենաներում ու լոգիստիկայում, ի սկզբանե մշակվել են ռազմական նպատակներով», — նշել է Մուսայելյանը։

Նա ընդգծել է, որ արդի աշխարհում պետություններն ակտիվորեն ներդրումներ են կատարում ռազմարդյունաբերական տեխնոլոգիաներում, քանի որ հենց դրանք են ապահովում երկարաժամկետ մրցակցային առավելություններ և դառնում նորարարությունների աղբյուր տնտեսության տարբեր ճյուղերի համար։

Մուսայելյանի փաստմամբ՝ չնայած Հայաստանի փոքր չափերին, երկիրն ունի զգալի գիտական և ինժեներական ներուժ։ Հայ գիտնականներն ու ինժեներները տասնամյակներ շարունակ լուծումներ են ստեղծել տարբեր պետությունների և ոլորտների համար ողջ աշխարհում։

«Այսօր մեր խնդիրն է կենտրոնացնել այդ ներուժը, ստեղծել նոր ընկերություններ, նոր աշխատատեղեր և արդյունաբերության նոր ճյուղեր», — հայտարարել է նա։

Ավելի քան 40 թիմ կցուցադրի իր արտադրանքն ու գաղափարները

Համաժողովի կենտրոնական թեմաներից մեկը, ըստ Մուսայելյանի, հենց ռազմական արդյունաբերությունն է, որը ժամանակակից պայմաններում ինչպես ազգային անվտանգության, այնպես էլ տեխնոլոգիական առաջընթացի կարևորագույն տարրերից է։

«Այսօր մենք ներկայացված ենք նոր ձևաչափով՝ RISE-ով։ Երկու օրվա ընթացքում ռազմարդյունաբերությունը, ինժեներական ոլորտը և գիտահետազոտական համայնքը ներկայացնող ավելի քան 40 թիմ կցուցադրեն իրենց արտադրանքն ու գաղափարները», — նշել է նա։

Մուսայելյանը հավելել է, որ այդ թիմերից յուրաքանչյուրն իր ավանդն է ներդնում երկրի տեխնոլոգիական ինքնուրույնության, անվտանգության և դիմակայունության ամրապնդման գործում։