Հայկական անշարժ գույքը մուտք է գործում միջազգային շուկա. Հարցազրույց Վրույր Փենեսյանի հետ

Հայաստանի անշարժ գույքի նկատմամբ հետաքրքրությունը աճում է ոչ միայն երկրի ներսում, այլև նրա սահմաններից դուրս: Ժամանակակից բնակելի համալիրները, որոնք համապատասխանում են միջազգային չափանիշներին, դառնում են Հայաստանի այցեքարտը և գրավում տարբեր երկրների ներդրողների ուշադրությունը: Այս միտումը հատկապես նկատելի է միջազգային ցուցահանդեսներում, որտեղ հայկական նախագծերը հավասարապես մրցակցում են աշխարհահռչակ ապրանքանիշերի հետ:

Այս մասին Economix հաղորդման եթերում խոսել է Business Partners of Armenia ընկերության ղեկավար Վրույր Փենեսյանը:

Հայկական նորակառույցները գրավում են ներդրողներին

Հայաստանի անշարժ գույքի շուկան այսօր գերհագեցած է, սակայն, ինչպես նշում է Business Partners of Armenia ընկերության ղեկավար Վրույր Փենեսյանը, սա ոչ թե խնդիր է, այլ առավելություն: Երկրում կառուցվում են բազմաթիվ ժամանակակից բնակելի համալիրներ, որոնք համապատասխանում են միջազգային չափանիշներին և արժանի են ներկայացվելու արտասահմանյան շուկաներում:

«Նման նախագծերի առաջմղումը արտերկրում ուղղակիորեն խթանում է ներդրումների ներհոսքը դեպի երկիր: Հայաստանում անշարժ գույքի գնումը պարզապես գործարք չէ, այլ ուղղակի ներդրում, որը խթանում է տնտեսության այլ ճյուղեր», - նշել է Փենեսյանը: Նրա խոսքով՝ հետազոտությունները հաստատում են, որ հայկական նորակառույցներից շատերը համապատասխանում են համաշխարհային պահանջներին: Հենց այդ պատճառով ընկերությունը ներկայացրել է Հայաստանի լավագույն նախագծերը Մոսկվայում կայացած ցուցահանդեսում:

Միջոցառումը համախմբել է համաշխարհային հսկաներին, ինչպիսիք են Kempinski, Pullman, Movenpick, Novotel և այլն: «Այս ապրանքանիշերի ներկայությունը ներդրողների համար ուժեղ ազդանշան է, քանի որ դա ցույց է տալիս, որ խոշոր ընկերություններն արդեն վստահում են Հայաստանին և ներդրումներ են կատարում նրա զարգացման մեջ», - ընդգծել է Business Partners of Armenia-ի ղեկավարը:

Միևնույն ժամանակ, Փենեսյանը ուշադրություն է դարձրել, որ Հայաստանում կան նաև տեղական կառուցապատողներ, որոնք որակով կարող են մրցակցել համաշխարհային առաջատարների հետ: «Երբ Մոսկվայում ներկայացնում էի Amano, Sarina և այլ նախագծեր, շատերը չէին հավատում, որ նման ժամանակակից շենքեր կառուցվել են Հայաստանում», - պատմել է նա:

Փենեսյանի կարծիքով՝ հայկական անշարժ գույքի շուկան արդեն այսօր ձևավորում է երկրի դրական կերպարը և բացում է միջազգային ներդրումներ ներգրավելու նոր հեռանկարներ:

Աշունը՝ ներդրումների ժամանակ

Փենեսյանը նշել է, որ Մոսկվայում կայացած առաջին ցուցահանդեսը ցույց է տվել, որ հայկական անշարժ գույքի նկատմամբ հետաքրքրություն են ցուցաբերում ոչ միայն հայրենակիցները, այլև օտարերկրյա գնորդները:

«Մոսկվայի ներկայացումից հետո մենք որոշեցինք ընդլայնել միջոցառումների աշխարհագրությունը: Այս տարի նախատեսում ենք ցուցահանդեսներ անցկացնել Սոչիում և Կրասնոդարում», - պատմել է նա:

Ի սկզբանե նման միջոցառումները պլանավորվում էր կազմակերպել հաջորդ տարվա գարնանը, սակայն, Փենեսյանի խոսքով, հետազոտությունները ցույց են տվել, որ այդ ժամանակաշրջանը բարենպաստ չէ անշարժ գույքի գործարքների համար:

«Գարնանը պոտենցիալ գնորդները պարզապես բավարար միջոցներ չունեն խոշոր գնումների համար: Լավագույն ժամանակը սեպտեմբերի վերջն է և հոկտեմբերի սկիզբը: Դա կապված է զբոսաշրջային սեզոնի ավարտի հետ. հյուրանոցների և հյուրատների սեփականատերերն այդ ժամանակ ունեն զգալի եկամուտներ, որոնք պատրաստ են ներդնել», - բացատրել է Business Partners of Armenia-ի ղեկավարը:

Նրա խոսքով՝ ավանդաբար այդ միջոցները ներդրվում են Ռուսաստանում և ԱՄԷ-ում անշարժ գույքի գնման մեջ: «Եթե մենք ցուցահանդես անցկացնենք այդ ժամանակ, կա հնարավորություն, որ այդ ներդրումների մի մասը կուղղվի Հայաստան», - ընդգծել է Փենեսյանը: