Հայաստանը՝ թերագնահատված ուղղություն, որն ունի ամեն ինչ՝ դառնալու տուրիստական բրենդ. հարցազրույց Hyatt-ի ներկայացուցչի հետ

Հյուրանոցային բիզնեսի աշխարհում, որտեղ մրցակցությունն այսօր դառնում է առավել խիստ, իսկ ճանապարհորդները՝ ավելի պահանջկոտ, Hyatt-ի անունը մնում է բարձրակարգի, վստահության և փորձի խորհրդանիշ: NEWS.am Tech-ին տված հարցազրույցում Hyatt բրենդի ներկայացուցիչ Տակույա Աոյաման խոսել է Հայաստանում Hyatt-ի ապագայի, տուրիստական շուկայի վիճակի, հյուրընկալության ոլորտում թվային վերափոխումների և դևելոփերների համար գլխավոր կանոնի՝ ջերմ սիրտ, բայց սառը գլուխ, մասին:

Մենք ունեինք երկու Hyatt հյուրանոց Հայաստանում, և մենք ցանկանում ենք վերադառնալ

Հայաստանում գործում էին երկու Hyatt Place հյուրանոցներ՝ Երևանում և Ջերմուկում: Ներկայումս դրանք այլևս չեն գործում Hyatt բրենդի ներքո՝ տարբեր պատճառներով: Սակայն դա չի նշանակում, որ բրենդը չի հավատում հայկական շուկային: Ընդհակառակը, բրենդի ներկայացուցչի կարծիքով, Երևանում ներկայությունն անհրաժեշտ է: Իսկ մայրաքաղաք վերադառնալուց հետո հնարավոր կլինի մտածել մարզերում զարգացման մասին, նշել է ներկայացուցիչը:

Լյուքս սեգմենտը Հայաստանում դեռ թույլ է ներկայացված, բայց դա կարող է փոխվել

Ներկայումս Երևանում, թերևս, կա միայն մեկ հյուրանոց, որը կարելի է իսկապես լյուքս համարել՝ Alexander-ը: Դեռևս դժվար է խոսել շուկայի հստակ տեղաշարժի մասին՝ դեպի մատչելիություն կամ շքեղություն: Սակայն, հաշվի առնելով երկրի տնտեսության զարգացումը և նրան շրջապատող արտաքին միջավայրը, աճի ներուժ կա, կարծում է Աոյաման: Իհարկե, կան ասպեկտներ, որոնք պահանջում են կատարելագործում, բայց երկարաժամկետ հեռանկարում շուկան կզարգանա, ավելացրել է նա:

Հայաստանը թերագնահատված ուղղություն է: Նա ունի ամեն ինչ՝ տուրիստական բրենդ դառնալու համար

Ցանկացած հյուրանոցային ցանց՝ Hyatt, Marriott, Hilton, հետևում է հյուրերին: Իսկ հյուրերն այնտեղ են գնում, որտեղ հետաքրքիր է: «Հայաստանը, իմ կարծիքով, մնում է թերագնահատված ուղղություն: Եվ նրա՝ որպես տուրիստական երկրի առաջմղման համար բավարար միջոցներ չեն ներդրվում: Թեև, իհարկե, փողը ամենը չէ: Տուրիզմը մեծապես կախված է իմիջից, հեղինակությունից և բարի կամքից», — նշել է մասնագետը: Աոյամայի խոսքով, Հայաստանն ունի ամեն ինչ՝ այդ իմիջը ձևավորելու համար. 6000-ամյա գինեգործության պատմություն, Եվրոպայի ամենահին քրիստոնեական ազգի կարգավիճակ և շախմատի գերտերություն: Գումարած՝ 7 միլիոն մարդ սփյուռքում, որոնք պոտենցիալ ինֆլյուենսերներ են: Եթե երկիրը սկսի հետևողականորեն կառուցել սեփական պատմություն, պահանջարկ կհայտնվի: Իսկ որտեղ պահանջարկ է առաջանում, այնտեղ գալիս են նաև Hyatt-ի նման բրենդներ:

Տեխնոլոգիաները նորաձևություն չեն, այլ բազա: Բայց նպատակը մեկն է՝ հյուրի երջանկությունը

Թվային տեխնոլոգիաներն արդեն վաղուց դարձել են հյուրանոցային բիզնեսի բազային ենթակառուցվածքի մաս. դրանք ոչ միայն օպտիմալացնում են սպասարկումը, այլև ազատում են աշխատակիցների ժամանակը, որպեսզի նրանք ավելի շատ ուշադրություն դարձնեն հյուրերին: «Մեզ մոտ ամեն ինչ՝ ժամանումից մինչև հեռանալը, թվայնացված է: Բայց կարևոր է հասկանալ. եթե դա չի բարելավում հյուրի տպավորությունը, ապա դա անիմաստ է: Այն ամենը, ինչ մենք ներդնում ենք, մենք ներդնում ենք մեր մոտ կանգ առած մարդու համար: Եվ եթե նա գոհ է, մենք վստահ ենք, որ նա պատրաստ կլինի վերադառնալ: Եվ, գուցե, նույնիսկ ավելի շատ վճարել», — ասել է Աոյաման NEWS.am Tech-ի հետ զրույցում:

Գլխավորը ներդրողի համար՝ ջերմ սիրտ և սառը գլուխ

«Իմ գլխավոր խորհուրդը նրանց, ովքեր մտածում են համաշխարհային բրենդների հետ համագործակցության մասին, սրտանց սիրել հյուրանոցային բիզնեսը, քանի որ այն պահանջում է հսկայական ջանքեր և լուրջ ներդրումներ: Բայց միևնույն ժամանակ անհրաժեշտ է պահպանել սառնասրտություն: Կիրքը չպետք է կառավարի ներդրումները: Շատերն այցելում են շքեղ հյուրանոցներ, վերադառնում տուն և ասում. «Ես ուզում եմ նման հյուրանոց, նման բար»: Բայց պետք է կարողանալ զսպել իրեն: Դա շատ կարևոր է», — նշել է մասնագետը:

«Մենք ցանկանում ենք կրկին լինել Երևանում: Իսկ հետո՝ ով գիտե...»

Աոյամայի խոսքով, Hyatt-ը ցանկանում է վերադառնալ Հայաստան: Իդեալական կլինի Երևանում բացել երկու լիարժեք բարձրակարգ հյուրանոց: «Իսկ հետո՝ կտեսնենք: Բոլորին հայտնի է, որ Համաշխարհային բանկը աջակցում է երկրում ենթակառուցվածքների զարգացմանը: Եվ քանի որ տուրիզմը զարգանում է մայրաքաղաքից դուրս, ես կցանկանայի լինել նաև այնտեղ՝ լինի դա գինեգործական տարածաշրջան, Սևան, կամ, գուցե, նույնիսկ կրկին Ջերմուկ»:

Ըստ ներկայացուցչի, բրենդը գտնվելու վայր ընտրելիս հաշվի է առնում բազմաթիվ գործոններ՝ տնտեսության զարգացումը, նման արժեքներով գործընկերներ գտնելու հնարավորությունը և ոգեշնչումը՝ թե որքանով է երկիրը ոգեշնչող: «Նայեք Ուզբեկստանին կամ Ալբանիային. դեռ վերջերս դրանք ոչ ոք չէր դիտարկում որպես տուրիստական ուղղություններ, իսկ այժմ այնտեղ ակտիվ աճ է: Հայաստանը հերթում է, եթե ճիշտ խաղա»: Աոյաման նաև հիշեցրել է, որ Hyatt-ը Չիկագոյից ամերիկյան ընկերություն է, բայց նրա գործադիր տնօրենը հայկական ծագում ունի, ուստի ընկերությունն առանձնահատուկ վերաբերմունք ունի այս երկրի նկատմամբ: