Արդեն 15 օր է, ինչ աշխարհը հետևում է, թե ինչպես է աշխարհի ամենահարուստ մարդկանցից
մեկը միայնակ ոչնչացնում հաղորդակցության ամենահզոր հարթակներից մեկը, որը վերջերս գնել է 44 միլիարդ դոլարով:
Ընկերության աշխատակիցների խոսքով՝ այն, ինչ կատարվում է ընկերությունում, նման է «վերջի սկզբին»։ Նույնիսկ ինքը՝ Իլոն Մասկը, այժմ չի բացառում, որ ընկերությունը կարող է սնանկանալ, ավելին, բանկերը, որոնք ֆինանսավորել են սոցցանցը գնելու գործարքը, կարող են միլիարդավոր դոլարներ կորցնել։
Վերջերս աշխատանքից ազատված աշխատակիցներից մեկը (իսկ վերջերս շատերն են ազատվել աշխատանքից՝ գրեթե յուրաքանչյուր երկրորդը) ասել է, որ ընկերությունն այժմ նման է «Տիտանիկին», որը խորտակվում է մինչ «բոլորը փրկանավակներ են փնտրում»։
Twitter-ի եկամտի հիմնական աղբյուրը գովազդն է։ Այնուամենայնիվ, այն պահից, երբ Իլոն Մասկը գնեց հարթակը, շատ խոշոր գովազդատուներ (L'Oréal, General Motors և այլք) որոշեցին հեռու մնալ Twitter-ից, գոնե առայժմ: Դա, ըստ dw.com-ի, հանգեցրել է եկամուտների նվազմանը, ինչպես և սպասվում էր։
Խնդիրները սկսվեցին նաև երեք տեսակի օգտահաշիվներ ստեղծելու որոշումից հետո՝ «պաշտոնական» օգտահաշիվներ՝ մոխրագույն ստուգանիշով, ստուգված հաշիվներ՝ կապույտ ստուգանիշով, որոնց համար պետք է վճարել 8 դոլար, և մնացած բոլորը։ Բաժանորդագրության այս մոդելը հանգեցրեց կեղծ օգտահաշիվների ավելացմանը, որոնք ներկայանում են որպես տարբեր հայտնի դեմքեր, օրինակ՝ Լեբրոն Ջեյմսի և Մեծ Բրիտանիայի նախկին վարչապետ Թոնի Բլերի անվան ներքո բացված կեղծ օտգահաշիվները: Մոխրագույն ստուգանիշի գործարկումից կարճ ժամանակ անց Մասկը, ի վերջո, հրաժարվեց դրանից։
Խնդիր դարձան նաև ընկերության աշխատակիցների զանգվածային կրճատումները։ Երբ Մասկը աշխատանքից ազատեց Twitter-ի 7000 աշխատակիցների կեսին, կարևոր պաշտոններում զբաղեցնող շատ բարձրաստիճան ղեկավարներ հեռացան իրենց կամքով: Նրանց թվում են Twitter-ի վստահության և անվտանգության բաժնի ղեկավար Յոել Ռոթը, Twitter-ի գաղտնիության հարցերով գլխավոր տնօրեն Դեմիեն Քեյրանը և սոցցանցի տեղեկատվական անվտանգության գլխավոր տնօրեն Լեա Քիսները:
Այս բոլոր կրճատումները չէին կարող չազդել հարթակի աշխատանքի վրա։ Facebook-ի անվտանգության նախկին ղեկավար Ալեքս Ստամոսը նույնիսկ մտավախություն էր հայտնել, որ անձնակազմի կտրուկ կրճատման պատճառով լուրջ վտանգ կա, որ Twitter-ը կարող են կոտրել:
Տեղի ունեցածի ֆոնին Twitter-ը հայտնվեց ԱՄՆ Առևտրի դաշնային հանձնաժողովի (FTC) դիտակետում։ FTC-ն կարգավորող մարմին է, որի հիմնական գործառույթը հաճախորդների պաշտպանությունն է: Նոյեմբերի 10-ին FTC-ն հայտարարություն տարածեց, որում մասնավորապես ասվում է, որ հանձնաժողովը «խորը մտահոգությամբ հետևում է Twitter-ի վերջին զարգացումներին», և որ «ոչ մի գործադիր տնօրեն կամ ընկերություն օրենքից վեր չէ»:
Փորձագետները մտավախություն ունեն, որ այս կարգավորիչի հետ կապված խնդիրները կարող են հանգեցնել լուրջ տուգանքների՝ միլիարդավոր դոլարների չափով:
Twitter-ը ներկայումս ամեն օր կորցնում է 4 միլիոն դոլար։ Սոցցանցն ունի նաև 13 միլիարդ դոլարի պարտք, որի միայն տոկոսները մարելու համար առաջիկա 12 ամիսների ընթացքում ընկերությունը պետք է 1,2 միլիարդ դոլար վճարի։
Դա ավելին է, քան վերջին տվյալներով կազմում է Twitter-ի դրամական հոսքը՝ 1,1 միլիարդ դոլար:
Նոյեմբերի 10-ին Իլոն Մասկը Twitter-ի աշխատակիցներին զգուշացրել է պատրաստվել «դժվար ժամանակների», որոնց նրանք կարող են առերեսվել: Նա չի բացառել Twitter-ի սնանկացումը, եթե ընկերությունը հաջորդ տարի չսկսի ավելի շատ գումար աշխատել, քան ծախսում է: Իսկ դրա համար անհրաժեշտ կլինի վաստակելու նոր ուղիներ գտնել։
Խոշոր գովազդատուների հետ կապված խնդիրների ֆոնին Մասկը նախատեսում է անել այնպես, որ Twitter-ը ավելի քիչ կախվածություն ունենա գովազդային պայմանագրերից և իր եկամտի առնվազն կեսը ստանա օգտատերերի ստուգված հաշիվների 8 դոլարանոց բաժանորդագրություններից:
Բազմաթիվ փորձագետների կարծիքով՝ Twitter-ը գնելու գործարքը տեղի ունեցավ ԱՄՆ պարտատոմսերի շուկայի համար վատ ժամանակաշրջանում։ Եվ այժմ բանկերը, որոնք Մասկին 13 միլիարդ դոլար են տվել Twitter-ը գնելու համար, դժվարանում են վերավաճառել այդ պարտատոմսերը։ Ըստ Bloomberg-ի, այս պարտքի զեղչերն այժմ կարող են հասնել 40 ցենտի՝ մեկ դոլարի համար, ինչը ամենացածր մակարդակն է վերջին տասնամյակում:
Յոթ բանկերի կոնսորցիումը, որը գլխավորում է Morgan Stanley-ն, այժմ ստիպված է այդ պարտքերը պահել սեփական հաշվեկշռում, քանի որ վարկատուները չեն ցանկանում վաճառել դրանք ընթացիկ տոկոսադրույքներով: Ի սկզբանե նախատեսվում էր վաճառել այդ պարտքի ամենալիկվիդային մասը՝ 6,5 միլիարդ դոլարի չափով, սակայն բանկերը չեն ցանկանում կորցնել ավելի քան 30 ցենտ յուրաքանչյուր դոլարի համար, և նույնիսկ այդ զեղչի դեպքում առաջին օղակի վարկատուները կարող են միլիարդավոր դոլարներ կորցնել:
Նշենք, որ Twitter-ի ձեռքբերումը բացասաբար է ազդել նաև Tesla-ի գործերի և Իլոն Մասկի հարստության վրա. սոցիալական ցանցի ձեռքբերման մասին առաջին լուրերից հետո Tesla-ի բաժնետոմսերի գինն սկսել է նվազել և հասել է երկու տարվա նվազագույնին, իսկ Մասկը կորցրել է 70 մլրդ դոլար։ Մասկի կարողությունն այժմ կազմում է 194,8 մլրդ դոլար։