Twitter-ում կլինեն 3 տեսակի օգտահաշիվներ. արդյո՞ք սոցցանցը վճարովի կդառնա բոլորի համար

Ստուգման նոր համակարգը Twitter-ի բոլոր օգտահաշիվները կբաժանի երեք խմբի։ Twitter Blue-ի բաժանորդները, որոնք կլինեն երեք խմբերից մեկը, այլեւս ստիպված չեն լինի փաստաթղթեր ներկայացնել կապույտ ստուգանիշ ստանալու համար՝ բավական կլինի ամսական 8 դոլար վճարել և վերջ։ Այնուամենայնիվ, լուրեր են պտտվում, որ Իլոն Մասկը, որը վերջերս է դարձել Twitter-ի նոր սեփականատերը, մտադիր է հարթակը վճարովի դարձնել բոլորի համար։

Twitter-ում կլինի երեք տիպի օգտահաշիվ

Ինչպես տեղեկացրել է Twitter-ի փորձարարական նախագծերի պատասխանատու Էսթեր Քրոուֆորդը, վերիֆիկացիայի նոր համակարգի շնորհիվ հարթակում կլինեն երեք տիպի օգտահաշիվներ.

• «Պաշտոնական»՝ պաշտոնական օգտահաշիվներ,
• Twitter Blue վճարովի բաժանորդագրությամբ օգտահաշիվներ,
• Չստուգված օգտահաշիվներ։

Նախկինում հարթակն ուներ ստուգման անվճար ընթացակարգ, որի շրջանակում օգտատերերը կարող էին տրամադրել անձնական տվյալներ (փաստաթղթեր, վարորդական իրավունք, հեռախոսահամար և այլն), որոնց օգնությամբ իրենց կարող էին նույնականացնել: Սակայն այժմ Twitter Blue-ի բաժանորդներն այլևս ստիպված չեն լինի կապույտ ստուգանիշ ստանալու համար վերիֆիկացիան անցնել այս կերպ։ Քանի որ Twitter Blue-ի բաժանորդագրությունը վճարովի է, ընկերությունը կկարողանա օգտատերերին նույնականացնել վճարման փաստաթղթերում առկա տվյալների հիման վրա։

Արդեն իսկ վերիֆիկացված օգտահաշիվներից մի քանիսը առանց հավելավճարի և առանց բաժանորդագրության կկարողանան ստանալ «Պաշտոնական» պիտակը: Բայց այս հնարավորությունը, ամենայն հավանականությամբ, կտրվի պետական ​​կազմակերպություններին, պաշտոնյաներին, քաղաքական գործիչներին, հասարակական գործիչներին և լրատվամիջոցներին: Ավելին, «Պաշտոնական» պիտակի օգտագործման իրավունքը հնարավոր չի լինի գնել, ինչպես Blue ստուգանիշի դեպքում է։

Twitter-ի մյուս բոլոր օգտահաշիվները կհամարվեն չստուգված:

Իլոն Մասկը ցանկանում է Twitter-ը դարձնել վճարովի՞

Խոսակցություններ կան, որ նոր սեփականատերը մտածում է Twitter-ը վճարովի հարթակ դարձնելու մասին: Ըստ Platformer-ի տվյալների՝ Մասկը վերջերս իր խորհրդական Դեյվիդ Սաքսի հետ քննարկել է Twitter-ին հասանելիության համար վճարովի բաժանորդագրություն կիրառելու հնարավորությունը։

Թե կոնկրետ ինչպես դա կարող է իրականացվել, և արդյոք այն ընդհանրապես կիրականացվի, դեռ հայտնի չէ: Գուցե Twitter-ը ամսական սահմանափակում մտցնի կայքի անվճար օգտագործման համար, որը գերազանցելուց հետո օգտատերերին կառաջարկվի վճարովի բաժանորդագրության անցնել։

Twitter-ի պաշտոնական ներկայացուցիչները դեռ չեն մեկնաբանել այս լուրերը, և, ըստ ամենայնի, այս հարցի վերաբերյալ վերջնական որոշում չի կայացվել։