Opera բրաուզերում կներդրվի ChatGPT-ի արհեստական բանականության (ԱԲ) տարրերով աշխատող բոտ։ Այս մասին հայտնում է CNBC-ն՝ վկայակոչելով չինական Kunlun Tech ընկերությանը, որին ներկայումս պատկանում է բրաուզերը։
«Մանրամասներ չկան ժամանակացույցի վերաբերյալ, ինչպես նաև այն մասին, թե արդյոք այդ գործառույթները հասանելի կլինեն Opera-ի բոլոր արտադրանքներում, ներառյալ՝ iOS-ի և Android-ով PC համակարգիչների և բջջային բրաուզերների համար»,- ասել է ընկերության ներկայացուցիչը։
Statcounter-ի հունվարի տվյալներով՝ Opera-ն բրաուզերների համաշխարհային շուկայում զբաղեցնում է վեցերորդ տեղը՝ շուկայի 2,4% բաժնեմասով։ Դեկտեմբերից կորպորացիան սկսել է ակտիվ աշխատել արհեստական բանականության վրա հիմնված սեփական ծրագրերի վրա։ Մայր ընկերությունը՝ Kunlun Tech-ը, տեղակայված է Պեկինում և ցուցակված է Շենժենի ֆոնդային բորսայում:
ԱԲ-ով աշխատող ChatGPT-ն իսկական մրցավազք է առաջացրել ՏՏ ոլորտում, ընկերությունները մեկը մյուսի հետևից հայտարարում են, որ արհեստական բանականությամբ աշխատող ChatGPT-ի իրենց տարբերակները մշակելու մասին։ Ավելին, Open AI ընկերության կողմից ChatGPT-ի թողարկումից հետո, Microsoft-ն ChatGPT-ը ներդրել է իր Bing որոնողական համակարգում՝ որոնման փորձառությունը հասցնելով նոր մակարդակի։
Google-ը ևս ներկայացրել էր ChatGPT-ի սեփական տարբերակը՝ Bard չատբոտը, սակայն այն փաստական սխալ էր թուլ տվել առաջին իսկ հարցի պատասխանում, ինչի հետևանքով Google-ի մայր ընկերության՝ Alphabet-ի բաժնետոմսերի գինն ընկել էր ավելի քան 7%-ով՝ ընկերության շուկայական արժեքը նվազեցնելով է 100 մլրդ դոլարով:
Չինական տեխնոլոգիական հսկաները՝ Baidu-ն և Alibaba-ն նույնպես վերջերս հայտարարեցին, որ աշխատում են ChatGPT-ի իրենց տարբերակներն ստեղծելու վրա։
OpenAI-ի ChatGPT չատբոտը ԱԲ տեխնոլոգիայի կիրառմամբ ստեղծում է տեքստային բովանդակություն: Դրա տարբերակներից մեկը հասանելի է համացանցի օգտատերերին անվճար, այն պատասխանում է օգտատերերի հարցերին, ստեղծում տարբեր ժանրերի տեքստեր, թարգմանում մի լեզվից մյուսը և այլն։
Չատբոտը սկսեցին քննադատել հատկապես այն բանից հետո, երբ այն սկսեցին օգտագործել ուսանողները քննություններ հանձնելու և ակադեմիական աշխատանքներ պատրաստելու համար, որոնցում ChatGPT-ն բավական լավ արդյունքներ է ցույց տվել: Այսպես, ChatGPT-ն ավարտական քննություն է հանձնել լավագույն բիզնես դպրոցներից մեկում, կոնկրետ աշխատատեղի համար դիմողների 80%-ից լավ է կատարել թեստային առաջադրանքը այնպես, որ HR մասնագետները նրան հրավիրել են հարցազրույցի։ Նույնիսկ դատավորներն են սկսել այն օգտագործել․ Կոլումբիայում մի դատավոր ChatGPT-ը կիրառել է վիճելի գործով վճիռ կայացնելու համար։
ամիս
շաբաթ
օր